ଏଥର ରଜରେ କୋହଲା ପାଗ । ଠାଏ ଠାଏ ପ୍ରବଳ ବର୍ଷା ହୋଇପାରେ । ୧୪ ତାରିଖ ବେଳକୁ ମୌସୁମୀ ବର୍ଷାର ପରିମାଣ ଟିକିଏ କମିଯିବ । ୧୫ ଓ ୧୬ ବେଳକୁ ପାଗ ଶୁଖିଲା ରହିବା ସହ ଆକାଶ ମେଘାଚ୍ଛନ ରହିପାରେ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ମୌସୁମୀ ଏବେ ସୁଦ୍ଧା ଦକ୍ଷିଣ ଓଡିଶା ଜିଲ୍ଲା ସମେତ ଉପକୂଳ ଓଡିଶାର କିଛି ଅଂଶକୁ ଛୁଇଁଛି । ମାଲକାନଗିରି, କୋରାପୁଟ, କଳାହାଣ୍ଡି, ନବରଙ୍ଗପୁର, ଗଜପତି ଜିଲ୍ଲାରେ ମୌସୁମୀ ପହଞ୍ଚିସାରିଛି । ସେହିପରି ଗଞ୍ଜାମ, ଖୋର୍ଦ୍ଧା, ପୁରୀ, ନୟାଗଡ ଜିଲ୍ଲାର କିଛି ଅଂଶରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ପ୍ରବେଶ କରିଛି । ସେପଟେ ଦକ୍ଷିଣ-ପଶ୍ଚିମ ବଙ୍ଗୋପସାଗରରେ ସୃଷ୍ଟ ଲଘୁଚାପ ଧିରେ ଧିରେ ଘନୀଭୂତ ହେଉଛି । ଏହାର ପ୍ରଭାବ ମୌସୁମୀ ଉପରେ ଅନୁଭୂତ ହେବାର ସମ୍ଭାବନା ରହିଛି । ତେଣୁ ୨୪ ଘଣ୍ଟା ମଧ୍ୟରେ ଏହି ଜିଲ୍ଲା ଗୁଡିକୁ ପୁରା ପ୍ରବେଶ କରିବ ମୌସୁମୀ । ଆଜି ଓ ଆସନ୍ତା କାଲି ଉପକୂଳ ଓଡିଶା ସମେତ ଉତ୍ତର ଓଡିଶାରେ ମୌସୁମୀ ବର୍ଷା ହେବାର ସମ୍ଭାବନା ରହିଛି । ଆକାଶ ମେଘାଚ୍ଛନ ରହିବା ସହ ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି ଆଞ୍ଚଳିକ ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି ।