ମୁମ୍ୱାଇ: ମହିଳା ପ୍ରିମିୟର ଲିଗରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ନିରାଶାଜନକ ପ୍ରଦର୍ଶନ ଜାରି ରହିଛି । ଶୁକ୍ରବାର ଆରବିସିକୁ ଏକତରଫା ମୁକାବିଲାରେ ୟୁପି ୱରିୟର୍ସ ୧୦ ୱିକେଟରେ ପରାସ୍ତ କରିଛି । ଚଳିତ ଟୁର୍ଣ୍ଣାମେଣ୍ଟରେ ଆରସିବିର ଏହା ଲଗାତାର ଚତୁର୍ଥ ପରାଜୟ । ଏହି ପରାଜୟ ସହ ଆରବିସିର ପ୍ଲେ ଅଫ ରାସ୍ତା କଠିନ ହୋଇଛି ।

ମୁମ୍ୱାଇର ବ୍ରେବୋର୍ନ ଷ୍ଟାଡିୟମରେ ଖେଳାଯାଇଥିବା ମୁକାବିଲାରେ ପ୍ରଥମେ ବ୍ୟାଟିଂ ଆରସିବି ୧୩୮ ରନ ହାସଲ କରିଥିଲା । ୟୁପି ୱରିୟର୍ସ ଆଗରେ ୧୩୯ ରନର ବିଜୟ ଲକ୍ଷ୍ୟ ରହିଥିଲା । ତେବେ ଏହି ଟାର୍ଗେଟକୁ ୟୁପି ୱରିୟର୍ସ ୪୨ ବଲ ବାକି ଥାଇ ଗୋଟିଏ ୱିକେଟ୍ ନ ହରାଇ ଜିତି ନେଇଛି । ୟୁପିର ବିଜୟରେ କ୍ୟାପ୍ଟେନ ଆଲିସା ହେଲିଙ୍କ ଗୁରୁତ୍ୱପୂର୍ଣ୍ଣ ଭୂମିକ ରହିଥିଲା । ମ୍ୟାଚରେ ଆଲିସା ହେଲି ଅପରାଜିତ ୯୬ ରନର ମ୍ୟାଚ୍ ବିଜୟୀ ଇନିଂସ ଖେଳିଥିଲେ । ୪୭ ବଲରେ ୧୮ ଚୌକା ବଳରେ ସେ ୯୬ ରନ କରିଥିଲେ ।

ଆଲିସା ହେଲି ୯୬ ରନ ମହିଳା ପ୍ରିମିୟର ଲିଗରେ କୌଣସି ଖେଳାଳିଙ୍କ ଦ୍ୱାରା କରାଯାଇଥିବା ସର୍ବାଧିକ ବ୍ୟକ୍ତିଗତ ସ୍କୋର ଅଟେ । ଆଲିସା ହେଲିଙ୍କ ସହ ଓପନିଂ ପାଇଁ ଓହ୍ଲାଇଥିବା ଦେବିକା ମଧ୍ୟ ଅପରାଜିତ ୩୬ ରନ କରିଥିଲେ । ଦୁଇ ଖେଳାଳି ୧୩ ଓଭରରେ ୧୩୯ ରନର ବିଜୟ ଲକ୍ଷ୍ୟ ହାସଲ କରିଥିଲେ ।

ଟସ ଜିତି ପ୍ରଥମେ ବ୍ୟାଟିଂ ପାଇଁ ଓହ୍ଲାଇଥିବା ଆରସିବି ସମସ୍ତ ୱିକେଟ୍ ହରାଇ ୧୩୮ ରନ କରିବାରେ ସକ୍ଷମ ହୋଇଥିଲା । ଟିମ ପାଇଁ ଏଲିସା ପେରୀ ଅର୍ଦ୍ଧଶତକ ହାସଲ କରିଥିଲେ । ୩୯ ବଲରେ ଛଅ ଚୌକା ଏବଂ ଛକା ବଳରେ ସେ ୫୨ କରିଥିଲେ । ୟୁପି ପାଇଁ ସୋଫି ଏକ୍ଲେଷ୍ଟୋନ ୪ ଏବଂ ଦିପ୍ତୀ ଶର୍ମା ୩ ୱିକେଟ୍ ହାସଲ କରିଥିଲେ ।