ବରଗଡ ୧୮|୧: ଜମୁଛି ବିଶ୍ବ ପ୍ରସିଦ୍ଧ ବରଗଡ ଧନୁଯାତ୍ରା । କୃଷ୍ଣଙ୍କ ଲୀଳାଖେଳାରେ ଗୋପପୁର ଉତ୍ସବମୁଖର ହୋଇଉଠିଥିବା ବେଳେ ମହାପ୍ରତାପୀ କଂସଙ୍କ ରାଜତ୍ବରେ ଥରହର ମଥୁରା ନଗରୀ । ସପ୍ତମ ଦିନରେ ଗୋପପୁରରେ ରାଧାକୃଷ୍ଣଙ୍କ ନାବକେଳୀ ଅନୁଷ୍ଠିତ ହୋଇଥିଲା । ଗୋପପୁର ଏବେ କୃଷ୍ଣ ପ୍ରେମରେ କୃଷ୍ଣମୟ ହୋଇପଡିଥିବାବଳେ ଯମୁନା ନଦୀ ପାରି ହୋଇ ମଥୁରା ନଗରୀକୁ ଦଧି ବିକ୍ରି କରିବାକୁ ଯାଉଛନ୍ତି ଗୋପାଙ୍ଗନାମାନେ । ମହାରାଜା କଂସ ନଗର ଭ୍ରମଣ, ରାଜ ଦରବାରରେ ନ୍ୟାୟ ବିଚାର ଦୃଶ୍ୟ ଅଭିନୀତ ହୋଇଥିଲା । ତେବେ ମହାରାଜା କଂସ କଳେବଳେ କୃଷ୍ଣଙ୍କୁ ହତ୍ୟା କରିବା ପାଇଁ ଯୋଜନା ପରେ ଯୋଜନା କରିଚାଲିଛନ୍ତି । ନିଜର ପିତାର ପ୍ରତିଶୋଧ ନେବା ପାଇଁ ଶଙ୍ଖଚୂଡ ସର୍ପ ମହାରାଜ କଂସଙ୍କ ସହିତ ସାକ୍ଷାତ କରିଛି । ପରେ କୃଷ୍ଣଙ୍କୁ ହତ୍ୟା କରିବା ପାଇଁ କଂସ ଶଙ୍ଖଚୂଡକୁ ଗୋପପୁର ପଠାଇଛନ୍ତି ।
{"id":75200}![](https://www.prameyanews7.com/wp-content/uploads/2019/01/vlcsnap-2019-01-18-10h11m35s525.jpg)
ସେହିପରି କୃଷ୍ଣବଳରାମ ବେନୀ ଭାଇଙ୍କୁ ନିମନ୍ତ୍ରଣ କରିବା ପାଇଁ ପୂର୍ବତନ ମନ୍ତ୍ରୀ ଅକୃରଙ୍କୁ ଗୋପପୁର ପ୍ରେରଣ କରିଥିଲେ ମହାରାଜା କଂସ । ସପ୍ତମ ଦିନରେ ଲକ୍ଷ ଲକ୍ଷ ଦର୍ଶକଙ୍କ ସମାଗମ ହୋଇଥିଲା । ଧନୁଯାତ୍ରାର ଅଷ୍ଟମ ଦିନରେ କଂସଙ୍କ ନଗର ଭ୍ରମଣ, ଦିଗବିଜୟରେ ବାହାରି ଇନ୍ଦ୍ର ସହିତ ଯୁଦ୍ଧ ଓ ବନ୍ଦୀ, କଂସଙ୍କ ଚିଟାଉ ନେଇ ଅକୃରଙ୍କ ଗମନ ଓ ଗୋପପୁରରେ ଅକୃରଙ୍କ ପ୍ରବେଶ ସହ ଯମୁନା ନଦୀରେ କୃଷ୍ଣ ପାଦ ଦର୍ଶନ ଏବଂ ଧନୁଯାତ୍ରା ଦେଖିଯିବା ପାଇଁ ନନ୍ଦରାଜାଙ୍କୁ କଂସଙ୍କ ଚିଟାଉ ହସ୍ତାନ୍ତର ଦୃଶ୍ୟ ଅଭିନୀତ ହେବ ।