ନୂଆଦିଲ୍ଲୀ, ୧୩/୦୩: କାର୍‌ର ଟାୟାର ଫାଟିବା କୌଣସି ଦୈବୀକୃତ କୁହାଯାଇପାରିବ ନାହିଁ। ଏହା ମନୁଷ୍ୟକୃତ୍ୟ। ବୀମା କମ୍ପାନୀ ପକ୍ଷରୁ କରାଯାଇଥିବା ଯାଚିକା ଖାରଜ କରିବା ସହ ଏହି ଟିପ୍ପଣୀ କରିଛନ୍ତି ବମ୍ବେ ହାଇକୋର୍ଟ । କାର୍‌ ଦୁର୍ଘଟଣାରେ ପ୍ରାଣ ହରାଇଥିବା ବ୍ୟକ୍ତିଙ୍କ ପରିବାରକୁ କ୍ଷତିପୂରଣ ବି​ରୋଧରେ ବୀମା କମ୍ପାନୀର ଯାଚିକା ଖାରଜ କରିଛନ୍ତି ବମ୍ବେ ହାଇକୋର୍ଟ।

ହାଇକୋର୍ଟର ବିଚାରପତି ଏସ୍‌.ଜି ଡିଗେଙ୍କୁ ନେଇ ଗଠିତ ଜଣକିଆ ଖଣ୍ଡପୀଠ ତାଙ୍କ ରାୟରେ କହିଛନ୍ତି ଯେ ଦୈବୀକୃତ ହେଉଛି ଏକ ଗମ୍ଭୀର ଓ ଅପ୍ରତ୍ୟାଶିତ ତଥା ପ୍ରାକୃତିକ ଘଟଣା । ଯାହା ପାଇଁ କୌଣସି ମଣିଷ ଦାୟୀ ହୋଇନଥାନ୍ତି । କିନ୍ତୁ ଗାଡିର ଟାୟାର ଫାଟିବା ପାଇଁ ମଣିଷ ନିଜେ ଦାୟୀ । କାରଣ ଦ୍ରୁତଗତି, ପୁରୁଣା ଟାୟାର, ଟାୟାରରେ ହାୱା କମ୍‌ କିମ୍ବା ଅଧିକ ରହିବା କିମ୍ବା ତାପମାତ୍ରା ଅଧିକ ରହିବା ଆଦି କାରଣ ଯୋଗୁ ଟାୟାର ଫାଟିଥାଏ । ଏହା ମଣିଷର ଅସାବଧାନତା ଯୋଗୁ ହୋଇଥାଏ । ଚାଳକ ଗାଡି ଚଳାଇବା ପୂର୍ବରୁ ଟାୟାରର ଅବସ୍ଥା ଦେଖିବା ସହ ତାକୁ ଭଲ ଭାବେ ଯାଞ୍ଚ କରିବା ଆବଶ୍ୟକ । ତେଣୁ ଟାୟାର ଫାଟିବା ପାଇଁ ମଣିଷ ହିଁ ଦାୟୀ ହୋଇଥାଏ ।

୨୦୧୦ ର ଏକ ଘଟଣାର ଶୁଣାଣି କରି ରାୟ ଦେଇଛନ୍ତି ବମ୍ବେ ହାଇକୋର୍ଟ। ମକରନ୍ଦ ପଟବର୍ଦ୍ଧନ ନାମକ ଜଣେ କାର୍‌ ଚାଳକ ନିଜର ଦୁଇଜଣ ସହଯୋଗୀଙ୍କ ସହିତ କାର୍‌ରେ ପୁଣେରୁ ମୁମ୍ବାଇ ଯାଉଥିଲେ । ରାସ୍ତାରେ ହଠାତ କାର୍‌ର ପଛ ଟାୟାର ଫାଟି ଯାଇଥିଲା । ଫଳରେ ଚାଳକ କାର୍‌ ଉପରୁ ନିୟନ୍ତ୍ରଣ ହରାଇଥିଲେ ଏବଂ କାର୍‌ ରାସ୍ତାକଡରେ ଥିବା ଏକ ଖାତରେ ଖସିପଡିଥିଲା । ଘଟଣାସ୍ଥଳରେ ମକରନ୍ଦଙ୍କର ମୃତ୍ୟୁ ହୋଇଥିଲା । ସେ ଘରର ଏକମାତ୍ର ରୋଜଗାରକ୍ଷମ ଥିଲେ । ତାଙ୍କ ପାଖରେ ବୀମା ପଲିସି ଥିଲା । ତେଣୁ ତାଙ୍କ ପରିବାର ସମ୍ପୃକ୍ତ ବୀମା କମ୍ପାନି ନିକଟରେ କ୍ଷତିପୂରଣ ପାଇବା ଲାଗି ଆବେଦନ କରିଥିଲେ ।

କିନ୍ତୁ ବୀମା କମ୍ପାନି କହିଥିଲା କି ଟାୟାର ଫାଟିବା ଦୈବୀକୃତ । ତେଣୁ ଏହି ଆଧାରରେ ମକରନ୍ଦଙ୍କ ପରିବାରକୁ କ୍ଷତିପୂରଣ ଦେବାକୁ ମନା କରିଦେଇଥିଲା । ଏହା ପରେ ମକରନ୍ଦଙ୍କ ପରିବାର ମୋଟର ଦୁର୍ଘଟଣା କ୍ଷତିପୂରଣ ଟ୍ରିବ୍ୟୁନାଲରେ ଆବେଦନ କରିଥିଲେ । ଟ୍ରିବ୍ୟୁନାଲ ତାଙ୍କ ରାୟରେ କହିଥିଲେ କି ମକରନ୍ଦ ତାଙ୍କ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ଥିଲେ । ତେଣୁ ବୀମା କମ୍ପାନି ତାଙ୍କ ପରିବାରକୁ ୧ କୋଟି ୨୫ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଟ୍ରିବ୍ୟୁନାଲ ନିର୍ଦ୍ଦେଶ ଦେଇଥିଲେ । କିନ୍ତୁ ଟ୍ରିବ୍ୟୁନାଲର ରାୟ ବିରୋଧରେ ବୀମା କମ୍ପାନି ହାଇକୋର୍ଟର ଦ୍ୱାରସ୍ଥ ହୋଇଥିଲା ।