ପାଟନା: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର୍‌ଙ୍କ ସହ ଦୀର୍ଘଦିନ ଧରି ମୁହାଁମୁହିଁ ସ୍ଥିତି ପରେ ଜେଡିୟୁ ଛାଡ଼ିଲେ ଦଳର ବରିଷ୍ଠ ନେତା ଉପେନ୍ଦ୍ର କୁଶାୱା। ସେ ଜେଡିୟୁର ସଂସଦୀୟ ବୋର୍ଡ ନେତା ଥିଲେ।

ଦୀର୍ଘ ଦିନ ହେଲା ନୀତୀଶ କୁମାରଙ୍କ ସହ ତାଙ୍କର ପଡ଼ୁନଥିଲା। ଦୁହେଁ ପରସ୍ପରକୁ ଟାର୍ଗେଟ କରି ଆସୁଥିଲେ। ଏସବୁ ନେଇ ଶ୍ରୀ କୁଶୱା ଦଳ ଛାଡ଼ିପାରନ୍ତି ବୋଲି ଅନେକ ଦିନ ହେବ ଚର୍ଚ୍ଚା ହେଉଥିଲା। ହେଲେ ସବୁ ଚର୍ଚ୍ଚାରେ ସୋମବାର ପୂର୍ଣ୍ଣଚ୍ଛେଦ ପକାଇ ସେ ଜେଡିୟୁ ଛାଡ଼ିଛନ୍ତି। ନୀତୀଶଙ୍କ ଦଳ ଛାଡ଼ିବା ପରେ ଏକ ନୂଆ ଦଳ ଗଠନ କରିଛନ୍ତି କୁଶୱା। ତାଙ୍କ ଦଳର ନାଁ ରହିଛି ‘ରାଷ୍ଟ୍ରୀୟ ଲୋକ ଜନତା ଦଳ’।

ଦଳ ଛାଡ଼ିବା ପରେ କୁଶୱା କହିଛନ୍ତି “ ଆମେ ‘ରାଷ୍ଟ୍ରୀୟ ଲୋକ ଜନତା ଦଳ’ ନାଁରେ ଏକ ନୂଆ ଦଳ ଗଠନ କରିବାକୁ ନିଷ୍ପତ୍ତି ନେଇଛୁ। ସର୍ବସମ୍ମତି କ୍ରମେ ଏହି ନିଷ୍ପତ୍ତି ହୋଇଛି। ମୋତେ ଏହି ଦଳର ରାଷ୍ଟ୍ରୀୟ ଅଧ୍ୟକ୍ଷ କରାଯାଇଛି। ଆମ ଦଳ କରପୋରୀ ଠାକୁରଙ୍କ ଆଦର୍ଶକୁ ଆଗକୁ ବଢାଇବ। ଆର୍‌ଜେଡି ସହ ଯାହା ଚୁକ୍ତି ସେସବୁ ରଦ୍ଦ କରିବା ଦିଗରେ ଆମମେ କାମ କରୁଛୁ।” ସୋମବାର ଏକ ସାମ୍ବାଦିକ ସମ୍ମିଳନୀ ପ୍ରତିକ୍ରିୟା ଦେଇ ଏପରି କହିଛନ୍ତି ଉପେନ୍ଦ୍ର କୁଶାୱା। ଏଥିସହିତ ସେ ଜେଡିୟୁର ବିଧାନ ପରିଷଦ ସଦସ୍ୟ ପଦରୁ ଇସ୍ଥଫା ଦେଇଥିବା ଘୋଷଣା କରିଛନ୍ତି।