ନୂଆଦିଲ୍ଲୀ: ଦୁନିଆ ସବୁଠାରୁ ଶକ୍ତିଶାଳୀ ଅର୍ଥନୀତି ଏବେ ଡିଫଲ୍ଟ ହେବା ଦ୍ୱାର ଦେଶରେ ରହିଛି । ଆମେରିକା ସରକାର ଋଣ ପରିଶୋଧ କରିପାରିବ ନା ନାହିଁ ତାହା ଏବେ ପ୍ରଶ୍ନ ହୋଇ ରହିଛି । ମୁଡିଜ୍ ଆନାଲିଟିକ୍ସ ମୁଖ୍ୟ ଅର୍ଥଶାସ୍ତ୍ରୀ ମାର୍କ ଜାଣ୍ଡିଙ୍କ କହିବା ଅନୁସାରେ ସଂକଟର ଶୀଘ୍ର ସମାଧାନ ନ ହେଲେ ସାରା ଦୁନିଆ ଉପରେ ଏହାର ଭୟଙ୍କର ପ୍ରଭାବ ପଡ଼ିବ ।
ଜାଣ୍ଡି ଏବଂ ତାଙ୍କର ଅନ୍ୟ ଦୁଇ ସହଯୋଗୀଙ୍କ କହିବା ଅନୁସାରେ ଏକ ସପ୍ତାହ ଯାଏ ଡିଫଲ୍ଟ ସ୍ଥିତିରେ ଦେଶର ଅର୍ଥନୀତି ସମ୍ପୂର୍ଣ୍ଣ ରୂପେ ଦୁର୍ବଳ ହୋଇଯିବ ଏବଂ ପ୍ରାୟ ୧୫ ଲକ୍ଷ ଜଣ ନିଯୁକ୍ତି ହରାଇବେ । ଯଦି ଡିଫଲ୍ଟ ଅଧିକ ସମୟ ଯାଏ କେବେ ତେବେ ପରିମାଣ ଅଧିକ ଭୟଙ୍କର ହେବ ।
ଜାଣ୍ଡି ଏବଂ ତାଙ୍କ ସହଯୋଗୀ ଅନୁମାନ କରିଛନ୍ତି ଯେ ଆମେରିକାର ଅର୍ଥନୀତି ବୁଡ଼ିଲେ ପ୍ରାୟ ୮୦ ଲକ୍ଷ ଲୋକଙ୍କ ଚାକିରି ଯିବ । ଏପରି ସ୍ଥିତିରେ ଋଣ ହାର ମଧ୍ୟ ବଢିବ । ବେରୋଜଗାରୀ ହାର ବର୍ତ୍ତମାନ ୩.୪ ପ୍ରତିଶତରୁ ବଢି ୮ ପ୍ରତଶିତ ହୋଇଯିବ ଏବଂ ସେୟାର ବଜାରରେ ହ୍ରାସ ଯୋଗୁଁ ଘରୋଇ ନିବେଶକଙ୍କୁ ୧୦ ଟ୍ରିଲିୟନ ଡାଲର କ୍ଷତି ହେବ ।
ଅର୍ଥନୀତି ବିଶେଷଜ୍ଞଙ୍କ କହିବା ଅନୁସାରେ ଆମେରିକାରେ ରାଜନୀତି କାରଣରୁ ଏହି ସଂକଟ ଅଧିକ ବଡ଼ ହୋଇଯାଇଛି । ଏହି ମାମଲା ଏବେ ଆମେରିକା ସଂସଦରେ ଫସି ରହିଛି । ଉଲ୍ଲେଖଯୋଗ୍ୟ ଯେ ଅନ୍ୟ ଦେଶ ପରି ଆମେରିକାରେ ମଧ୍ୟ ସରକାର ସମସ୍ତ ଯୋଜନା, ଦରମା ପରି ନିଜ ଖର୍ଚ୍ଚ ପାଇଁ ଋଣ ନେଇଥାଏ । ତେବେ ଋଣ ନେବା ପାଇଁ ଏକ ସୀମା ରହିଥାଏ, ଯାହାକୁ ଡେଟ୍ ସିଲିଂ କୁହାଯାଇଥାଏ । ଏହି ସୀମା ଆମେରିକୀୟ କଂଗ୍ରେସ ଅର୍ଥାତ୍ ସଂସଦ ଧାର୍ଯ୍ୟ କରିଥାଏ । ଅର୍ଥନୀତିକୁ ନଜରରେ ରଖି ଆମେରିକୀୟ କଂଗ୍ରେସ ଋଣ ସୀମାକୁ ବଢାଇବା ଏବଂ କମାଇବା କାମ କରିଥାଏ । ଆମେରିକାରେ ବାଇଡେନ ପ୍ରଶାସନ ବର୍ତ୍ତମାନ ସ୍ଥିତିର ମୁକାବିଲା ପାଇଁ ଋଣ ସୀମା ବଢାଇବାକୁ ଚାହୁଁଚି କିନ୍ତୁ ରାଜନୈତିକ କାରଣ ଯୋଗୁଁ ଏହା ଫସି ରହିଛି ।
