ନୂଆଦିଲ୍ଲୀ ୧୨।୮: ମଙ୍କିପକ୍ସ ସଂକ୍ରମଣ ମାଙ୍କଡ ସହିତ ଜଡିତ ନୁହେଁ ବୋଲି ବିଶ୍ବ ସ୍ବାସ୍ଥ୍ୟ ସଂଗଠନ କହିଛି । ବ୍ରାଜିଲରେ ମାଙ୍କଡଙ୍କ ଉପରେ ହେଉଥିବା ଆକ୍ରମଣ ପରେ ଡବ୍ଲୁଏଚଓ ଏଭଳି ସ୍ପଷ୍ଟୀକରଣ ରଖିଛି । ବର୍ତ୍ତମାନ ମଙ୍କିପକ୍ସ ଦ୍ବାରା ଅଧିକ ପ୍ରଭାବିତ ହୋଇଥିବା ଦେଶ ହେଉଛି ବ୍ରାଜିଲ । ଦେଶରେ ମଙ୍କିପକ୍ସ ଯୋଗୁଁ ଜଣେ ବ୍ୟକ୍ତିଙ୍କର ମଧ୍ୟ ମୃତ୍ୟୁ ଘଟିଛି । ମଙ୍କିପକ୍ସ ଯୋଗୁଁ ସ୍ପେନ ଏବଂ ଭାରତରେ ଜଣେ ଲେଖାଏଁ ରୋଗୀଙ୍କର ମୃତ୍ୟୁ ହୋଇଛି ।
ବିଶ୍ବ ସ୍ବାସ୍ଥ୍ୟ ସଂଗଠନର ମୁଖପାତ୍ର ମାର୍ଗରେଟ୍ ହାରିସ୍ ଜେନେଭାରେ କହିଛନ୍ତି ଯେ, ଏହି ରୋଗ ବ୍ୟାପିବା ପାଇଁ ମାଙ୍କଡମାନଙ୍କୁ ଦାୟୀ କରାଯାଇପାରିବ ନାହିଁ । ଲୋକମାନେ ଏହା ଜାଣିବା ଆବଶ୍ୟକ ଯେ, ଭାଇରସ୍ ବିସ୍ତାର କେବଳ ମନୁଷ୍ୟମାନଙ୍କ ମଧ୍ୟରେ ହେଉଛି । ବ୍ରାଜିଲର ନ୍ୟୁଜ୍ ଓ୍ବେବସାଇଟ୍ ଜି୧ ଦ୍ବାରା ପ୍ରସ୍ତୁତ ରିପୋର୍ଟରେ ଦର୍ଶାଯାଇଥିଲା ଯେ, ସାଓ ପାଓଲୋ ରାଜ୍ୟର ସାଓ ଜୋସ୍ ଡୋ ରିୟୋ ପ୍ରେଟୋ ସହରରେ ସପ୍ତାହକ ମଧ୍ୟରେ ୧୦ଟି ମାଙ୍କଡକୁ ବିଷ ଦିଆଯାଇଥିଲା । ଏହା ପରେ ଡବ୍ଲୁଏଚଓର ଏଭଳି ବୟାନ ଆସିଛି ।
ହ୍ୟାରିସ୍ ଆହୁରି କହିଛନ୍ତି ଯେ, ମଙ୍କିପକ୍ସ ଭାଇରସ୍ ପଶୁମାନଙ୍କଠାରୁ ମନୁଷ୍ୟ ଶରୀରକୁ ବ୍ୟାପିପାରେ, କିନ୍ତୁ ବର୍ତ୍ତମାନ ଏହା ମନୁଷ୍ୟଠାରୁ ମନୁଷ୍ୟ ମଧ୍ୟରେ ସୀମିତ ରହିଛି । ଏଥିପାଇଁ ଲୋକମାନେ କୌଣସି ପଶୁ ଉପରେ ଆକ୍ରମଣ କରିବା ଉଚିତ ନୁହେଁ । କୌଣସି ସଂକ୍ରମିତ ବ୍ୟକ୍ତି ଏହି ସଂକ୍ରମଣକୁ ବଢାଇପାରେ । ଏଥିପାଇଁ କୌଣସି ପ୍ରାଣୀ କିମ୍ବା ମନୁଷ୍ୟକୁ ଦାୟୀ କରନ୍ତୁ ନାହିଁ ।
