ନୂଆଦିଲ୍ଲୀ: ସାରା ଦୁନିଆରେ ସବୁଠୁ ଅଧିକ ବର୍ଷା ପାଇଁ ପ୍ରସିଦ୍ଧ ମେଘାଳୟର ମାସିନରାମ ଏବଂ ଚେରାପୁଞ୍ଜିରେ କମୁଛି ପାଣି । ଏହାଛଡା ୫୨ ବର୍ଷରେ ପ୍ରଥମ ଥର ପାଇଁ ଏଠାରେ ବିଜୁଳି ଉତ୍ପାଦନରେ ସଂକଟ ଦେଖାଦେଇଛି । ମାସିନରାମ ଏବଂ ଚେରାପୁଞ୍ଜିରେ ସର୍ବାଧିକ ବର୍ଷା ହୋଇଥାଏ । ମାସିନରାମରେ ବାର୍ଷିକ ୧୧,୮୭୧ ମିମି ବର୍ଷା ହୋଇଥାଏ ଏବଂ ଏହାଠାରୁ ୧୫ କିଲୋମିଟର ଦୂର ଚେରାପୁଞ୍ଜିରେ ବାର୍ଷିକ ହାରାହାରି ୧୧,୭୭୭ ମିମିର ବାର୍ଷା ହୋଇଥାଏ । ଚିନ୍ତାର ବିଷୟ ଏହା ଯେ ଗତ କିଛି ବର୍ଷ ମଧ୍ୟରେ ବର୍ଷାରେ ବଡ଼ ଧରଣ ହ୍ରାସ ଯୋଗୁଁ ଏଠାରେ ପାଣିର ମାତ୍ରା କମ ହୋଇଯାଇଛି । ଯାହାର ପ୍ରଭାବ ବିଜୁଳି ଉତ୍ପାଦନ ଉପରେ ପଡ଼ିଛି । ମେଘାଳୟରେ ବିଜୁଳିର ମୁଖ୍ୟ ସ୍ରୋତ ହେଉଛି ଜଳ ବିଦ୍ୟୁତ, ଯାହା ବର୍ଷା ପାଣି ଉପରେ ନିର୍ଭର କରୁଛି ।

ମେଘାଳୟର ମୁଖ୍ୟମନ୍ତ୍ରୀ କୋନରାଡ କେ.ସଙ୍ଗମା ନିଜେ ଏହି କଥା କହିଛନ୍ତି । ସେ ସ୍ୱୀକାର କରିଛନ୍ତି ଯେ ଯଦି ସ୍ଥିତି ଏପରି ଜାରି ରହେ ତେବେ ରାଜ୍ୟ ପାଇଁ ଜଟଳି ଦିନ ଆସିପାରେ । ସଙ୍ଗମା କହିଛନ୍ତି ଯେ ଗତ କିଛି ମାସରେ ଆମ ଏଠାରେ ବର୍ଷା ହୋଇ ନାହିଁ ଏବଂ ଯଦି ଏପରି ଜାରି ରୁହେ ତେବେ ମେଘାଳୟକୁ ଅଧିକ ଆର୍ଥିକ ସମସ୍ୟାର ସାମନା କରିବାକୁ ପଡ଼ିବ ।  

ମୁଖ୍ୟମନ୍ତ୍ରୀ ସଙ୍ଗମା କହିଛନ୍ତି ଯେ ମେଘାଳୟ ନିଜ ଲୋକଙ୍କୁ ବିଜୁଳି ଦେବା ପାଇଁ ପ୍ରତିଦିନ ତିନି କୋଟି ଟଙ୍କା ଅତିରିକ୍ତ ରାଶି ଖର୍ଚ୍ଚ କରୁଛି । ସେ କହିଛନ୍ତି ଯେ ଯଦି ଏହି ସ୍ଥିତି ଆହୁରି ୧୦୦ ଦିନ ଯାଏ ରହେ ତେବେ ବିଜୁଳି କିଣିବା ପାଇଁ ସରକାରଙ୍କୁ ଅତିରିକ୍ତ ୩୦୦ କୋଟି ଟଙ୍କା ଖର୍ଚ୍ଚ କରିବାକୁ ପଡିବ । ସେ ଖୁଲାସା କରିଛନ୍ତି, ‘ଗତ ଦୁଇ ବର୍ଷରେ ଏବଂ ଚଳିତ ବର୍ଷ, ଆମେ ବିଜୁଳି କିଣିବା ସହ ବିଭିନ୍ନ ଖର୍ଚ୍ଚ ପାଇଁ ହାରାହାରି ୬୦୦ କୋଟି ଟଙ୍କା ଖର୍ଚ୍ଚ କରୁଛୁ’।

Also Read: ଜୁନ ୧୫ ତାରିଖ ପର୍ଯ୍ୟନ୍ତ ତଦନ୍ତ ସାରିବାକୁ ପ୍ରତିଶ୍ରୁତି ଦେଲେ କେନ୍ଦ୍ରମନ୍ତ୍ରୀ, ସରିନି ଆନ୍ଦୋଳନ: ସାକ୍ଷୀ ମଲ୍ଲିକ