ମୁମ୍ବାଇ: ଉଦ୍ଧବ ଗୋଷ୍ଠୀଙ୍କୁ ସୁପ୍ରିମକୋର୍ଟରୁ ପୁଣି ଝଟକା । ଶିବସେନା ନାଁ ଓ ଦଳୀୟ ଚିହ୍ନ ଚାଲିଯିବା ପରେ ସର୍ବୋଚ୍ଚ ଅଦାଲତଙ୍କ ଦ୍ବାରସ୍ତ ହୋଇଥିଲେ ଉଦ୍ଧବ ଠାକରେଙ୍କ ଗୋଷ୍ଠୀ । ହେଲେ ସୁପ୍ରିମକୋର୍ଟଙ୍କ ଖଣ୍ଡପୀଠ ମାମଲାର ତୁରନ୍ତ ଶୁଣାଣି କରିବାକୁ ମନା କରିଛନ୍ତି । ଅନ୍ୟପଟେ ବିଧାନସଭାରେ ଥିବା ଶିବସେନା କାର୍ଯ୍ୟାଳୟ ମଧ୍ୟ ଉଦ୍ଧବଙ୍କ ହାତରୁ ଖସିଛି ।

ମହାରାଷ୍ଟ୍ରରେ ଶିବସେନାର ଦୁଇ ଗୋଷ୍ଠୀ ମଧ୍ୟରେ ବିବାଦ ଲାଗିରହିଛି । ଶିବସେନା ବିଭାଜିତ ହେବାର ଏକ ବର୍ଷ ପରେ ନିର୍ବାଚନ ଆୟୋଗ ସଂଖ୍ୟା ଗରିଷ୍ଠତା ହିସାବରେ ଏକନାଥ ଗୋଷ୍ଠୀଙ୍କୁ ଶିବସେନା ନାଁ ଓ ଦଳୀୟ ଚିହ୍ନ ବ୍ୟବହାର କରିବାକୁ ଅନୁମତି ଦେଇଛନ୍ତି । ସେହିପରି ଉଦ୍ଧବଙ୍କ ଗୋଷ୍ଠୀଙ୍କୁ ବାଲାସାହେବଙ୍କ ଫଟୋ ଏବଂ ଜ୍ଜ୍ବଳନ୍ତା ମଶାଲକୁ ବ୍ୟବହାର କରିବାକୁ କହିଛନ୍ତି । ଏହାକୁ ନେଇ ଉଦ୍ଧବ ଠାକରେ, ନିର୍ବାଚନ କମିଶନଙ୍କ ଉପରେ ବର୍ଷିବା ସହିତ ସୁପ୍ରିମକୋର୍ଟଙ୍କ ଦ୍ବାରସ୍ତ ହୋଇଛନ୍ତି । ଶିବସେନା ନାଁ ଓ ଦଳୀୟ ଚିହ୍ନ ଧନୁତୀର ଚାଲିଯିବା ପରେ ନିର୍ବାଚନ ଆୟୋଗଙ୍କ ନିଷ୍ପତ୍ତିକୁ ବିରୋଧ କରି ସର୍ବୋଚ୍ଚ ଅଦାଲତରେ ଚ୍ୟାଲେଞ୍ଜ କରିଥିଲେ ଉଦ୍ଧବଙ୍କ ଗୋଷ୍ଠୀ । ହେଲେ ସୋମବାର ଏହାକୁ ନେଇ ତତ୍କାଳ ଶୁଣାଣି କରିବାକୁ ମନା କରିଛନ୍ତି ଖଣ୍ଡପୀଠ । ମଙ୍ଗଳବାର ମାମଲାର ତର୍ଜମା କରାଯିବା ପରେ ଶୁଣାଣି ହେବ ବୋଲି କୋର୍ଟ କହିଛନ୍ତି ।

ଅନ୍ୟପଟେ ବିଧାନସଭାରେ ଶିବସେନା କାର୍ଯ୍ୟାଳୟକୁ ମଧ୍ୟ ଏକନାଥ ସିନ୍ଦେଙ୍କ ଗୋଷ୍ଠୀଙ୍କୁ ଦିଆଯାଇଛି । ଏକନାଥ ସିନ୍ଦେଙ୍କ ସମର୍ଥକ ବାଚସ୍ପତି ରାହୁଲ ନାର୍ବେକରଙ୍କୁ ସାକ୍ଷାତ କରିବାକ ସହିତ ଶିବସେନା କାର୍ଯ୍ୟାଳୟକୁ ବ୍ୟବହାର ପାଇଁ ଅନୁମତି ମାଗିଥିଲେ । ଏହାକୁ ତର୍ଜମା କରି ବାଚସ୍ପତି ନାର୍ବେକର ଏକନାଥ ଗୋଷ୍ଠୀଙ୍କୁ ଅଫିସକୁ ଦେଇଛନ୍ତି ।