ଓଭାଲ: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଆଇସିସି ୱାଲର୍ଡ ଟେଷ୍ଟ ଚାମ୍ପିୟନଶିପ ୨୦୨୧-୨୩ର ଫାଇନାଲ ମୁକାବିଲା ଲଣ୍ଡନର ଓଭାଲରେ ଖେଳାଯାଉଛି । ପ୍ରଥମ ଇନିଂସରେ ଅଷ୍ଟ୍ରେଲିଆ ଟିମ୍ ବିଶାଳ ସ୍କୋର ଠିଆ କରିଛି । କଙ୍ଗାରୁ ଟିମ୍ ୧୨୧.୩ ଓଭରରେ ୪୬୯ ରନରେ ଅଲଆଉଟ୍ ହୋଇଛି । ଅଷ୍ଟ୍ରେଲିଆ ପାଇଁ ଟ୍ରାଭିସ୍ ହେଡ୍ ଏବଂ ଷ୍ଟିଭ୍ ସ୍ମିଥ୍ ଶତକୀୟ ଇନିଂସ ଖେଳିଥିଲେ । ଭାରତ ପକ୍ଷରୁ ମହମ୍ମଦ ସିରାଜ ସର୍ବାଧିକ ୪ ୱିକେଟ୍ ହାସଲ କରିଛନ୍ତି ।
ଅଷ୍ଟ୍ରେଲିଆ ଟିମ୍ ପ୍ରଥମ ଦିନରେ ଟସ୍ ହାରି ପ୍ରଥମେ ବ୍ୟାଟିଂ କରିବାକୁ ମୈଦାନକୁ ଓହ୍ଲାଇଥିଲା । ପ୍ରଥମ ଦିନ ଖେଳ ଶେଷ ବେଳକୁ ଦଳ ୮୫ ଓଭର ଖେଳି ୩ ୱିକେଟ୍ ହରାଇ ୩୨୭ ରନ କରିଥିଲା । ଟ୍ରାଭିସ ହେଡ୍ ୧୪୬ ରନ ଏବଂ ଉପଅଧିନାୟକ ଷ୍ଟିଭ ସ୍ମଥ୍ ୯୫ ରନ କରି ଅପରାଜିତ ଫେରିଥିଲେ । ଅଷ୍ଟ୍ରେଲିଆର ଦୁଇ ବ୍ୟାଟର ଦ୍ୱିତୀୟ ଦିନରେ ଛାଡିଯାଇଥିବା ନିଜ ଖେଳରୁ ଆରମ୍ଭ କରିଥିଲେ । ଟ୍ରାଭିସ ହେଡ ୧୭୪ ବଲରେ ୧୬୩ ରନ କରି ସିରାଜଙ୍କ ବଲରେ ଆଉଟ୍ ହୋଇଥିଲେ । ଏହାପରେ ଷ୍ଟିଭ୍ ସ୍ମିଥ୍ ମଧ୍ୟ ନିଜ କ୍ୟାରିୟରର ୩୧ତମ ଶତକ ହାସଲ କରିଥିଲେ । ସ୍ମଥଙ୍କୁ ୧୨୧ ରନରେ ଶାର୍ଦୁଲ ଠାକୁର କ୍ଲିନ ବୋଲ୍ଡ କରି ପାଭିଲିୟନ ପଠାଇଥିଲେ ।
ପ୍ରଥମ ଇନିଂସରେ ଭାରତୀୟ ବୋଲର ବେଶ ପ୍ରଭାବଶାଳୀ ବୋଲିଂ କରିପାରି ନଥିଲେ । ଯେଉଁଥି ପାଇଁ ଅଷ୍ଟ୍ରେଲିଆ ଟିମ୍ ଏତେ ବଡ଼ ସ୍କୋର ଠିଆ କରାଇ ପାରିଲା । ଭାରତ ପାଇଁ ମହମ୍ମଦ ସିରାଜ ସର୍ବାଧିକ ୪ ୱିକେଟ୍ ହାସଲ କରିଥିଲେ । ମହମ୍ମଦ ଶାମି ୨, ଶାର୍ଦୁଲ ଠାକୁର ୨ ଏବଂ ରବିନ୍ଦ୍ର ଜାଡେଜାଙ୍କୁ ଗୋଟିଏ ଲେଖାଏଁ ୱିକେଟ୍ ମିଳିଥିଲା ।
Also Read:ଲଗାତାର ଚୌକା ମାଡ଼ ପରେ ନିଜ ଉପରୁ ନିୟନ୍ତ୍ରଣ ହରାଇଲେ ସିରାଜ, ସ୍ମିଥ୍ଙ୍କ ଆଡକୁ ଫିଙ୍ଗିଲେ ବଲ, ରାଗିଲେ ଦର୍ଶକ