ମୁମ୍ଵାଇ ୧୭।୧୨: ବଲିଉଡ୍‌ରେ ସମାନ ପାରିଶ୍ରମିକ ଉପରେ ଅନେକ ଅଭିନେତ୍ରୀ  ଖୋଲାଖୋଲି କଥା ହୋଇଛନ୍ତି । ଅଭିନେତାଙ୍କ ତୁଳନାରେ ଅଭିନେତ୍ରୀଙ୍କୁ  ଖୁବ୍‌ କମ୍‌ ପାରିଶ୍ରମିକ ପ୍ରଦାନ କରାଯାଉଥିବାରୁ ସେମାନେ ଅସନ୍ତୋଷ  ବ୍ୟକ୍ତ କରିଛନ୍ତି । ପରଦାରେ ମୁଖ୍ୟ ଅଭିନେତାଙ୍କ ଭଳି ସେମାନଙ୍କ  ଭୂମିକାର ସମାନ ଗୁରୁତ୍ୱ ରହିଥିଲେ ମଧ୍ୟ ବଲିଉଡ୍‌ ସେମାନଙ୍କୁ  କମ୍‌ ପାରିଶ୍ରମିକ ଦେଉଛି ବୋଲି ଅନେକ ଅଭିନେତ୍ରୀ  ଅଭିଯୋଗ ଉଠାଇଛନ୍ତି ।

ଏବେ ବିଦ୍ୟା  ବାଲନ୍‌ ଏ ବିଷୟରେ ଆଲୋଚନା କରି  ଚର୍ଚ୍ଚାକୁ ଆସିଛନ୍ତି । ସେ କହିଛନ୍ତି,  କାମ ପାଇଁ ଯାହା ପାରିଶ୍ରମିକ  ପାଉଛନ୍ତି, ସେଥିରେ ସେ ଖୁସି ।ଇଣ୍ଡଷ୍ଟ୍ରିର ଆଗଧାଡ଼ିର  ନାୟକଙ୍କ ସହ ସେ  କ୍ୱଚିତ୍‌ କାମ କରିଥିବାରୁ  ପାରିଶ୍ରମିକ ତାରତମ୍ୟ  ବିଷୟରେ ବେଶି  ଧାରଣା ନାହିଁ ବୋଲି  ବିଦ୍ୟା କହିଛନ୍ତି ।  ଯାହା ସେ ପାଉଛନ୍ତି,  ଆଗଧାଡ଼ିର  ଫିଲ୍ମମାନଙ୍କରେ ବଡ଼  କଳାକାରମାନେ ତା’ଠୁ  ୧୦ ଗୁଣ ପାରିଶ୍ରମିକ  ଦାବି କରୁଛନ୍ତି ସତ । 

କିନ୍ତୁ ଯେତେ ପ୍ରୋଜେକ୍ଟରେ  ସେ କାମ କରିଛନ୍ତି, ଉଚିତ୍‌  ପାରିଶ୍ରମିକ ପାଇଛନ୍ତି ବୋଲି ସେ  ଭାବନ୍ତି । ଖୁବ୍‌ଶୀଘ୍ର ପ୍ରତୀକ ଗାନ୍ଧିଙ୍କ  ସହ ଏକ ଫିଲ୍ମରେ ନଜର ଆସିବେ  ବିଦ୍ୟା । ଏଥିରେ ତାଙ୍କ ସହ ଇଲିଆନା  ଡିକ୍ରୁଜ୍‌ ଓ ସେନ୍ଧିଲ ରାମମୂର୍ତ୍ତି ମଧ୍ୟ  ଅଭିନୟ କରିଛନ୍ତି । ‘ନୋ ୱାନ୍‌ କିଲ୍‌ଡ  ଜେସିକା’, ‘ଡାର୍ଟି ପିକ୍‌ଚର’, ‘କାହାନୀ’  ଭଳି ଚଳଚ୍ଚିତ୍ର ପାଇଁ ବଲିଉଡ୍‌ରେ ବିଦ୍ୟା  ସ୍ୱତନ୍ତ୍ର ପରିଚିତି ପାଇଛନ୍ତି ।