ମୁମ୍ଵାଇ ୦୯।୦୯: ବଲିଉଡ୍ ବିଉଟି ଉର୍ବଶୀ ରୌତେଲା ଓ ଋଷଭ ପନ୍ତଙ୍କ ମଧ୍ୟରେ ଶୀତଳ ଯୁଦ୍ଧ ସୋସିଆଲ ମିଡିଆ ୟୁଜର୍ସ ଓ ଗସିପ୍ ପ୍ରେମୀଙ୍କୁ ନୂଆ ମସଲା ଦେଇଛି । ସୋସିଆଲ ମିଡିଆରେ ଲୋକେ ଉର୍ବଶୀଙ୍କୁ ଋଷଭ ପନ୍ତଙ୍କ ନାମରେ ଟ୍ରୋଲ୍ କରୁଛନ୍ତି । ସାଧାରଣରେ ତାଙ୍କୁ ଦେଖିଲେ ଋଷଭ ପନ୍ତ ନାଁରେ ଡାକୁଛନ୍ତି । ଏ ସବୁ ଦେଖି ଉର୍ବଶୀଙ୍କ ମନ ଖରାପ ହୋଇଛି ।
ଗତ ବୁଧବାର ଉର୍ବଶୀ ମୁମ୍ବାଇରେ ଆୟୋଜିତ ଗଣେଶ ମହୋତ୍ସବରେ ପହଞ୍ଚିଥିଲେ । ପ୍ରବଳ ଭିଡ଼ ଭିତରେ ସେଠାରେ ଗଣମାଧ୍ୟମ କର୍ମୀ ମଧ୍ୟ ଥିଲେ । ଉର୍ବଶୀ ପେଣ୍ଡାଲରେ ଏଣ୍ଟ୍ରି କରିବା ପରେ ଲୋକଙ୍କ ଧ୍ୟାନ ତାଙ୍କ ଉପରୁ ହଟିଲା ନାହିଁ । ଭାରି ଲେହଙ୍ଗାରେ ସେ ଖୁବ୍ ସୁନ୍ଦର ଦିଶୁଥିଲେ । କିନ୍ତୁ ଏତିକିବେଳେ ଏକ ଅଜବ ଘଟଣା ଘଟିଲା, ଯାହା ଉର୍ବଶୀଙ୍କୁ ରଗାଇଦେଲା । ଭିଡ଼ ଭିତରେ ଥିବାବେଳେ ଲୋକେ କ୍ରିକେଟର୍ ଋଷଭ ପନ୍ତଙ୍କ ନାଁ ନେଇ ଚିଲ୍ଲେଇବା ଆରମ୍ଭ କରିଦେଲେ । ଉର୍ବଶୀ ସେତେବେଳେ କୌଣସି ପ୍ରତିକ୍ରିୟା ଦେଲେ ନାହିଁ ।
କିନ୍ତୁ ପରେ ଇନ୍ଷ୍ଟା ଷ୍ଟୋରୀରେ ଋଷଭ ପନ୍ତଙ୍କ ନାଁ ନେଇ ଚିତ୍କାର କରୁଥିବା ଲୋକଙ୍କର ଏକ ଭିଡିଓ ସେୟାର କଲେ । ଭିଡିଓ ସହିତ ଲୋକଙ୍କୁ ଚେତାବନୀ ଦେଇ ଉର୍ବଶୀ କ୍ୟାପ୍ସନ ଲେଖିଛନ୍ତି ‘ଏହା ବାସ୍ତବରେ ବନ୍ଦ ହେବା ଆବଶ୍ୟକ ନଚେତ୍...’ । ଏଥିରୁ ବେଶ ଭଲଭାବେ ବୁଝିହେଉଛି ଯେ, ଲୋକଙ୍କର ଏହି କାର୍ଯ୍ୟକଳାପକୁ ସେ ଆଦୌ ପସନ୍ଦ କରୁନାହାନ୍ତି । ଲୋକେ ତାଙ୍କ କଥାକୁ କେତେ ଗମ୍ଭୀରତାର ସହ ଗ୍ରହଣ କରିବେ, ତାହା ଦେଖିବାକୁ ବାକି ରହିଲା । ଗତ କିଛି ଦିନରୁ ସୋସିଆଲ ମିଡିଆରେ ଉର୍ବଶୀଙ୍କୁ ଋଷଭ ପନ୍ତଙ୍କ ନାଁରେ ଟ୍ରୋଲ୍ର ଶିକାର ହେବାକୁ ପଡୁଛି । ସେଥିପାଇଁ ଭିଡ଼ରେ ଏଭଳି ସ୍ଥିତି ତାଙ୍କ ରାଗକୁ ଆହୁରି ବଢ଼ାଇଦେଲା ।
ଉର୍ବଶୀଙ୍କ ଅପ୍କମିଙ୍ଗ ପ୍ରୋଜେକ୍ଟ ବିଷୟରେ କହିବାକୁ ଗଲେ ‘ଦିଲ୍ ହୈ ଗ୍ରେ’, ‘ବ୍ଲାକ୍ ରୋଜ୍’ରେ ନଜର ଆସିବେ । ଶେଷ ଥର ତେଲୁଗୁ ଫିଲ୍ମ ‘ଦ ଲେଜେଣ୍ଡ’ରେ ସେ ନଜର ଆସିଥିଲେ । ଏହା ପୂର୍ବରୁ ହିନ୍ଦୀ ଫିଲ୍ମ ‘ଭର୍ଜିନ୍ ଭାନୁପ୍ରିୟା’ରେ ସେ ପରଦାକୁ ଆସିଥିଲେ । ଗାୟକ ଜାସନ୍ ଡିରୁଲୋଙ୍କ ସହ ଏକ ମ୍ୟୁଜିକ୍ ଭିଡିଓରେ ସେ ଖୁବ୍ଶୀଘ୍ର ନଜର ଆସିବେ ।