ନୂଆଦିଲ୍ଲୀ ୦୨।୦୩ : ଆମାଜନ ଘଞ୍ଚ ଜଙ୍ଗଲରେ ଦୀର୍ଘ ଏକମାସ ଧରି ଫସି ରହିଲେ ଯୁବକ । ପ୍ରାୟ ୩୧ ଦିନ ଧରି ଘୂରି ବୁଲିବା ପରେ ବଲିଭିଆରୁ ଉଦ୍ଧାର ହେଲେ ୩୦ ବର୍ଷିୟ ଯୁବକ ଜୋନାଥନ୍ ଅକୋଷ୍ଟା। ସେ ଜଙ୍ଗଲକୁ ସାଙ୍ଗମାନଙ୍କ ସହ ଯାଇଥିବା ବେଳେ ହଠାତ୍ ଘଞ୍ଚ ଜଙ୍ଗଲରେ ହୋଇଯାଇଥିଲେ ବାଟବଣା । ଯାହାପରେ ପଡିଯାଇଥିଲେ ଅକଡରେ । ଏମିତିକି ଜଙ୍ଗଲରେ ତାଙ୍କୁ ନା ମିଳିଥିଲା ଖାଦ୍ୟ ନା ଥିଲା ପାଣି । ବଞ୍ଚିବା ପାଇଁ ଜିଆ ଠାରୁ ଆରମ୍ଭ କରି ଖାଉଥିଲେ କୀଟପତଙ୍ଗ । ଶୋଷ ମେଣ୍ଟାଇବା ପାଇଁ ଜୋତାରେ ପାଣି ରଖି ପିଇବା ଛଡା ତାଙ୍କ ପାଖରେ ନଥିଲା କୌଣସି ବିକଳ୍ପ ।  ଏମିତିକି ବଞ୍ଚିବା ପାଇଁ ପିଇବାକୁ ପଡିଥିଲା ପରିସ୍ରା ।

ଅକୋଷ୍ଟାଙ୍କ କହିବା ଅନୁଯାୟୀ, ସେ ଏବଂ ତାଙ୍କର ୪ଜଣ ସାଙ୍ଗ ଜଙ୍ଗଲକୁ ଯାଇଥିଲେ । କିନ୍ତୁ ସେ ଜାନୁଆରୀ ୨୫ରେ ସାଙ୍ଗମାନଙ୍କଠାରୁ ଅଲଗା ହୋଇଯାଇଥିଲେ । ବାଟବଣା ହୋଇ ସେ ଜଙ୍ଗଲ ମଧ୍ୟକୁ ଚାଲିଯାଇଥିଲେ ୪୦ରୁ ଅଧିକ କିଲୋମିଟର । ଏହି ସମୟରେ ତାଙ୍କୁ ଅନେକ ଜୀବଜନ୍ତୁ ଆକ୍ରମଣ କରିଥିଲେ, କିନ୍ତୁ ସେ କୌଶଳକ୍ରମେ ଖସିଆସିଥିଲେ । ସେହି ଜଙ୍ଗଲରେ ବଞ୍ଚିବା ପାଇଁ କରାଯାଇଥିବା ସଙ୍ଘର୍ଷ ତାଙ୍କୁ ବେଶ୍ ସହାୟକ ହୋଇଥିଲା ।

ଅକୋଷ୍ଟାଙ୍କ ପରିବାର ଆଶା ହରାଇ ନଥିଲେ ଏବଂ ତାଙ୍କୁ ଖୋଜି ଉଦ୍ଧାର କରିଥିଲେ । ଖବର ଅନୁଯାୟୀ ଯୁବକ ଜଣକ ସାହାଯ୍ୟ ପାଇଁ ଚିତ୍କାର କରୁଥିବାର ଶୁଣିଥିଲେ ଏକ ସର୍ଚ୍ଚ ପାର୍ଟି ।  ଏହି ସମୟରେ ଯୁବକଙ୍କୁ ଦେଖି ଡରିଯାଇଥିଲେ ସର୍ଚ୍ଚ ପାର୍ଟି । କାରଣ ତାଙ୍କର ରୂପ ବହୁତ ବଦଳି ଯାଇଥିଲା ।