ଭୁବନେଶ୍ୱର ୨୮/୦୧: ଶୀତ ଗାଏବ । ଗରମ ମାଡ଼ି ଆସିଲାଣି । ଦିନରେ ଟାଏଁ ଟାଏଁ ଖରା, ରାତିରେ ବି ବିନା ପଙ୍ଖାରେ ନିଦ ହେଉନି । ମାଘ ମାସରେ ଏମିତି ଅସ୍ବାଭାବିକ ଗରମ ନାକେଦମ କଲାଣି ।
ଏବେଠାରୁ ଦିନ ତାପମାତ୍ରା ୩୫ଡିଗ୍ରୀ ଛୁଇଁଲାଣି । ଆଗକୁ କିଭଳି ଅସହ୍ୟ ଗରମ ହେବ ତାକୁ ନେଇ ଚିନ୍ତା ବଢିଲାଣି । ଆଞ୍ଚଳିକ ପାଣିପାଗ କେନ୍ଦ୍ରକ ସୂଚନା ମୁତାବକ, ଗତକାଲି ରାଜ୍ୟର ୧୧ଟି ସ୍ଥାନରେ ଦିନର ସର୍ବୋଚ୍ଚ ତାପମାତ୍ରା ୩୩ଡିଗ୍ରୀ କିମାବା ତାଠାରୁ ଅଧିକ ରହିଛି । ବୌଦ୍ଧ ତାପମାତ୍ରା ସର୍ବାଧିକ ୩୫ଡିଗ୍ରୀ ଥିବା ବେଳେ ତାଳଚେରରେ ୩୪.୪ ଡିଗ୍ରୀ, ଏବଂ ଭୁବନେଶ୍ବରର ୩୪ ଡିଗ୍ରୀ ରହିଥିଲା ।
ମାଲକାନଗିରି, ନବରଙ୍ଗପୁର ଏବଂ ପୁରୀରେ ମଧ୍ୟ ଦିନର ସର୍ବୋଚ୍ଚ ତାପମାତ୍ରା ୩୩ଡିଗ୍ରୀ ରହିଥିଲା । କେବଳ ଦିନ ନୁହେଁ ରାତିର ତାପମାତ୍ରା ମଧ୍ୟ ସ୍ବାଭାବିକ ଠାରୁ ୩ରୁ ୪ଡିଗ୍ରୀ ଅଧିକ ରହୁଛି । ଏବେ ଏଭଳି ପାଗରେ କିଛି ପରିବର୍ତ୍ତନ ହେବାର ସମ୍ଭାବନା ନାହିଁ । ସତ ହେବାରେ ଲାଗିଛି ପାଣିପାଗ ବିଜ୍ଞାନୀଙ୍କ ଆକଳନ । ଆଗକୁ ଗ୍ରୀଷ୍ଣ ଋତୁରେ ସାରା ଓଡିଶାରେ ଅହସ୍ୟ ଖରା ହେବ ବୋଲି ଏବେଠୁ ଯେମିତି ଇସାରା ମିଳିଲାଣି ।
