ନୂଆଦିଲ୍ଲୀ ୫।୬: ଲୋକସଭା ନିର୍ବାଚନ ୨୦୨୪ର ଫଳାଫଳ ଘୋଷଣା ହୋଇଗଲାଣି। ନିର୍ବାଚନ ଆୟୋଗ ୫୪୨ ଆସନରୁ ଅଧିକାଂଶ ଆସନର ରେଜଲ୍ଟ ଘୋଷଣା କରିଦେଇଛନ୍ତି। ହେଲେ ଏବେ ପ୍ରଶ୍ନ ଉଠୁଛି ଦେଶର ୫୪୨ ସଂସଦୀୟ କ୍ଷେତ୍ରରୁ ଯେଉଁ ସାଂସଦ ବିଜୟୀ ହୋଇ ଲୋକସଭାକୁ ଯାଉଛନ୍ତି ସେମାନଙ୍କୁ ବେତନ, ଭତ୍ତା ଓ କେଉଁ କେଉଁ ସୁଯୋଗ ମିଳୁଛି। ତେବେ ଆସନ୍ତୁ ଜାଣିବା ଜଣେ ସାଂସଦଙ୍କୁ କେତେ ବେତନ, ଭତ୍ତା, ସୁବିଧା ଓ ସୁରକ୍ଷା ମିଳୁଛି।
ସାଂସଦଙ୍କୁ ବେତନ ସହିତ ଅନେକ ପ୍ରକାରର ସୁବିଧା ଓ ସୁଯୋଗ ମିଳିଥାଏ। ଉଲ୍ଲେଖଯୋଗ୍ୟ ଯେ ସଂସଦ ସଦସ୍ୟଙ୍କୁ ଅଧିନିୟମ ୧୯୫୪ ଅନୁସାରେ ବେତନ ଓ ଅନେକ ସୁବିଧା ଦିଆଯାଇଥାଏ। ସୂଚନା ଅନୁସାରେ ସାଂସଦଙ୍କୁ ମାସିକ ୧ଲକ୍ଷ ଟଙ୍କା ବେତନ ମିଳେ, ଏହା ଛଡା ୧ ଏପ୍ରିଲ ୨୦୨୩ରେ ଏକ ନୂଆ ନିୟମ ଲାଗୁ କରାଯାଇଥିଲା, ଏହି ନିୟମ ଅନୁସାରେ ସାଂସଦଙ୍କ ବେତନ ଓ ଭତ୍ତା ପ୍ରତି ୫ ବର୍ଷରେ ବଢିବ। ସେହିପରି ଜଣେ ସାଂସଦଙ୍କୁ କୌଣସି କମିଟି ବୈଠକରେ ଯୋଗ ଦେବାକୁ ସଂସଦ ସମ୍ପର୍କିତ କୌଣସି ପ୍ରକାର ଯାତ୍ରା ନିମନ୍ତେ ଅଲଗା ଭତ୍ତା ଦିଆଯାଏ।
ସାଂସଦଙ୍କୁ ଏକ ପାସ୍ ଦିଆଯାଏ, ଏହି ପାସ୍ ଦ୍ୱାରା ସାଂସଦ ଯେ କୌଣସି ସମୟରେ ନିଶୁଳ୍କ ରେଳଯାତ୍ରା କରିପାରିବେ। ଏହି ପାସ୍ କୌଣସି ଟ୍ରେନର ଫାର୍ଷ୍ଟକ୍ଲାସ୍ ଏସି ବା ଏକଜ୍ୟୁକୁଟିଭ କ୍ଲାସ୍ ନିମନ୍ତେ ମାନ୍ୟ ହୋଇଥାଏ। ଏହା ଛଡା ପ୍ରତି ସଂସଦ ସଦସ୍ୟଙ୍କୁ ମେଡିକାଲ ସୁବିଧା ମଧ୍ୟ ଦିଆଯାଏ। ଏହା ଛଡା ସାଂସଦଙ୍କୁ ସରକାରୀ ଖର୍ଚ୍ଚରେ ସୁରକ୍ଷା କର୍ମୀ ଓ କେୟାର ଟେକର ମଧ୍ୟ ମିଳିଥାଏ। ସେହିପରି ସାଂସଦଙ୍କୁ ରାଜଧାନୀ ଦିଲ୍ଲୀରେ ନିଶୁଳ୍କ ଆବାସ ଓ ବିଦ୍ୟୁତ, ପାଣି ମଧ୍ୟ ଯୋଗାଇ ଦିଆଯାଏ। ସାଂସଦଙ୍କୁ ୩ ମୋବାଇଲ, ଇଣ୍ଟରନେଟ୍ ଡାଟା, ଫୋନ ଓ ୧,୫୦,୦୦୦ ମାଗଣା କଲ ସୁବିଧା ମଧ୍ୟ ଦିଆଯାଏ।