ତେଲକୋଇ ୧୮।୦୩ : ଶବ ବ୍ୟବଛେଦ ରିପୋର୍ଟ ଦେବା ପାଇଁ ଲାଞ୍ଚ ନେଉଛନ୍ତି ଡାକ୍ତର । ଏମିତି ଏକ ଦୃଶ୍ୟ କଏଦ ହୋଇଛି ମୋବାଇଲ୍ କ୍ୟାମେରାରେ । ଷ୍ଟିଙ୍ଗ ଅପରେସନରେ ଧରାପଡିଛି ଡାକ୍ତର ଲାଞ୍ଚ ନେଉଥିବା ଭିଜୁଆଲ୍ ସହ ଏନେଇ କଥାବାର୍ତ୍ତାର ଅଡିଓ । କେନ୍ଦୁଝର ଜିଲ୍ଲାର ତେଲକୋଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଘଟଣା ।
ଖବର ଅନୁଯାୟୀ, ଡାକ୍ତର ଗଣପତି ପ୍ରଧାନଙ୍କ ବିରୋଧରେ ସଙ୍ଗୀନ ଅଭିଯୋଗ । କେବଳ ଅଭିଯୋଗ ନୁହେଁ, ମୋବାଇଲ୍ କ୍ୟାମେରାରେ ଧରା ପଡିଛି ପୂରା ଘଟଣା । ଶବ ବ୍ୟବଛେଦ ରିପୋର୍ଟ ଦେବା ପାଇଁ ଡାକ୍ତର ଡିମାଣ୍ଡ କରୁଛନ୍ତି ୫ହଜାର ଟଙ୍କା। ଗତ ଫେବୃୟାରୀ ୫ ତାରିଖରେ ତେଲକୋଇ ଥାନା କରଦାଙ୍ଗି ଗାଁ ଖଜୁରିଆ ସାହିର କଳାବତୀ ବେହେରା ଘୁରୁଡିଆ ନାଳରେ ବୁଡି ପ୍ରାଣ ହରାଇ ଥିଲେ। ତାଙ୍କର ତେଲକୋଇ ମେଡିକାଲରେ ଶବ ବ୍ୟବଛେଦ କରାଯାଇଥିଲା ।
ତେବେ ଡାକ୍ତର ଗଣପତି ପ୍ରଧାନ ରିପୋର୍ଟ ଦେବା ପାଇଁ ପରିବାର ଲୋକଙ୍କୁ ବାରମ୍ବାର ମେଡିକାଲକୁ ଦୌଡାଇଥିଲେ । ପ୍ରଥମେ ୩ ହଜାର ଓ ପରେ ୨ ହଜାର ଟଙ୍କା ଲାଞ୍ଚ ନେଇଥିଲେ । ଏସବୁର ଭିଜୁଆଲ୍ ଏବଂ କଥାବାର୍ତ୍ତା କାଳେ ମୋବାଇଲ୍ ରେ ରେକର୍ଡ ହୋଇଯିବ ସେନେଇ ଡାକ୍ତରଙ୍କ ଭୟ ମଧ୍ୟ ଧରା ପଡିଛି । ଧରା ପଡିଗଲେଚାକିରୀ ଯିବାର ଭୟ ରହିଥିବା ମଧ୍ୟ କହୁଛନ୍ତି ଡାକ୍ତର । ସେଥିପାଇଁ ରେକର୍ଡ କରୁଥିବା ବ୍ୟକ୍ତିଙ୍କୁ ବାହାରେ ରଖି ସେ ଘର ଭିତରକୁ ପଶୁଛନ୍ତି । ରୁମ୍ ବାହାରକୁ ଆସି ପୁଣି କହୁଛନ୍ତି, ଆଜି ନିଶ୍ଚୟ କରିଦେବି । ପୋଷ୍ଟମର୍ଟମ ରିପୋର୍ଟ ପାଇଁ ଲାଞ୍ଚ ନେଉଥିବା ଡାକ୍ତରଙ୍କ ଉପରେ କେବେ ଜିଲ୍ଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗ ଆକ୍ସନ ନେବ ତାକୁ ଅପେକ୍ଷା ।
