ଯାଜପୁର ୨୨/୦୭: ଆପଣ ବେଲ ଗଛ ଦେଖିଥିବେ ହେଲେ କଣ୍ଟା ନଥିବା ବେଲ ଗଛ ଦେଖି ନଥିବେ । ହଁ ଆପଣଙ୍କୁ ଏହା ଆଶ୍ଚର୍ଯ୍ୟ ଲାଗିପାରେ ହେଲେ ଏହା ସତ । ଯାଜପୁର ସହର ଉପକଣ୍ଠର ରାଉତରାପୁର ଗ୍ରାମରେ ରହିଛି ଏପରି ଏକ ବେଲ ଗଛ ଯାହା କଣ୍ଟା ବିହୀନ । ଏହି ବେଲ ଗଛକୁ ପୂଜାର୍ଚ୍ଚନା କରିବା ସହ ଦେଖିବାକୁ ଧାଇଁ ଆସୁଛନ୍ତି ସ୍ଥାନୀୟ ଲୋକେ ।

ଅନ୍ୟପଟେ ଏ ଭଳି ବେଲ ଗଛ ଜିଲ୍ଲାରେ ପ୍ରଥମ ଥର ଦେଖିବାକୁ ମିଳିଥିବା କହିଛନ୍ତି ଉଦ୍ୟାନ ବିଭାଗର ଭାରପ୍ରାପ୍ତ ଅଧିକାରୀ ରାଧେଶ୍ୟାମ ବେହେରା । ଯାଜପୁର ମାନସା ପୋଲ ନିକଟ ରାଉତରାପୁର ଅଞ୍ଚଳର ସଞ୍ଜୟ ସ୍ଵାଇଁଙ୍କ ଘର ଆଗରେ ରହିଛି ଶହେ ବର୍ଷ ପୁରୁଣା ଏକ ବେଲ ଗଛ । ଆଉ ଏହି ଗଛ ମୂଳରେ ପୂଜା ପାଇଥାନ୍ତି ମା ବୁଢୀ ବାସୁଳେଇ ।

ସଞ୍ଜୟଙ୍କ ଘର ଦଶରଥପୁର ବ୍ଲକ ରାହାସୋଇ ଗ୍ରାମରେ ହୋଇଥିବା ବେଳେ ସଞ୍ଜୟ ଦୁଇ ହଜାର ମସିହାରୁ ଏଠାରେ ଜାଗା କିଣି ଘର କରି ରହିଛନ୍ତି । ସଞ୍ଜୟଙ୍କ କହିବା କଥା ଏ ବେଲ ଗଛରେ କିଛି ଐସୌରିକଶକ୍ତି ରହିଛି । ମୁଁ ଆଉ ମୋ ପରିବାର ଯେଉଁ ପରିସ୍ଥିତିରୁ ଆଜି ଏଭଳି ସ୍ଥିତିକୁ ଫେରିଛୁ ତାହା କେବଳ ଏହି ଗଛ ପାଇଁ । ଆମେ ଦେଖି ଆସୁଛୁ ଏହି ଗଛରେ ଗୋଟେକି କଣ୍ଟା ନାହିଁ । ସେଥିପାଇଁ ଆମେ ଏହି ଗଛକୁ ପୂଜା କରିଆସୁଛୁ ।