ମୁମ୍ବାଇ ୨୬।୦୩ :  ରବିବାର ମହିଳା ପ୍ରିମିୟର ଲିଗ(ଡବ୍ଲ୍ୟୁପିଏଲ୍‌)ରେ ଟାଇଟଲ ମୁକାବିଲା । ମୁମ୍ବାଇ ଇଣ୍ଡିଆନ୍ସ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ହେବ ଟ୍ରଫି ପାଇଁ ଲଢେଇ । ପ୍ରଥମ ସଂସ୍କରଣ ଜିତି ଇତିହାସ ରଚିବା ଲକ୍ଷ୍ୟରେ ଉଭୟ ଦଳ । ଫାଇନାଲ୍‌ ମ୍ୟାଚ୍‌ ଖୁବ୍‌ ସଂଘର୍ଷପୂର୍ଣ୍ଣ ହେବ ।

ତେବେ ଲିଗ୍‌ ପର୍ଯ୍ୟାୟରେ ଉଭୟ ଦଳ ୧୨ ପଏଣ୍ଟ ଲେଖାଏଁ ଅର୍ଜନ କରିଥିଲେ । ମାତ୍ର ରନ୍‌ ରେଟ୍‌ରେ ଆଗୁଆ ରହି ଦିଲ୍ଲୀ କ୍ୟାପିଟାଲ୍ସ ସିଧା ଫାଇନାଲ୍‌ରେ ପ୍ରବେଶ କରିଥିଲା । ମୁମ୍ବାଇ ଇଣ୍ଡିଆନ୍ସ ଏଲିମିନେଟର ମୁକାବିଲାରେ ୟୁପି ୱାରିୟର୍ସକୁ ହରାଇ ଫାଇନାଲ୍‌କୁ ଯୋଗ୍ୟତା ଅର୍ଜନ କରିଥିଲା ।ଉଭୟ ଦଳର ଶକ୍ତି ସମାନ । ତେଣୁ ମ୍ୟାଚ୍‌କୁ ନେଇ ପୂର୍ବାନୁମାନ କରିବା କଷ୍ଟକର ।

ଲିଗ୍‌ ପର୍ଯ୍ୟାୟରେ ମଧ୍ୟ ଉଭୟ ଦଳ ପରସ୍ପରକୁ ଥରେ ଲେଖାଏଁ ହରାଇଥିଲେ । ଦିଲ୍ଲୀ କ୍ୟାପିଟାଲ୍ସ ଦଳର ବ୍ୟାଟିଂ ବିଭାଗ ବେଶ ଶକ୍ତିଶାଳୀ । ମେଗ୍‌ ଲ୍ୟାନିଂ ସମ୍ପ୍ରତି ବିଶ୍ୱର ସର୍ବଶ୍ରେଷ୍ଠ ବ୍ୟାଟର ଓ ଅଧିନାୟକ । ସେଫାଳି ବର୍ମାଙ୍କୁ ବ୍ୟାଟିଂ ବିସ୍ମୟ ଭାବେ ଗଣାଯାଉଛି । ଦଳରେ ଆଲିସ କ୍ୟାପ୍‌ସି, ଜେମିମା ରୋଡ୍ରିଗ୍ସ, ମରିଜାନ କାପ ଓ ଜେସ ଜନାସେନଙ୍କ ଭଳି ବିସ୍ଫୋରକ ବ୍ୟାଟର ରହିଛନ୍ତି।

ସେହିପରି ମୁମ୍ବାଇ ଇଣ୍ଡିଆନ୍ସ ନିକଟରେ ଏକ ସନ୍ତୁଳିତ ଦଳ ରହିଛି । ଦଳଗତ ପ୍ରଦର୍ଶନକୁ ପ୍ରାଥମିକତା ଦେଉଥିବା ମୁମ୍ବାଇ ଇଣ୍ଡିଆନ୍ସ କ୍ରମାନ୍ୱୟରେ ପ୍ରଥମ ୫ଟି ମ୍ୟାଚ୍‌ ଜିତି ସମସ୍ତଙ୍କୁ ଚକିତ କରିଦେଇଥିଲା । ହର୍ମନପ୍ରୀତ କୌରଙ୍କ ନେତୃତ୍ୱରେ ଯୁବ ଖେଳାଳିମାନେ ମଧ୍ୟ ଚମତ୍କାର ପ୍ରଦର୍ଶନ ଜାରି ରଖିଛନ୍ତି ।

ଆଜି ମୁମ୍ବାଇର ବାମହାତି ସ୍ପିନର ସାଇକା ଇଶାକ୍‌ଙ୍କ ଉପରେ ନଜର ରହିବ । ସେ ଇତି ମଧ୍ୟରେ ୧୫ଟି ୱିକେଟ୍‌ ଅକ୍ତିଆର କରିସାରିଛନ୍ତି । ସେହିପରି ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ମେଗ୍‌ ଲ୍ୟାନିଂ ନଜରରେ ରହିବେ । ତାଙ୍କ ସହଳ ଆଉଟ୍‌ କରିବା ପାଇଁ ମୁମ୍ବାଇ ଇଣ୍ଡିଆନ୍ସ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବା ଜରୁରି।

ମୁମ୍ବାଇ ଇଣ୍ଡିଆନ୍ସ: ୟସ୍ତିକା ଭାଟିଆ, ହେଲି ମାଥ୍ୟୁସ୍‌, ନାତାଲି ସ୍କିଭର-ବ୍ରଣ୍ଟ, ହର୍ମନପ୍ରୀତ କୌର(ଅଧିନାୟିକା), ଆମେଲିଆ କେର, ଇସି ୱଙ୍ଗ, ଅମନଜୋତ କୌର, ହୁମାଇରା କାଜି, ଜୋତିମଣି କାଲିତା, ସାଇକା ଇଶାକ ।

ଦିଲ୍ଲୀ କ୍ୟାପିଟାଲ୍ସ: ମେଗ ଲ୍ୟାନିଂ(ଅଧିନାୟିକା), ଶେଫାଳି ବର୍ମା, ଆଲିସ କ୍ୟାପ୍‌ସି, ଜେମିମା ରୋଡ୍ରିଗ୍ସ, ମରିଜାନ କାପ, ଜେନ ଜନାସେନ, ତାନିଆ ଭାଟିଆ, ଅରୁନ୍ଧତି ରେଡ୍ଡୀ, ରାଧା ଯାଦବ, ଶିଖା ପାଣ୍ଡେ, ପୁନମ ଯାଦବ ।