ନୂଆଦିଲ୍ଲୀ, ୧୮/୦୨: ଆସନ୍ତା ବର୍ଷ ୨୦୨୪ ସାଧାରଣ ନିର୍ବାଚନ ପାଇଁ ବିରୋଧୀ ପ୍ରସ୍ତୁତ ହେଉଛନ୍ତି। ନିର୍ବାଚନ ପୂର୍ବରୁ ବିରୋଧୀ ଏକାଠି ହେବା ନେଇ ମଧ୍ୟ କୁହାଯାଉଛି। ଏହାରି ମଧ୍ୟରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଶନିବାର କହିଛନ୍ତି କଂଗ୍ରେସକୁ ରାହୁଲ ଗାନ୍ଧୀଙ୍କ ‘ଭାରତ ଯୋଡ଼ୋ ଯାତ୍ରା’ ରୁ ସୃଷ୍ଟି ହୋଇଥିବା ମାହୋଲର ଲାଭ ଉଠାଯିବା ଦରକାର। ଏହି ସମୟରେ ଭାଜପା ବିରୋଧୀ ଦଳ ଏକାଠି ହୋଇ ମେଣ୍ଟ ଗଠନ କରିବା ଦରକାର। ସେପଟେ ନୀତୀଶଙ୍କ ବୟାନକୁ ନେଇ ପ୍ରତିକ୍ରିୟା ଦେବା ସହ କଂଗ୍ରେସର ବରିଷ୍ଠ ନେତା ସଲମାନ ଖୁର୍ସିଦ କହିଛନ୍ତି ବର୍ତ୍ତମାନ ପ୍ରଶ୍ନ ଉଠୁଛି ଯେ ବିରୋଧୀ ଏକାଠି ହେବା ପାଇଁ ପ୍ରଥମେ କିଏ ସାମ୍ନାକୁ ଆସୁଛି।

ମେଣ୍ଟ ଗଠନ କରିବା ଏବଂ ଭାଜପାର ମୁକାବିଲା କରିବା ଉପରେ କଂଗ୍ରେସର ଉଦ୍ଦେଶ୍ୟକୁ ନେଇ ଖୁର୍ସିଦ ଶନିବାର କହିଛନ୍ତି ଯେ ଏବେ ପ୍ରଶ୍ନ ଉଠୁଛି ଯେ କିଏ ପ୍ରଥମେ ‘ଆଇ ଲଭ୍‌ ୟୁ କହୁଛି। ପୂର୍ବ କେନ୍ଦ୍ରମନ୍ତ୍ରୀ ସଲମାନ ଖୁର୍ସିଦ ମଧ୍ୟ ସେହି କାର୍ଯ୍ୟକ୍ରମରେ କହୁଥିଲେ ଯେଉଁଥିରେ ମୁଖ୍ୟମନ୍ତ୍ରୀ ନୀତୀଶ କୁମାର ଏବଂ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ମଧ୍ୟ ଭାଗ ନେଇଥିଲେ।

ଭାକପା ମାଲେ ଦ୍ବାରା ‘‘ ସମ୍ବିଧାନ ବଞ୍ଚାଅ, ଗଣତନ୍ତ୍ର ବଞ୍ଚାଅ, ଦେଶ ବଞ୍ଚାଅ’’ ଶୀର୍ଷକ ଆୟୋଜିତ ଅଖିଳ ଭାରତୀୟ ସମ୍ମିଳନୀକୁ ସମ୍ବୋଧନ କରି ଜନତା ଦଳ ୟୁନାଇଟେଡ୍‌ ସୁପ୍ରିମୋ ନୀତୀଶ କୁମାର କହିଛନ୍ତି ଯେ ବିରୋଧୀ ଦଳଙ୍କୁ ଯଥାଶୀଘ୍ର ଏକାଠି ହୋଇଯିବା ଦରକାର ଫଳରେ ଲୋକସଭରେ ୩୦୦ ରୁ ଅଧିକ ସିଟ୍ ଥିବା ଭାଜପାକୁ ଆଗାମୀ ବର୍ଷରେ ହେବାକୁ ଥିବା ନିର୍ବାଚନରେ ୧୦୦ ରୁ ଅଧିକ ସିଟ୍‌ରେ ହରାଯାଇପାରିବ।

ଖୁର୍ସିଦ ନୀତୀଶ କୁମାରଙ୍କ ଭାଷଣରେ ପ୍ରତିକ୍ରିୟା ରଖି କହିଛନ୍ତି ‘ ଆମେ ମଧ୍ୟ ସେହିଭଳି ଚାହୁଛୁ। କିନ୍ତୁ ସ୍ଥିତି ଦୁଇ ପ୍ରେମୀଙ୍କ ଭଳି ହୋଇଯାଇଛି ଯେଉଁମାନେ ନିଜ ସମୟ ଏଥିରେ ଲଗାଉଛନ୍ତି ଯେ କିଏ ଆଗେ ଆଇ ଲଭ୍‌ ୟୁ କହିବ।’ ଖୁର୍ସିଦଙ୍କ ଏହି କଥା ଶୁଣି ସେଠାରେ ଉପସ୍ଥିତ ଥିବା ଲୋକେ ମଧ୍ୟ ହସିବାକୁ ଲାଗିଥିଲେ।