ନୂଆଦିଲ୍ଲୀ: ୟୁକ୍ରେନ ଉପରେ ରୁଷର ଆକ୍ରମଣକୁ ବର୍ଷେ ପୂରିବାକୁ ଯାଉଛି । ଏହା ପୂର୍ବରୁ ଆମେରିକା ରାଷ୍ଟ୍ରପତି ଜୋ ବାଇଡେନ୍ ହଠାତ୍ କିଭରେ ପହଞ୍ଚିଛନ୍ତି । ବାଇଡେନଙ୍କ ହଠାତ୍ କିଭ୍ ଗସ୍ତକୁ ନେଇ ସମସ୍ତେ ଚକିତ ହୋଇଛନ୍ତି । ୟୁକ୍ରେନ ଉପରେ ରୁଷର ଆକ୍ରମଣ ପରେ ଏହା ଆମେରିକା ରାଷ୍ଟ୍ରପତିଙ୍କ ପ୍ରଥମ କିଭ୍ ଯାତ୍ରା । ଉଲ୍ଲେଖଯୋଗ୍ୟ ଯେ ବାଇଡେନ ପୋଲାଣ୍ଡର ରାଷ୍ଟ୍ରପତି ଏନ୍ଦ୍ରେଜ ଦୁଦାଙ୍କୁ ଭେଟିବାର କାର୍ଯ୍ୟକ୍ରମରେ ଯାଇଥିଲେ । କିନ୍ତୁ ଏହାପରେ ସେ ହଠାତ୍ ୟୁକ୍ରେନରେ ପହଞ୍ଚିଥିଲେ । ବାଇଡେନଙ୍କ ଏହି ଗସ୍ତ ବାବଦରେ କାହାରି ପାଖରେ କୌଣସି ପୂର୍ବ ସୂଚନା ନଥିଲା ।
କିଭରେ ପହଞ୍ଚିବା ପରେ ବାଇଡେନ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନ୍ସିଙ୍କୁ ଭେଟିଛନ୍ତି । ସିଏନଏନର ରିପୋର୍ଟ ଅନୁସାରେ ଜୋ ବାଇଡେନ୍ ଏହି ସମୟରେ ୟୁକ୍ରେନକୁ ୫୦ କୋଟି ଡଲାର (୫୦୦ ମିଲିୟନ ଡଲାର)ର ଅତିରିକ୍ତ ସହାୟତା ଘୋଷଣା କରିଛନ୍ତି ।
ସିଏନଏନର ରିପୋର୍ଟ ଅନୁସାରେ ବାଇଡେନ କହିଛନ୍ତି, 'ୟୁକ୍ରେନ ଉପରେ ଆକ୍ରମଣର ବର୍ଷେ ପରେ ପୁଟିନଙ୍କ ଯୁଦ୍ଧ ନୀତି ବିଫଳ ହୋଇଛି । ପୁଟିନ ଭାବିଥିଲେ ୟୁକ୍ରେନ ଦୁର୍ବଳ ଏବଂ ପାଶ୍ଚିମ ରାଷ୍ଟ୍ର ଗୁଡିକ ମଧ୍ୟରେ ଏକତା ନାହିଁ । କିନ୍ତୁ ବର୍ତ୍ତମାନ ସେ ଏହା ଚିନ୍ତା କରିପାରୁ ନଥିବେ । ସେ (ପୁଟିନ) ସମ୍ପୂର୍ଣ୍ଣ ଭୁଲ । ଗୋଟିଏ ବର୍ଷ ପରେ ଏହି ରୁମରେ ଆମ ମାନଙ୍କ ଉପସ୍ଥିତି ହିଁ ପ୍ରମାଣିତ କରୁଛି ଯେ ଆମେ ଏକ ହୋଇ ଛିଡ଼ା ହୋଇଛୁ' ।
ଏହାସହ ବାଇଡେନ କହିଛନ୍ତି, 'ଗୋଟିଏ ବର୍ଷ ପରେ, କିଭ୍ ଛିଡା ହୋଇଛି । ୟୁକ୍ରେନ ଛିଡା ହୋଇ ରହିଛି, ଗଣତନ୍ତ୍ର ବଞ୍ଚି ରହିଛି'। ସେ ଘୋଷଣା କରିଛନ୍ତି ଯେ ୟୁକ୍ରେନ ସହ ଆମେରିକା ଏବଂ ସାରା ବିଶ୍ୱ ଛିଡା ହୋଇ ରହିଛି ।
ବାଇଡେନଙ୍କ ୟୁକ୍ରେନ ଗସ୍ତକୁ ସମ୍ପୂର୍ଣ୍ଣ ରୂପେ ଗୁପ୍ତ ରଖାଯାଇଥିଲା । ଯାତ୍ରାର ୨୪ ଘଣ୍ଟାରେ କେହି ମଧ୍ୟ ଏହା ବିଷୟରେ ଟେର୍ ପାଇ ପାରି ନଥିଲେ । ଜୋ ବାଇଡେନ ୟୁକ୍ରେନ ଗସ୍ତ ସାରି ମୁନିଚ୍ ପହଞ୍ଚି ସେଠାରେ ଆୟୋଜିକ ସୁରକ୍ଷା ସମ୍ମିଳନୀରେ ଭାଗ ନେବେ ।
