ବିରାଟ କୋହଲିଙ୍କ ଧୂଆଁଧାର ବ୍ୟାଟିଂ, ଶ୍ରୀଲଙ୍କା ବିପକ୍ଷରେ ଖେଳିଲେ ୪୬ତମ ଶତକୀୟ ଇନିଂସ

15/01/2023 at 6:12 PM

ତିରୁଅନନ୍ତପୁରମ: ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ବିରାଟ କୋହଲିଙ୍କ ଚମତ୍କାର ଫର୍ମ ଜାରି ରହିଛି। ରବିବାର ଖେଳା ଯାଇଥିବା ଶ୍ରୀଲଙ୍କା ବିପକ୍ଷ ତୃତୀୟ ଦିନିକିଆରେ ପୁଣି ଥରେ ବିରାଟ କୋହଲିଙ୍କ ବ୍ୟାଟ୍‌ରୁ ରନ ବର୍ଷା ହୋଇଛି ଏବଂ ଶତକୀୟ ଇନିଂସ ଖେଳିଛନ୍ତି। ଦିନିକିଆରେ କୋହଲି ୪୬ତମ ଶତକ ଅର୍ଜନ କରିଛନ୍ତି। କୋହଲି ମାତ୍ର ୮୫ ବଲ୍‌ରୁ ନିଜର ଶତକ ଅର୍ଜନ କରିଛନ୍ତି।

ବିରାଟ ଆଜିର ମୁକାବିଲାରେ ୧୧୦ ବଲ୍‌ରୁ ୧୬୬ ରନର ଅପରାଜିତ ଇନିଂସ ଖେଳିଛନ୍ତି। ଏଥିରେ ୧୩ ଚୌକା ଏବଂ ୮ ଛକା ସାମିଲ୍। ଏହି ସମୟରେ ବିରାଟଙ୍କ ଷ୍ଟ୍ରାଇକ୍‌ ରେଟ୍ ୧୫୦.୯୧ ରହିଛି। ଦିନିକିଆ କ୍ୟାରିୟରରେ ଏହା ବିରାଟଙ୍କ ଦ୍ଵିତୀୟ ସର୍ବଶ୍ରେଷ୍ଠ ସ୍କୋର। ୨୦୧୨ରେ କୋହଲି ପାକିସ୍ତାନ ବିପକ୍ଷରେ ୧୮୩ ରନ କରିଥିଲେ, ଯାହା ତାଙ୍କର ସର୍ବଶ୍ରେଷ୍ଠ ରହିଛି। ୨୦୧୮ରେ ଦକ୍ଷିଣ ଆଫ୍ରିକା ବିପକ୍ଷରେ ୧୬୦ ରନର ପାଳି ଖେଳିଥିଲେ।

ବିରାଟ କୋହଲି ଯେଉଁ ଫର୍ମରେ ନଜର ଆସୁଛନ୍ତି ଏବଂ ତାଙ୍କ ବ୍ୟାଟ୍‌ରୁ ଯେମିତି ଶତକ ବାହାରୁଛି ତାକୁ ଦେଖିଲେ ସେ ଶୀଘ୍ର ତେନ୍ଦୁଲକରଙ୍କ ୪୯ ଦିନିକିଆ ଶତକକୁ ଅତିକ୍ରମ କରିବେ। ଗତ ଚାରୋଟି ଦିନିକିଆରେ କୋହଲି ତୃତୀୟ ଶତକ ଅର୍ଜନ କରିସାରିଲେଣି।

ବିରାଟ କୋହଲିଙ୍କ ଗତ ପାଞ୍ଚ ଇନିଂସ

ବନାମ ବାଂଲାଦେଶ- ୫ ରନ

ବନାମ ବାଂଲାଦେଶ- ୧୧୩ ରନ

ବନାମ ଶ୍ରୀଲଙ୍କା- ୧୧୩ ରନ

ବନାମ ଶ୍ରୀଲଙ୍କା- ୪ ରନ

ବନାମ ଶ୍ରୀଲଙ୍କା- ୧୬୬* ରନ