ନୂଆଦିଲ୍ଳୀ, ୦୩/୦୨: ତେଲୁଗୁ ସିନେମାର ଦିଗ୍ଗଜ ଅଭିନେତା ଏବଂ ନିର୍ଦ୍ଦେଶକ କେ.ବିଶ୍ଵନାଥଙ୍କ ପରଲୋକ। ମୃତ୍ୟୁବେଳକୁ ତାଙ୍କୁ ୯୨ ବର୍ଷ ହୋଇଥିଲା। ୨୦୧୬ ରେ ତାଙ୍କୁ ଦାଦା ସାହେବ ଫାଲକେ ସମ୍ମାନ ମଧ୍ୟ ମିଳିଥିଲା। ତାଙ୍କର ବିୟୋଗରେ ଫ୍ୟାନ ତଥା ସେଲିବ୍ରିଟିମାନେ ଶୋକପ୍ରକାଶ କରିବା ସହ ସୋସିଆଲ ମିଡିଆରେ ଶ୍ରଦ୍ଧାଞ୍ଜଳି ଜଣାଇଛନ୍ତି।

ଗୁରୁବାର ରାତିରେ ବାର୍ଦ୍ଧକ୍ୟ ଜନିତ ସମସ୍ୟାରେ ଗ୍ରସିତ ଥିବା ବିଶ୍ବନାଥ ହାଇଦ୍ରାବାଦରେ ଶେଷ ନିଶ୍ବାସ ତ୍ୟାଗ କରିଛନ୍ତି। ଜଣେ ନିର୍ଦ୍ଦେଶକ ଭାବରେ ବିଶ୍ବନାଥ କ୍ୟାରିୟର ୧୯୬୫ ରେ ଆରମ୍ଭ କରିଥିଲେ। ତାଙ୍କର ବଡ଼ ଫିଲ୍ମ ତାଲିକାରେ ଶଙ୍କରଭରଣମ, ସ୍ବାଥିନୁଭ୍ୟମ, ସାଗର ସଂଗମମ ଏବଂ ସ୍ବୟଂକୃଷି ଭଳି ଲୋକପ୍ରିୟ ଫିଲ୍ମ ରହିଛି। ଏହା ସହ ଆହୁରି ଅନେକ ଫିଲ୍ମରେ ଅଭିନୟ କରିବା ସହ ନିର୍ଦେ୍ଦଶନା ମଧ୍ୟ କରିଛନ୍ତି। ବିଶ୍ବନାଥଙ୍କ ନିର୍ଦେ୍ଦଶିତ ଅନ୍ତିମ ଫିଲ୍ମ ’ସୁଭାପ୍ରଦମ’ ୨୦୧୦ ରେ ରିଲିଜ୍‌ ହୋଇଥିଲା।

କେ ବିଶ୍ବନାଥ ଜଣେ ନିର୍ଦ୍ଦେଶକ ସହ ଏକ ଉଚ୍ଚକୋଟୀର କଳାକାର ମଧ୍ୟ ଥିଲେ। ସେ କାଲିସୁନ୍ଦରମ ରା, ନରସିମ୍ହା ନାଇଡୁ, ଟାଗୋର ଏବଂ ମିଷ୍ଟର ପରଫେକ୍ଟ ଭଳି ଅନେକ ଫିଲ୍ମରେ କାମ କରିଥିଲେ। କେ. ବିଶ୍ବନାଥ ନିଜର ଦମଦାର କାମ ପାଇଁ ଅନେକ ଆଓ୍ବାର୍ଡ ମଧ୍ୟ ଜିତିଛନ୍ତି।

ଯେଉଁଥିରେ ପାଞ୍ଚ ରାଷ୍ଟ୍ରୀୟ ପୁରସ୍କାର ଏବଂ ରାଜ୍ୟ ନନ୍ଦୀ ପୁରସ୍କାର, ୧୦ ଫିଳ୍ମଫେୟାର ଆଓ୍ବାର୍ଡ ସାଉଥ୍ ଏବଂ ହିନ୍ଦିରେ ଗୋଟିଏ ଫିଲ୍ମଫେୟାର ସାମିଲ୍‌ ରହିଛି। ଏହା ସହ ୧୯୯୨ ରେ କେ ବିଶ୍ବନାଥଙ୍କୁ କଳା କ୍ଷେତ୍ରରେ ଯୋଗଦାନ ପାଇଁ ଆନ୍ଧ୍ରପ୍ରଦେଶ ରାଜ୍ୟ ରଘୁପତି ଭେଙ୍କୟା ପୁରସ୍କାର ଏବଂ ନାଗରିକ ସମ୍ମାନ ପଦ ମଧ୍ୟ ମିଳିଥିଲା।