ନୂଆଦିଲ୍ଲୀ: ଆଇପିଏଲ ଆଧାରରେ ବିସିସିଆଇ ମହିଳା ପ୍ରିମିୟର ଲିଗ ଅର୍ଥାତ୍ ଡବ୍ଲୁପିଏଲର ଆୟୋଜନ କରିବାକୁ ଯାଉଛି । ଡବ୍ଲୁପିଏଲର ପ୍ରଥମ ସଂସ୍କରଣ ଚଳିତ ବର୍ଷ ଆୟୋଜନ କରାଯିବ । ଏହାରି ଭିତରେ ଆଇପିଏଲ ଚେୟାରମ୍ୟାନ ଅରୁଣ ଧୁମଲ ଟୁର୍ଣ୍ଣାମେଣ୍ଟର ଆୟୋଜନ ଏବଂ କେଉଁ କେଉଁ ସ୍ଥାନରେ ମ୍ୟାଚ ଖେଳାଯିବ ସେ ନେଇ ଘୋଷଣା କରିଛନ୍ତି ।

ଆଇପିଏଲ ଚେୟାରମ୍ୟାନ ଅରୁଣ ଧୁମଲ କହିଛନ୍ତି ଯେ ପାଞ୍ଚ ଟିମଙ୍କ ଡବ୍ଲୁପିଏଲର ପ୍ରଥମ ମାର୍ଚ୍ଚ ୪ରେ ଖେଳାଯିବ, ମାର୍ଚ୍ଚ ୨୬ରେ ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ ଖେଳାଯିବ । ଏହାସହ ଟୁର୍ଣ୍ଣାମେଣ୍ଟର ସମସ୍ତ ମ୍ୟାଚ୍ ମୁମ୍ୱାଇରେ ଖେଳାଯିବ ବୋଲି ସେ ସୂଚନା ଦେଇଛନ୍ତି । ଉଲ୍ଲେଖଯୋଗ୍ୟ ଯେ ଏଥିରେ ମୁମ୍ୱାଇର ଗୋଟିଏ ଟିମ ରହିଛି ।

ଆଇପିଏଲ ଆରମ୍ଭ ହେବା ପୂର୍ବରୁ ବିସିସିଆଇ ଏହି ଟୁର୍ଣ୍ଣାମେଣ୍ଟ ଶେଷ କରିବାକୁ ଚାହୁଁଛି । ଏପରି ସ୍ଥିତିରେ ଆଇପିଏଲ ୨୦୨୩ ସଂସ୍କରଣ ମାର୍ଚ୍ଚ ୨୬ ପରେ ଆରମ୍ଭ ହୋଇପାରେ । ତେବେ ବର୍ତ୍ତମାନ ସୁଦ୍ଧା ଡବ୍ଲୁପିଏଲର ମେଗା ନିଲାମୀ ହୋଇ ନାହିଁ, ବର୍ତ୍ତମାନ ସୁଦ୍ଧା ଏଥିପାଇଁ ତାରିଖ ମଧ୍ୟ ଧାର୍ଯ୍ୟ ହୋଇ ନାହିଁ ।