ଅହମ୍ମଦାବାଦ ୧୩।୦୩ : ଇତିହାସ ରଚିଲା ଟିମ୍‌ ଇଣ୍ଡିଆ । ପୁଣି ଥରେ ବିଶ୍ୱ ଟେଷ୍ଟ ଚମ୍ପିଆନ୍‌ସିପ୍‌ ଫାଇନାଲରେ ପ୍ରବେଶ କଲା ଭାରତୀୟ ଟିମ୍‌ । ଲଗାତର ଭାବେ ୨ ଥର ଫାଇନାଲରେ ପ୍ରବେଶ କରିବାରେ ଏକମାତ୍ର ଟିମ୍‌ ସାଜିଛି ଟିମ୍‌ ଇଣ୍ଡିଆ ।

ଅହମ୍ମଦାବାଦ୍‌ରେ ଏବେ ଭାରତ-ଅଷ୍ଟ୍ରେଲିଆ ମଧ୍ୟରେ ଚତୁର୍ଥ ଟେଷ୍ଟ ଚାଲିଛି । ଏସବୁ ମଧ୍ୟରେ ନ୍ୟୁଜିଲାଣ୍ଡରୁ ଆସିଛି ଗୁଡ୍‌ ନ୍ୟୁଜ୍‌ । ଶ୍ରୀଲଙ୍କା ଏବଂ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ଟେଷ୍ଟ ମ୍ୟାଚ୍‌ ଶେଷ ହୋଇଛି । ଯେଉଁଥିରେ ନ୍ୟୁଜିଲାଣ୍ଡ ୨ ଓ୍ୱିକେଟ୍‌ରେ ଶ୍ରୀଲଙ୍କାକୁ ହରାଇଛି । ଯାହାଫଳରେ ଟିମ୍‌ ଇଣ୍ଡିଆ WTC ୨୦୨୩ ଫାଇନାଲକୁ କ୍ୱାଲିଫାଏ କରିଛି ।

The World Test Championship final is locked in! 🔒 pic.twitter.com/gp231vF3Ic

— cricket.com.au (@cricketcomau) March 13, 2023

ତେବେ ବିଶ୍ୱ ଟେଷ୍ଟ ଚମ୍ପିଆନ୍‌ସିପ୍‌ ଫାଇନାଲ୍‌ରେ ଭାରତର ମୁକାବିଲା ଅଷ୍ଟ୍ରେଲିଆ ସହିତ ହେବ । ପୂର୍ବରୁ ଅଷ୍ଟ୍ରେଲିଆ ଫାଇନାଲ ମ୍ୟାଚ୍‌କୁ କ୍ୱାଲିଫାଏ କରିସାରିଥିବା ବେଳେ ଏବେ ଟିମ୍‌ ଇଣ୍ଡିଆ ପ୍ରବେଶ କରିଛି । ଫାଇନାଲ ମ୍ୟାଚ୍‌ ୭ରୁ ୧୧ ଜୁନ୍‌ ମଧ୍ୟରେ ଲଣ୍ଡନର ଦ ଓଭାଲ ଗ୍ରାଉଣ୍ଡରେ ଖେଳାଯିବ । ଯଦି କୌଣସି କାରଣରୁ ଏହି ମ୍ୟାଚ୍‌ ବାତିଲ ହୁଏ । ତେବେ ଏଥିପାଇଁ ରିଜର୍ଭ ଡେ ମଧ୍ୟ ରଖାଯାଇଛି । ଜୁନ୍‌ ୧୨ ତାରିଖ ଏଥିପାଇଁ ଧାର୍ଯ୍ୟ କରାଯାଇଛି । ଟିମ୍‌ ଇଣ୍ଡିଆ ଲଗାତର ୨ୟ ଥର ପାଇଁ ବିଶ୍ୱ ଟେଷ୍ଟ ଚମ୍ପିଆନ୍‌ସିପ୍‌ ଫାଇନାଲ୍‌ରେ ପହଞ୍ଚିଛି । ଏହାପୂର୍ବରୁ ନ୍ୟୁଜିଲାଣ୍ଡ ଟିମ୍‌ ଭାରତକୁ ହରାଇଥିଲା ।