ଭୁବନେଶ୍ୱର ୨୮।୦୯: ଦେଶର ଅଭିନୟ ପାଇଁ ସର୍ବୋଚ୍ଚ ପୁରସ୍କାର ଦାଦସାହେବ ଫାଲକେ ଲାଗି ମନୋନୀତ ହୋଇଛନ୍ତି ଭେଟେରାନ ଅଭିନେତ୍ରୀ ୱାହିଦା ରେହମାନ । ଏହି ଖବର ଆସିବା ପରେ ସିନେପ୍ରେମୀଙ୍କ ମଧ୍ୟରେ ଉତ୍ସାହର ମାହୋଲ ଦେଖାଯାଇଥିଲା । ଆଉ ଏବେ ୱାହିଦାଙ୍କର ଓଡ଼ିଶା ଲିଙ୍କ ସାମ୍ନାକୁ ଆସିବା ପରେ ଅଧିକ ଚର୍ଚ୍ଚା ହେଉଛି ।

ଜଣେ ଜାତୀୟ ସ୍ତରର ଅଭିନେତ୍ରୀ ଭାବେ ପରିଚୟ ସୃଷ୍ଟି କରିବା ପୂର୍ବରୁ ପ୍ରଥମେ ଜଣେ ନୃତ୍ୟାଙ୍ଗନା ଭାବେ ପରିଚୟ ସୃଷ୍ଟି କରିଥିଲେ ୱାହିଦା । ଆଜକୁ ପ୍ରାୟ ସାତ ଦଶକ ପୂର୍ବରୁ ଓଡ଼ିଶାର ବ୍ରହ୍ମପୁରଠାରେ ଗଞ୍ଜାମ କଳା ପରିଷଦରେ ସେ ନୃତ୍ୟ କରିଥିଲେ । ଏହା ତାଙ୍କର ପ୍ରଥମ ଷ୍ଟେଜ୍ ସୋ’ ଥିଲା, ଯାହା ଜଣେ ଡାକ୍ତର ତଥା ସାମାଜିକ କର୍ମୀ  ଡା. ଫିରୋଜ ଅଲୀଙ୍କ ଦ୍ୱାରା ଆୟୋଜିତ କରାଯାଇଥିଲା । ଏହି କାର୍ଯ୍ୟକ୍ରମ ଯେ କେବଳ ୱାହିଦାଙ୍କୁ ପ୍ରସିଦ୍ଧି ଆଣିଦେଲା ତା ନୁହେଁ, ବରଂ ଗଞ୍ଜାମରେ ଏକ ଜାତୀୟ ସ୍ତରୀୟ ଫୁଟବଲ୍ ମ୍ୟାଚ୍ ଆୟୋଜନ ପାଇଁ ମଧ୍ୟ ବାଟ ଖୋଲିଥିଲା ।

ରୂପେଲି ପରଦାରେ ଏଣ୍ଟ୍ରି କରିବା ପୂର୍ବରୁ ୧୯୫୨ରେ ପ୍ରଥମେ ୱାହିଦା ରେଶମ ସହର ବ୍ରହ୍ମପୁରରେ ଭାରତନାଟ୍ୟମ ପରିବେଷଣ କରିଥିଲେ । ଏହି କାର୍ଯ୍ୟକ୍ରମର ସଫଳତା ଦେଖି ପୁଣି ଆଉ ଏକ ଡ୍ୟାନ୍ସ ସୋ ପାଇଁ ବ୍ରହ୍ମପୁର ଆସିଥିଲେ ୱହିଦା । ତେବେ ତାଙ୍କ ପ୍ରଥମ ଡାନ୍ସ ସୋର ଆୟୋଜକ ଡାକ୍ତର ଫିରୋଜ ଗରୀବଙ୍କ ଡାକ୍ତର ଭାବେ ମଧ୍ୟ ପରିଚିତ ଥିଲେ । ତାଙ୍କ ନାତୁଣୀ ନର୍ଗିସ୍ ନଟରାଜନଙ୍କ ଦ୍ୱାରା ଲିଖିତ ତାଙ୍କ ବାୟୋଗ୍ରାଫି ଡାଡି – ଏ ବକେଟ୍ ଅଫ ମେମୋରିଜରେ ୱହିଦାଙ୍କ ସିଲ୍କ ସିଟି ଭିଜିଟର କାହାଣୀ ରହିଛି । ନର୍ଗିସଙ୍କ ପୁସ୍ତକରେ ୱହିଦାଙ୍କୁ ବ୍ୟୁଟି ୱିଥ୍ ବ୍ରେନ୍ ଭାବେ ବର୍ଣ୍ଣନା କରାଯାଇଛି । ନର୍ଗିସଙ୍କ ପରିବାରର ନିମନ୍ତ୍ରଣ ରକ୍ଷା କରି ତୁରନ୍ତ ଭାରତନାଟ୍ୟମ ପରିବେଷଣ ପାଇଁ ସେ ରାଜି ହୋଇଯାଇଥିଲେ ବୋଲି ମଧ୍ୟ ପୁସ୍ତକରେ ଲେଖା ଯାଇଛି ।

ତେବେ ଗଞ୍ଜାମ କଳା ପରିଷଦରେ ୱହିଦାଙ୍କ ନୃତ୍ୟ ଦେଖିଥିଲେ ଜଣେ ତେଲୁଗୁ ସିନେମା ନିର୍ଦ୍ଦେଶକ । ପରେ ତାଙ୍କୁ ଏକ ତେଲୁଗୁ ସିନେମା ରୋଜୁଲୁ ମାରାୟିରେ ଏକ ଡ୍ୟାନ୍ସ ସିକ୍ୱେନ୍ସ ପାଇଁ ଅଫର ଦେଇଥିଲେ । ଏହି ସିନେମା ୧୯୫୫ରେ ରିଲଜ୍ ହୋଇଥିଲା । ତେବେ ସିନେମାରେ ପ୍ରସିଦ୍ଧ ତେଲୁଗୁ କଳାକାର ନାଗେଶ୍ୱର ରାଓ ଏବଂ ସୋକାର ଜାନକୀ କାମ କରିଥିଲେ ମଧ୍ୟ ୱହିଦାଙ୍କ ଗୀତଟି ହିଟ୍ ହୋଇଥିଲା ଏବଂ ଚମକିଥିଲା ତାଙ୍କ ଭାଗ୍ୟ । ରୋଜୁଲୁ ମାରାୟିର ହଣ୍ଡ୍ରେଡ ଡେ ସେଲିବ୍ରେସନ ଅବସରରେ ପ୍ରଥମ ଲିଡ ରୋଲ୍ ଅଫର ପାଇଥିଲେ ୱହିଦା । କିମ୍ବଦନ୍ତୀ ଅଭିନେତା ତଥା ନିର୍ମାତା ଗୁରୁ ଦତ୍ତା ତାଙ୍କ ସୌନ୍ଦର୍ଯ୍ୟରେ ପ୍ରଭାବିତ ହୋଇ ତାଙ୍କୁ ଏହି ଅଫର ଦେଇଥିଲେ । ଏହା ଥିଲା ୧୯୫୬ରେ ରିଲିଜ ହୋଇଥିବା ସିଆଇଡି ଯେଉଁଥିରେ ଦେବାନନ୍ଦଙ୍କ ବିପକ୍ଷରେ ଅଭିନୟ କରିଥିଲେ ୱାହିଦା ।

ଜଣେ ଜଣାଶୁଣା ଅଭିନେତ୍ରୀରେ ପରିଚିତ ହେବା ପରେ ମଧ୍ୟ ବ୍ରହ୍ମପୁରକୁ ଏକ କାର୍ଯ୍ୟକ୍ରମରେ ନୃତ୍ୟ କରିବାକୁ ଆସିଥିଲେ ୱହିଦା । ୧୯୬୦ରେ ସେ ନିଜ ସହ ପ୍ରସିଦ୍ଧ ପ୍ରଚ୍ଛଦପଟ ଗାୟକ ମାନ୍ନା ଦେଙ୍କୁ ମଧ୍ୟ ଆଣି କାର୍ଯ୍ୟକ୍ରମରେ ପରିବେଷଣ କରିଥିଲେ ।