ନୂଆଦିଲ୍ଲୀ: ନରେନ୍ଦ୍ର ମୋଦୀ ତୃତୀୟ ଥର ପ୍ରଧାନମନ୍ତ୍ରୀ ଭାବେ ଶପଥ ନେବା ପରେ ଦାୟିତ୍ୱ ସମ୍ଭାଳିଛନ୍ତି । ପରିଣାମ ଆସିବାର ଚାରି ଦିନ ପରେ ରବିବାର ୭୨ ମନ୍ତ୍ରୀଙ୍କ ପୂର୍ଣ୍ଣ ମନ୍ତ୍ରିମଣ୍ଡଳର ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇଥିଲା । ତେବେ ଏବେ ବି ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନ ରହିଛି- ଲୋକସଭା ବାଚସ୍ପତି ପଦ କାହାକୁ ମିଳିବ ? ଅନେକ ରିପୋର୍ଟରେ ଦାବି କରାଯାଉଛି ଯେ ଏନଡିଏର ଗୁରୁତ୍ୱପୂର୍ଣ୍ଣ ସହଯୋଗୀ ଟିଡିପି ଏବଂ ଜେଡିୟୁ ଉଭୟ ଏହି ପଦ ଉପରେ ନଜର ରଖିଛନ୍ତି । କିନ୍ତୁ ବିଜେପି ସୂତ୍ର ଅନୁସାରେ ପାର୍ଟି ଏହି ପଦ ଅନ୍ୟ କାହାକୁ ଛାଡ଼ିବାକୁ ପ୍ରସ୍ତୁତ ନାହିଁ ।
ସମ୍ୱିଧାନ ଅନୁସାରେ, ନୂଆ ଲୋକସଭାର ପ୍ରଥମ ବୈଠକ ପୂର୍ବରୁ ଅଧ୍ୟକ୍ଷ ପଦ ଖାଲି ହୋଇଥାଏ । ରାଷ୍ଟ୍ରପତିଙ୍କ ଦ୍ୱାରା ନିଯୁକ୍ତ ପ୍ରୋଟେମ୍ ବାଚସ୍ପତି ନୂଆ ସାଂସଦଙ୍କୁ ପଦର ଶପଥ ପାଠ କରାଇବେ । ଏହାପରେ ଲୋକସଭା ଅଧ୍ୟକ୍ଷର ନିର୍ବାଚନ ସାଧାରଣ ବହୁମତରେ ହୋଇଥାଏ । ଲୋକସଭା ଅଧ୍ୟକ୍ଷ ହେବା କୌଣସି ସ୍ୱତନ୍ତ୍ର ମାନଦଣ୍ଡ ନାହିଁ, କିନ୍ତୁ ଏଥିପାଇଁ ସମ୍ୱିଧାନ ଏବଂ ସଂସଦୀୟ ନିୟମ ଜାଣିଥିବା ଦରକାର । ଗତ ଦୁଇଟି ଲୋକସଭାରେ ବିଜେପିକୁ ସ୍ପଷ୍ଟ ବହୁମତ ମିଳିଥିଲା ଏବଂ ପାର୍ଟି ସୁମିତ୍ରା ମହାଜନ ଏବଂ ଓମ୍ ବିର୍ଲାଙ୍କ ବାଚସ୍ପତି କରିଥିଲା ।
ଲୋକସଭା ବାଚସ୍ପତି ଏକ ସାମ୍ୱିଧାନିକ ପଦ ଅଟେ । ଲୋକସଭା ବାଚସ୍ପତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ । ସଂସଦର ତାଙ୍କର ଭୂମିକା ନିର୍ଣ୍ଣାୟକ ହୋଇଥାଏ । ଏନ୍ ଚନ୍ଦ୍ରବାବୁ ନାଇଡୁ ଏବଂ ନୀତୀଶ କୁମାର ଲୋକସଭା ଅଧ୍ୟକ୍ଷ ପଦ ଚାହୁଁଛନ୍ତି । ଗତ କିଛି ବର୍ଷରେ ଶାସକ ଦଳଗୁଡ଼ିକ ଭିତରେ ମତଭେଦର ଅନେକ ମାମଲା ସାମନାକୁ ଆସିଛି, ଯେଉଁଥି ପାଇଁ ପାର୍ଟିଗୁଡ଼ିକ ମଧ୍ୟରେ ବିବାଦ ହୋଇଥିଲା ଏପରି କି ସରକାର ମଧ୍ୟ ଭାଙ୍ଗିଥିଲା । ଏପରିସ୍ଥଳେ ଦଳ-ବଦଳ ବିରୋଧୀ ଆଇନ ଲାଗୁ ହୋଇଥାଏ । ଏହି ଆଇନ ଲୋକସଭା ଅଧ୍ୟକ୍ଷଙ୍କୁ ଅଧିକ ଶକ୍ତି ଦେଇଥାଏ । ଆଇନ ଅନୁସାରେ, ଲୋକସଭା ଅଧ୍ୟକ୍ଷଙ୍କ ପାଖରେ ଦଳ-ବଦଳ ଆଧାରରେ ସଦସ୍ୟଙ୍କ ଅଯୋଗ୍ୟତା ସମ୍ପର୍କିତ ମାମଲାରେ ନିଷ୍ପତ୍ତି ନେବାର ପୂର୍ଣ୍ଣ ଅଧିକାର ରହିଛି । ଉଲ୍ଲେଖଯୋଗ୍ୟ ଯେ ନୀତୀଶ କୁମାର ପୂର୍ବରୁ ବି ବିଜେପି ଉପରେ ନିଜ ଦଳ ଭାଙ୍ଗିବା ନେଇ ଅଭିଯୋଗ ଆଣିସାରିଛନ୍ତି । ଏଥିପାଇଁ ସେ କୌଣସି ବିଦ୍ରୋହ ସ୍ଥିତିରେ ବାଚସ୍ପତି ପଦକୁ ଢାଲ କରିପାରିବା ପାଇଁ ଚାହୁଛନ୍ତି । ସେପଟେ ବିଜେପି ଏହି ଗୁରୁତ୍ୱପୂର୍ଣ୍ଣ ପଦକୁ ନିଜ ପାଖରେ ରଖିବାକୁ ଚାହୁଁଛି ।
