ନୂଆଦିଲ୍ଲୀ: ନୂତନ ସଂସଦ ଭବନର ଉଦଘାଟନରେ ୧୯ ବିରୋଧୀ ରାଜନୈତିକ ଦଳ ସାମିଲ ନହେବା ନେଇ ନିଷ୍ପତ୍ତି ନେଇଛନ୍ତି । ପ୍ରଧାନମନ୍ତ୍ରୀ ମୋଦୀଙ୍କ ଦ୍ୱାରା ହେବାକୁ ଥିବା ଏହି ଉଦଘାଟନ କାର୍ଯ୍ୟକ୍ରମକୁ ବୟକଟ୍ କରିବା ପାଇଁ ବିରୋଧୀ ଦଳଗୁଡିକ ଘୋଷଣା କରିଛନ୍ତି । ତେବେ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ବୁଧବାର ବିରୋଧୀ ଦଳଗୁଡିକ ନିଜ ନିଷ୍ପତ୍ତି ଉପରେ ପୁଣି ଥରେ ଚିନ୍ତା କରିବାକୁ କହିଛନ୍ତି ।

କେନ୍ଦ୍ର ସଂସଦୀୟ ବ୍ୟାପର ମନ୍ତ୍ରୀ କହିଛନ୍ତି, ‘ଏହା ଦୁର୍ଭାଗ୍ୟପୂର୍ଣ୍ଣ ବିଷୟ ଯେ ବିରୋଧୀ ଦଳଗୁଡିକ ଅଯଥା କଥାକୁ ପ୍ରସଙ୍ଗ କରୁଛନ୍ତି । କାରଣ ଅତୀତରେ ମଧ୍ୟ ପ୍ରଧାନମନ୍ତ୍ରୀ ସଂସଦ ପରିସରରେ ସ୍ମାରକୀର ଉଦଘାଟନ କରିଛନ୍ତି’।

ଉଲ୍ଲେଖଯୋଗ୍ୟ ଯେ ଆସନ୍ତା ମଇ ୨୮ ରବିବାର ପ୍ରଧାନମନ୍ତ୍ରୀ ମୋଦୀ ନୂତନ ସଂସଦ ଭବନକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିବେ । ବିରୋଧୀ ଦଳଗୁଡିକର ଦାବି ଅନୁସାରେ ନୂତନ ସଂସଦ ଭବନର ଉଦଘାଟନ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ୱାରା ହେବା ଦରକାର । କାରଣ ସେ କେବଳ ଦେଶର ମୁଖ୍ୟ ନୁହନ୍ତି, ବରଂ ସଂସଦର ମଧ୍ୟ ଅବିଚ୍ଛେଦ୍ୟ ଅଙ୍ଗ ।

ନ୍ୟାସନାଲ ଇ-ବିଧାନ ଆପ୍ଲିକେସନ ଉପରେ ଜାତୀୟ କର୍ମଶଳାରେ ସାମ୍ୱାଦିକକୁ ପ୍ରତିକ୍ରିୟା ଦେଇ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ କହିଛନ୍ତି, ‘ବୟକଟ୍ ଏବଂ ଅଯଥା ପ୍ରସଙ୍ଗକୁ ପ୍ରସଙ୍ଗ କରିବା ଦୁର୍ଭାଗ୍ୟପୂର୍ଣ୍ଣ ଘଟଣା । ସେମାନେ ନିଜ ନିଷ୍ପତ୍ତି ଉପରେ ପୁଣି ଥରେ ବିଚାର କରନ୍ତୁ ବୋଲି ମୁଁ ଅପିଲ୍ କରୁଛି’ । କେନ୍ଦ୍ରମନ୍ତ୍ରୀ କହିଛନ୍ତି, ‘ଲୋକସଭା ବାଚସ୍ପତି ହେଉଛନ୍ତି ସଂସଦର କଷ୍ଟଡିଆନ୍ ଏବଂ ପ୍ରଧାନମନ୍ତ୍ରୀଙ୍କୁ ଉଦଘାଟନ ପାଇଁ ବାଚସ୍ପତି ନିମନ୍ତ୍ରଣ କରିଛନ୍ତି । ପ୍ରାୟ ଏକ ଶତାବ୍ଦୀର ପରେ ଐତିହାସିକ ଘଟଣା ଘଟିବାକୁ ଯାଉଛି’।

ଅନ୍ୟପଟେ କେନ୍ଦ୍ରମନ୍ତ୍ରୀ ହରଦୀପ ସିଂ ପୁରୀ କହିଛନ୍ତି ଯେ ୧୯୯୫, ଅକ୍ଟୋବର ୨୪ରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦୀରା ଗାନ୍ଧୀ ପାର୍ଲିଆମେଣ୍ଟ ଆନେକ୍ସର ଉଦଘାଟନ କରିଥିଲେ । ଏହାପରେ ୧୯୮୭, ଅଗଷ୍ଟ ୧୫ରେ ରାଜୀବ ଗାନ୍ଧୀ ପାର୍ଲିଆମେଣ୍ଟ ଲାଇବ୍ରେରୀର ଶିଳାନ୍ୟାସ କରିଥିଲେ ।