ତାମିଲନାଡୁ ୧୯/୧୦: ତାମିଲନାଡୁରେ କାବେରୀ ନଦୀରେ ଜଳସ୍ତର ବୃଦ୍ଧି ପାଇବାରୁ ରାଜ୍ୟର ୧୧ ଜିଲ୍ଲା ପାଇଁ ବନ୍ୟା ଆଶଙ୍କା ବୃଦ୍ଧି ପାଇବାରେ ଲାଗିଛି । ବିଭିନ୍ନ ଡ୍ୟାମରୁ ଜଳ ନିଷ୍କାସନ ପାଇଁ ଗେଟ ଖୋଲାଯାଉଛି । ମେଟ୍ଟୁରର ଷ୍ଟାନଲେ ଜଳ ଭଣ୍ଡାରରୁ ଦେଢ଼ଲକ୍ଷ କ୍ୟୁସେକ ଜଳ ନିଷ୍କାସନ କରାଯାଉଛି । ଯେହେତୁ ନଦୀକୁ ଜଳ ପ୍ରବାହ ବଢୁଛି ତେଣୁ ଅଧିକ ଜଳ ମଧ୍ୟ ଛଡ଼ାଯିବାର ଆଶଙ୍କା ରହିଛି । ତେଣୁ କାବେରୀ ନଦୀକୂଳିଆ ଅଞ୍ଚଳ ପାଇଁ ବନ୍ୟା ଆଶଙ୍କା ବୃଦ୍ଧି ପାଇବାରେ ଲାଗିଛି ।
ପଶ୍ଚିମଘାଟର କୁର୍ଗରୁ ବାହାରିଥିବା କାବେରୀ ନଦୀ କର୍ଣ୍ଣାଟକ ଏବଂ ତାମିଲନାଡୁ ଦେଇ ପ୍ରବାହିତ ହେଉଛି। ତେବେ ତଳ ଅଞ୍ଚଳ ପାଇଁ ବନ୍ୟା ଆଶଙ୍କା ବଢ଼ିବାରେ ଲାଗିଛି। ତାମିଲନାଡୁର ତ୍ରିଚି, ସାଲେମ, କରୁର, ଇରୋଡ, ନାମକ୍କାଲ, ଆରିୟାଲୁର, ତାଞ୍ଜାଭୁର , ତିରୁଭାରୁର, ମୈଲାଦୁତୁରାଇ, ନାଗପଟ୍ଟିନମ ଏବଂ କ୍ୟୁଡାଲୋର ଜିଲ୍ଲା ପାଇଁ ବନ୍ୟା ଆଲର୍ଟ ଜାରି କରାଯାଇଛି ।
ନଦୀକୂଳିଆ ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ସେହିପରି ନଦୀରେ ବୁଡ଼ ପକାଇବା ପାଇଁ ଥିବା ତୀର୍ଥସ୍ଥଳଗୁଡ଼ିକୁ ମଧ୍ୟ ବନ୍ଦ କରିଦିଆଯଇଛି । ଜିଲ୍ଲା ପ୍ରଶାସନକୁ ସତର୍କ ରହିବା ଲାଗି କୁହାଯାଇଛି। କାବେରୀ ସହିତ କୋଲିଡାମରେ ମଧ୍ୟ ବନ୍ୟା ଜଳ ବଢ଼ିବାରେ ଲାଗିଛି।