ନୂଆଦିଲ୍ଳୀ, ୧୨/୦୨: ଦେଶର ଅଧିକାଂଶ ମହିଳା ବିନା ଦରମାରେ ଘରୋଇ କାମ କରିବାରେ ଅଧିକ ସମୟ ବିତାଉଛନ୍ତି। ନିକଟରେ ହୋଇଥିବା ଏକ ଗବେଷଣାରୁ ଏଭଳି କିଛି ତଥ୍ୟ ସାମ୍ନାକୁ ଆସିଛି। ଆଇଆଇଏମ ଅହମଦାବାଦର ପ୍ରଫେସରଙ୍କ ଦ୍ବାରା କରାଯାଇଥିବା ଏକ ଗବେଷଣା ଅନୁଯାୟୀ, ୧୫ ରୁ ୬୦ ବର୍ଷର ବୟସ ବର୍ଗର ମହିଳା ବିନା ଦରମାରେ ଘରୋଇ କାମ କରୁଥିବା ପୁରୁଷଙ୍କ ତୁଳନାରେ ଅଧିକ ସମୟ କାମ କରୁଛନ୍ତି।
ରିସର୍ଚ୍ଚ ଅନୁଯାୟୀ ପୁରୁଷ ୨.୮ ଘଣ୍ଟା କାମ କରୁଥିବାବେଳେ ମହିଳା ୭.୨ ଘଣ୍ଟା କାମ କରୁଛନ୍ତି। ଟାଇମ୍ ନ୍ୟୁଜ୍ ସର୍ଭେ ଆଧାରରେ କୁହାଯାଇଛି ଯେ ମୁଲ ଲାଗି ରୋଜଗାର କରୁଥିବା ମହିଳା ଘରର ସଫେଇ, ରୋଷେଇ ଏବଂ ଯତ୍ନ ନେବା ଭଳି ଆବଶ୍ୟକୀୟ କାମକୁ ପୂରଣ କରିବାରେ ପୁରୁଷଙ୍କ ତୁଳନାରେ ଘରୋଇ କାମରେ ଦୁଇଗୁଣା ସମୟ ଖର୍ଚ୍ଚ କରୁଛନ୍ତି।
ଆଇଆଇଏ ଅହମଦାବାଦର ପ୍ରଫେସର ନମ୍ରତା ଚିନ୍ଦାରକରଙ୍କ ଅନୁଯାୟୀ, ’ଟାଇମ୍ ୟୁଜ୍ ଡାଟା: ଏ ଟୁଲ୍ ଫର ଜେଣ୍ଡର୍ ପଲିସି ଆନାଲିସିସ୍’ ଦ୍ବାରା ପ୍ରଥମ ଏହା ଜାଣିବାକୁ ମିଳିଛି ଭାରତରେ ମହିଳା ଘରୋଇ କାମ ଉପରେ କେତେ ସମୟ ଖର୍ଚ୍ଚ କରୁଛନ୍ତି। ହାରାହାରି ଭାରତୀୟ ମହିଳା ନିଜର ଦୈନିକ ସମୟରୁ ୭.୨ ଘଣ୍ଟା ଖର୍ଚ୍ଚ କରିଥାନ୍ତି। ଯେତେବେଳେକି ଏଭଳି କାମ ପାଇଁ ପୁରୁଷ ୨.୮ ଘଣ୍ଟା ଖର୍ଚ୍ଚ କରିଥାନ୍ତି ବୋଲି କହିଛନ୍ତି ନମ୍ରତା ଚିଦାରକର।
ପ୍ରଫେସର ଚିଦାରକର କହିଛନ୍ତି ଲିଙ୍ଗଗତ ଅସମାନତାର ଯାଞ୍ଚ କରିବା ପାଇଁ ଏକ ଉପକରଣ ରୂପରେ ଏହି ରିସର୍ଚ୍ଚ ବେଶ୍ ଉପଯୋଗୀ। ସେ କହିଛନ୍ତି ଯେ ୟୁରୋପରେ କରାଯାଇଥିବା ହାର୍ମୋନାଇଜ୍ଡ ଟାଇମ ୟୁଜ୍ ସର୍ଭେ ଉପରେ ଆଧାରିତ ଅଧ୍ୟୟନରୁ ଜଣାପଡ଼ିଛି ଯେ ଟାଇମ ୟୁଜ୍ ବିଭିନ୍ନ ଗତିବିଧିରେ ମହିଳା ଏବଂ ପୁରୁଷଙ୍କ ମଧ୍ୟରେ ସମୟ ଆବଣ୍ଟନକୁ ବୁଝିବାରେ ସହାୟକ ହୋଇଛି। ଏହି ଅଧ୍ୟୟନରୁ ବିଶେଷ ଭାବରେ ଜଣାପଡ଼ିଛି ଦେଶରେ ମହିଳା ଘରର ମୌଳିକ କାମ ଯେମିତିକି ସଫେଇ, ରୋଷେଇ କରିବା ଏବଂ ପିଲାଙ୍କ ଯତ୍ନ ଭଳି କାମ କରିବାରେ ଅଧିକ ସମୟ ବିତାଇଥାନ୍ତି।
ପ୍ରଫେସର ଚିଦାରକର ଆହୁରି କହିଛନ୍ତି ୨୦୧୯ରେ ଏନଏସଏସଓ ଦ୍ବାରା ଆୟୋଜିତ ଟିୟୁଏସ ଭାରତ ପାଇଁ ପ୍ରଥମ ରାଷ୍ଟ୍ରୀୟ ସମୟ ଉପଯୋଗ ସର୍ବେକ୍ଷଣ। ଏଥିରେ ଆହୁରି ଜଣା ପଡ଼ିଛି ଯେ ଶ୍ରମିକ ଭାବରେ କାମ କରୁଥିବା ମହିଳା ମଧ୍ୟ ମୂଲ ଲାଗୁଥିବା ପୁରୁଷଙ୍କ ତୁଳନାରେ ଅବୈତନିକ ଘରୋଇ କାମରେ ଦୁଇଗୁଣା ସମୟ ବିତାଉଥାନ୍ତି। ଏହି ଅଧ୍ୟୟନରୁ ଏହା ମଧ୍ୟ ଜଣାପଡ଼ିଛି ଯେ ମହିଳାଙ୍କ ତୁଳନାରେ ପୁରୁଷ ପ୍ରତିଦିନ ରୋଜଗାର ପାଇଁ ପ୍ରାୟ ୧୫୦ ମିନିଟ୍ରୁ ଅତିରିକ୍ତ ଖର୍ଚ୍ଚ କରିଥାନ୍ତି।
ପ୍ରଫେସର ଚିଦାରକର କହିଛନ୍ତି ଜାଣିବାକୁ ମିଳିଥିଳା ପୁରୁଷଙ୍କ ତୁଳନାରେ ମହିଳାଙ୍କ ପାଖରେ ଫୁରସତ ମଧ୍ୟ ୨୪ ପ୍ରତିଶତ କମ୍ ଥାଏ। ଏହାର ବିପରୀତ ବେତନ ପାଉଥିବା ପୁରୁଷ, ବେତନ ପାଉଥିବା ମହିଳାଙ୍କ ତୁଳନାରେ ୭୨ ପ୍ରତିଶତ ଅଧିକ କାମ କରିବାର ସମ୍ଭାବନା ରହିଛି ଯାହା ପ୍ରଶଂସନୀୟ ହୋଇପାରେ।
