ନୂଆଦିଲ୍ଲୀ: ବନ୍ଧା ହେବେ ଋଷ୍ ରାଷ୍ଟ୍ରପତି ଭ୍ଲାଦିମୀର ପୁଟିନ୍ ? ମଙ୍ଗୋଲିଆରେ ତାଙ୍କୁ ମଙ୍ଗଳବାର ଗିରଫ କରାଯାଇପାରେ । ବିଜୟ ଦିବସ ପୂର୍ତ୍ତି ଅବସରରେ ଋଷ୍ ରାଷ୍ଟ୍ରପତି ମଙ୍ଗୋଲିଆରେ ପହଞ୍ଚିଛନ୍ତି । ଦ୍ବିତୀୟ ବିଶ୍ବଯୁଦ୍ଧରେ ଜାପାନ ଉପରେ ସୋଭିଏତ୍ ସେନା ଏବଂ ମଙ୍ଗୋଲିଆ ସେନା ମିଳିତ ଭାବେ ବିଜୟ ହାସଲ କରିଥିଲେ । ଏହି ବିଜୟ ଦିବସକୁ ୮୫ ବର୍ଷ ପୂରଣ ହେଉଥିବା ବେଳେ ଏହି ଅବସରରେ ଭ୍ଲାଦିମୀର ପୁଟିନ୍ ମଙ୍ଗୋଲିଆ ଗସ୍ତରେ ରହିଛନ୍ତି । ସୋମବାର ସଂଧ୍ୟାରେ ସେ ମଙ୍ଗୋଲିଆ ରାଜଧାନୀ ଉଲାନବଟାରରେ ପହଞ୍ଚିଛନ୍ତି । ପୁଟିନ୍ ପହଞ୍ଚିବା ପରେ ତାଙ୍କୁ ସେଠାରେ ଗିରଫ ପାଇଁ ଦାବି ହୋଇଛି । କାରଣ ମଙ୍ଗୋଲିଆ ଇଣ୍ଟର ନ୍ୟାସନାଲ କୋର୍ଟର ସଦସ୍ୟ ରହିଛି ଏବଂ ଆଇସିଜେ ପକ୍ଷରୁ ଭ୍ଲାଦିମୀର ପୁଟିନଙ୍କୁ ଗିରଫ କରିବା ଲାଗି ଓ୍ବାରେଣ୍ଟ ଜାରି ହୋଇଛି ।
ଋଷ୍ ମିଡିଆ ସ୍ପୁତିନିକ୍ ଅନୁଯାୟୀ, ଭ୍ଲାଦିମୀର ପୁଟିନ୍ ମଙ୍ଗୋଲିଆରେ ୮୫ତମ ବିଜୟ ଦିବସ ପୂର୍ତ୍ତି କାର୍ଯ୍ୟକ୍ରମରେ ସାମିଲ୍ ହେବେ । ଏହା ସହିତ ଋଷ୍-ମଙ୍ଗୋଲିଆ କନଫ୍ରେନ୍ସିଭ୍ ଷ୍ଟ୍ରଟେଜିକ୍ ପାର୍ଟନରସିପ୍ ସହିତ ଆଲୋଚନା କରି ଦୁଇ ଦେଶର ମଧ୍ୟରେ ଦ୍ବିପାକ୍ଷିକ ସମ୍ପର୍କକୁ ବୃଦ୍ଧି କରିବାକୁ ଚେଷ୍ଟା କରିବେ । ୨୦୧୯ ପରେ ଋଷ୍ ରାଷ୍ଟ୍ରପତି ପ୍ରଥମ ଥର ପାଇଁ ମଙ୍ଗୋଲିଆ ଗସ୍ତରେ ପହଞ୍ଚିଛନ୍ତି ।
ସୂଚନା ଅନୁଯାୟୀ, ଇଣ୍ଟର ନ୍ୟାସନାଲ କ୍ରିମିନାଲ କୋର୍ଟ ଚଳିତ ବର୍ଷ ମାର୍ଚ୍ଚ ମାସରେ ଭ୍ଲାଦିମୀର ପୁଟିନଙ୍କ ବିରୋଧରେ ଆରେଷ୍ଟ ଓ୍ବାରେଣ୍ଟ ଜାରି କରିଥିଲେ । ଆଇସିସିର କହିବା ମୁତାବକ, ଯୁକ୍ରେନ ଯୁଦ୍ଧରେ ପୁଟିନଙ୍କ ବିରୋଧରେ ଅପରାଧର ଯଥେଷ୍ଟ ପ୍ରମାଣ ରହିଛି । ଇଣ୍ଟର ନ୍ୟାସନାଲ କ୍ରିମିନାଲ କୋର୍ଟ ନିଜ ରାୟରେ କହିଥିଲେ, ପୁଟିନଙ୍କ ନିର୍ଦ୍ଦେଶ ଋଷ୍ ସେନା ୟୁକ୍ରେନର ଆଶ୍ରୟସ୍ଥଳି ଏବଂ ବାଲଗୃହରୁ ଶତାଧିକ ଛୋଟ ପିଲାଙ୍କୁ ଅପହରଣ କରିଥିଲେ । ଯେଉଁ ମାନଙ୍କୁ ଋଷ ଲୋକେ ପୋଷ୍ୟ ସନ୍ତାନ ଭାବେ ଗ୍ରହଣ କରିପାରିବେ । ମାତ୍ର ଆଇସିସିର ଏହି ଅଭିଯୋଗକୁ ଖାରଜ୍ କରିଛି ଋଷ୍ ।
ଭ୍ଲାଦିମୀର ପୁଟିନ୍ ବିଶ୍ବର ଦ୍ବିତୀୟ ଶକ୍ତିଶାଳୀ ଦେଶ ଋଷର ରାଷ୍ଟ୍ରପତି । ଏଭଳି ସ୍ଥିତିରେ ଆଇସିସିର ଆଦେଶକୁ ମାନିବେ ବୋଲି ବିଶ୍ବାସ କରାଯାଉନାହିଁ । ଋଷ୍ ପ୍ରଥମରୁ ଇଣ୍ଟର ନ୍ୟାସନାଲ କ୍ରିମିନାଲ କୋର୍ଟକୁ ମାନ୍ୟତା ଦେଇନାହିଁ । ତେଣୁ ଋଷ୍ ଭିତରେ ପୁଟିନଙ୍କୁ ଗିରଫ କରିବା ଅସମ୍ଭବ । ଅନ୍ୟପଟେ ସେ ଦେଶରେ ନଥିବା ବେଳେ ତାଙ୍କ ବିରୋଧରେ ଏଭଲି ମକଦମା ଚଳାଇବା ସମ୍ଭବ ନୁହେଁ ବୋଲି କୁହାଯାଉଛି ।...
