ମୁମ୍ବାଇ,୧୩/୩: ମହିଳା ପ୍ରିମିୟର ଲିଗ୍ରେ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁର ଲଗାତାର ପରାଜୟ । ସ୍ମୃତି ମନ୍ଧନାଙ୍କ ନେତୃତ୍ତ୍ୱାଧୀନ ଦଳ କ୍ରମାନ୍ୱୟରେ ପଞ୍ଚମ ମ୍ୟାଚ୍ ପରାସ୍ତ ହୋଇଛି । ସୋମବାର ଅନୁଷ୍ଠିତ ମ୍ୟାଚ୍ରେ ରୟାଲ୍ ଚ୍ୟାଲେଞ୍ଜର୍ସ ୬ ୱିକେଟ୍ରେ ଦିଲ୍ଲୀ କ୍ୟାପିଟାଲ୍ସ ଠାରୁ ପରାଜିତ ହୋଇଛି।
ଡବ୍ଲ୍ୟୁପିଏଲ୍ ମ୍ୟାଚ୍ରେ ପ୍ରଥମେ ବ୍ୟାଟିଂ କରି ରୟାଲ ଚ୍ୟାଲେଞ୍ଜର୍ସ ୪ ୱିକେଟ୍ ହରାଇ ୧୫୦ ରନ୍ ସଂଗ୍ରହ କରିଥିଲା । ଜବାବରେ ଦିଲ୍ଲୀ କ୍ୟାପିଟାଲ୍ସ ୧୯.୪ ଓଭରରେ ୪ ୱିକେଟ୍ ହରାଇ ବିଜୟ ହାସଲ କରିଥିଲା । ଏହି ମ୍ୟାଚ୍ରେ ଟସ୍ ଜିତି ଦିଲ୍ଲୀ କ୍ୟାପିଟାଲ୍ସ ଫିଲ୍ଡିଂ ନିଷ୍ପତ୍ତି ନେଇଥିଲା । ରୟାଲ୍ ଚ୍ୟାଲେଞ୍ଜର୍ସର ଦୁଇ ଓପନର ସ୍ମୃତି ମନ୍ଧନା ଓ ସୋଫି ଡିଭାଇନ୍ ପ୍ରାରମ୍ଭରୁ ବିଫଳ ହୋଇଥିଲେ । ମନ୍ଧନା ୮ ଓ ସୋଫି ୨୧ ରନ କରି ଆଉଟ୍ ହୋଇଥିଲେ । ପ୍ରଥମ ୱିକେଟ୍ର ପତନ ପରେ ବ୍ୟାଟିଂ କରିବାକୁ ଆସିଥିବା ଏଲିସ ପେରୀ ଦୃଢ ବ୍ୟାଟିଂ ଜାରି ରଖି ଅର୍ଦ୍ଧଶତକ ଅର୍ଜନ କରିବା ଫଳରେ ଦଳୀୟ ସ୍କୋର ୧୫୦ରେ ପହଞ୍ଚିଥିଲା । ସେ ୫୨ଟି ବଲ୍ରୁ ୪ଚୌକା ଓ ୫ଛକା ବଳରେ ଅପରାଜିତ ୬୭ ରନ୍ କରିଥିଲେ । ସେହିପରି ହିଥର ନାଇଟ୍ ୧୧ ଓ ରିଚା ଘୋଷ ୧୬ଟି ବଲ୍ରୁ ଦ୍ରୁତ ୩୭ ରନ ସଂଗ୍ରହ କରିଥିଲେ । ପେରୀ ଓ ରିଚାଙ୍କ ମଧ୍ୟରେ ଚତୁର୍ଥ ୱିକେଟ୍ରେ ୭୪ ରନ୍ର ଭାଗିଦାରୀ ଗଠନ ହେବା ଫଳରେ ରୟାଲ୍ ଚ୍ୟାଲେଞ୍ଜର୍ସ ଲଢୁଆ ସ୍କୋର ସଂଗ୍ରହ କରିବାରେ ସଫଳ ହୋଇଥିଲା । ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଶିଖା ପାଣ୍ଡେ ୩ଟି ୱିକେଟ୍ ଅକ୍ତିଆର କରିଥିବାବେଳେ ଟାରା ନୋରିସ ଗୋଟିଏ ୱିକେଟ ନେଇଥିଲେ ।
ସେହିପରି ଦିଲ୍ଲୀ କ୍ୟାପିଟାଲ୍ସର ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟ ହୋଇଥିଲା । ୧ ରନ୍ରେ ପ୍ରଥମ ୱିକେଟ୍ ହରାଇଥିଲା ଦିଲ୍ଲୀ । ସେଫାଳି ବର୍ମା ଖାତା ଖୋଲିବା ପୂର୍ବରୁ ମେଗାନ ସ୍କଟଙ୍କ ବଲ୍ରେ ବୋଲ୍ଡ ହୋଇଥିଲେ । ଏହାପରେ ବ୍ୟାଟିଂ କରିବାକୁ ଆସିଥିବା ଆଲିସ କ୍ୟାପ୍ସୀ ଅପରାଜିତ ମେଗ ଲ୍ୟାନିଂଙ୍କ ସହ ମିଶି ଦଳୀୟ ସ୍କୋରକୁ ୪୫ରେ ପହଞ୍ଚାଇଥିଲେ । କ୍ୟାପ୍ସୀ ୨୪ଟି ବଲ୍ରୁ ୮ଚୌକା ବଳରେ ୩୮ ରନ୍ ସଂଗ୍ରହ କରି ଆଉଟ୍ ହୋଇଥିଲେ । ପରେ ଲ୍ୟାନିଂ ୧୫ ରନ୍ କରି ପାଭିଲିୟନ ଫେରିଥିଲେ । ପରେ ଜେମିମା ରୋଡ୍ରିଗ୍ସ ଓ ମାରିଜାନ କାପ୍ ଲଢୁଆ ବ୍ୟାଟିଂ କରି ଦଳୀୟ ସ୍କୋରକୁ ୧୦୯ରେ ପହଞ୍ଚାଇଥିଲେ । ଶେଷ ଓଭରରେ ଦଳକୁ ୯ରନ୍ ଆବଶ୍ୟକ ହେଉଥିଲା । ୨ଟି ବଲ୍ରେ ଜନାସେନ ଗୋଟିଏ ଛକା ଓ ଗୋଟିଏ ଚୌକା ମାରି ଦଳକୁ ବିଜୟୀ କରାଇଥିଲେ ।
