ନୂଆଦିଲ୍ଲୀ: ବୁଧବାର ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପର ଦ୍ୱିତୀୟ ସଂସ୍କରଣର ଫାଇନାଲ ମ୍ୟାଚ୍ ପାଇଁ ତାରିଖ ଘୋଷଣା କରିଛି । ଜୁନ ୭ରୁ ୧୧ ମଧ୍ୟରେ ଦ ଓଭାଲରେ ଦୁଇ ଟେଷ୍ଟ ଟିମ୍ ମଧ୍ୟରେ ଫାଇନାଲ ମ୍ୟାଚ ଖେଳାଯିବ । ଜୁନ ୧୨କୁ ରିଜର୍ଭ ଦିନ ଭାବେ ରଖାଯାଇଛି । ବର୍ତ୍ତମାନ ସମୟରେ ଭାରତ, ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ଫାଇନାଲରେ ପହଞ୍ଚିବା ପାଇଁ ପ୍ରବଳ ଦାବିଦାର ଅଛନ୍ତି ।
ଐତିହାସିକ ଦ ଓଭାଲ ଗ୍ରାଉଣ୍ଡ ୧୦୦ରୁ ଅଧିକ ଟେଷ୍ଟ ମ୍ୟାଚ୍ ଆୟୋଜନ କରିଛି । ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପରେ ଦୁଇ ବର୍ଷର ପ୍ରତିଦ୍ୱନ୍ଦିତା ଏବଂ ୨୪ଟି ସିରିଜରେ ୬୧ ମ୍ୟାଚ୍ ଖେଳାଯାଉଛି ।
ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଫେବ୍ରୁଆରୀ ୯ରୁ ଆରମ୍ଭ ହେବାକୁ ଥିବା ବର୍ଡର-ଗାଭାସ୍କର ଟ୍ରଫିରୁ ସ୍ପଷ୍ଟ ହେବ ଯେ କେଉଁ ଟିମ୍ ଫାଇନାଲରେ ପହଞ୍ଚିବ । ବର୍ତ୍ତମାନ ସମୟରେ ବିଶ୍ୱ ଟେଷ୍ଟ ଚାମ୍ପିୟନଶିପର ଅଙ୍କ ତାଲିକାରେ ଅଷ୍ଟ୍ରେଲିଆ ୭୫.୫୬ ପ୍ରତିଶତ ସହ ଶୀର୍ଷ ସ୍ଥାନରେ ରହିଛି । ଏହା ପଛରୁ ଭାରତ ୫୮.୯୩ ପ୍ରତିଶତ ସହ ଦ୍ୱିତୀୟ ସ୍ଥାନରେ ରହିଛି । ଏହି କାରଣରୁ ଆଗାମୀ ବର୍ଡର ଗାଭାସ୍କର ଟ୍ରଫି ଦୁଇ ଟିମ ପାଇଁ ଗୁରୁତ୍ୱପୂର୍ଣ୍ଣ ଅଟେ । ସିରିଜର ପରିଣାମ ସ୍ପଷ୍ଟ କରିବ କେଉଁ କେଉଁ ଟିମ ଜୁନ ୭ ଫାଇନାଲ ମ୍ୟାଚ୍ ଖେଳିବେ । ଶ୍ରୀଲଙ୍କା (୫୩.୩୩) ଏବଂ ଦକ୍ଷିଣ ଆଫ୍ରିକା (୪୮.୭୨) ପ୍ରତିଶତ ସହ ତୃତୀୟ ଏବଂ ଚତୁର୍ଥ ସ୍ଥାନରେ ରହିଛି ।
ବିଶ୍ୱ ଟେଷ୍ଟ ଚାମ୍ପିୟନଶିପର ପ୍ରଥମ ସଂସ୍କରଣରେ ନ୍ୟୁଜିଲାଣ୍ଡ ବିଜୟୀ ହୋଇଥିଲା । ନ୍ୟୁଜିଲାଣ୍ଡ ଡବ୍ଲୁଟିସି ୨୦୨୧ ଫାଇନାଲରେ ଭାରତକୁ ୮ ୱିକେଟରେ ହରାଇଥିଲା । ସାଉଥମ୍ପଟନରେ ଏହି ମୁକାବିଲା ଖେଳା ଯାଇଥିଲା ।
