ସୁବର୍ଣ୍ଣପୁର ୧୧|୬: ସୁବର୍ଣ୍ଣପୁର ଜିଲ୍ଲା ଅଇଁଲାଛାଟ ଛକକୁ ଲାଗି ଥିବା କୁକୁଡା ଫାର୍ମର ସ୍ଥାନାନ୍ତରଣ ଦାବିରେ ଆଜି ସୁବର୍ଣ୍ଣପୁର-ସମ୍ବଲପୁର ରାସ୍ତାର ଅଇଁଲାଛାଟ ଛକରେ ରାସ୍ତାରୋକ କରାଯାଇଛି । କୁକୁଡା ଫାର୍ମର ସାଂଘାତିକ ପ୍ରଦୂଷଣ ଓ ସ୍ଥାନାନ୍ତରଣ ଦାବିରେ ପ୍ରଭାବିତ ୪ଟି ପଂଚାୟତର ୧୨ଟି ଗାଁର ଶହ ଶହ ଲୋକ ସକାଳ ୬ଟାରୁ ସନ୍ଧ୍ୟା ୬ଟା ଯାଏଁ ୧୨ଘଣ୍ଟିଆ ରାସ୍ତା ଅବରୋଧ କରିଛନ୍ତି । ଜନ ଆନ୍ଦୋଳନ ଯୋଗୁଁ ରାସ୍ତାର ଉଭୟ ପଟରେ ଯାନବାହାନ ଅଟକି ରହିଥିବାବେଳେ ଲୋକଙ୍କ ଯିବା ଆସିବା ଠପ୍ ହୋଇଯାଇଛି ।

ବର୍ଷ ବର୍ଷଧରି କୁକୁଡା ଫାର୍ମର ପ୍ରଦୂଷଣ, ବର୍ଯ୍ୟବସ୍ତୁ ପରିଚାଳନାରେ ଅବ୍ୟବସ୍ଥା ଏବଂ ଦୁର୍ଗନ୍ଧକୁ ନେଇ ପ୍ରଭାବିତ ଲୋକେ ଅଭିଯୋଗ କରି ଆସୁଥିଲେ । ଏହାକୁ ନେଇ ଆଗରୁ ପ୍ରଭାବିତ ୧୨ଟି ଗାଁର ଅଧିବାସୀ ଜିଲ୍ଲା ପ୍ରଶାସନକୁ ଆପତ୍ତି ଅଭିଯୋଗ କରିଥିଲେହେଁ ପ୍ରଶାସନ କୌଣସି ପଦକ୍ଷେପ ନନେବାରୁ ରାସ୍ତାରୋକ ଆନ୍ଦୋଳନ କରିଛୁ ବୋଲି ଆନ୍ଦୋଳନକାରୀ କହିଛନ୍ତି । ଆଗକୁ ଏହି କୁକୁଡା ଫାର୍ମକୁ ସମ୍ପୂର୍ଣ୍ଣ ସ୍ଥାନାନ୍ତରଣ କରାନଗଲେ ଜନଆନ୍ଦୋଳନକୁ ଅଧିକ ତୀବ୍ର କରାଯିବ ବୋଲି ସେମାନେ ଚେତାବନୀ ଦେଇଛନ୍ତି ।