ନୟାଗଡ (ବୈଦ୍ୟଭୂଷଣ ମହାପାତ୍ର) ୧୨|୬: ଚୋର ଧରିବାକୁ ଗାଁ ଦାଣ୍ଡରେ ବୁଲିଲା ଖଟ । ଆଉ ଗୁଣିଆଠାରୁ ଇଶାରା ପାଇଁ ଗୋଟିଏ ପରିବାର ଉପରେ ହେଲା ମରଣାନ୍ତକ ଆକ୍ରମଣ । ମାନେ ଏଠି ତାନ୍ତ୍ରିକ କଥାରେ କଙ୍ଗାରୁକୋର୍ଟ କରି ଫୈସଲା ଆଉ ଦଣ୍ଡ ଦେଇଦେଲେ ଗାଁର କିଛି ଲୋକ । ଏମିତି ଏକ ଅମାନୁଷିକ ଘଟଣା ଦେଖିବାକୁ ମିଳିଛି ନୟାଗଡ଼ ଜିଲ୍ଲା ରଣପୁର ଥାନା କୋଟଗଡ଼ ଗାଁରେ ।

{"id":122368}

ଦିନ ଦି’ପହରେ ଗାଁ ଦାଣ୍ଡରେ ବୁଲୁଛି ଖଟ । ଚାରିଜଣ ଖଟ ଧରିଥିବା ବେଳେ ପଛପାଖରେ ତନ୍ତ୍ରପାଠ କରୁଛି ତାନ୍ତ୍ରିକ । ଚୋର ଧରିବାକୁ ଚାଲିଛି ନାଟ । ଦୁଇ ଜଣ ମହିଳାଙ୍କ ମୁଣ୍ଡରେ ଲାଗିଛି ଆଘାତ । ଗୁରୁତର ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଇଏ ହେଉଛି ସେଇ ଖଟର କରାମତି । ଆଉ କଙ୍ଗାରୁକୋର୍ଟର ଫୈସଲା ।

{"id":122369}

ନୟାଗଡ଼ ଜିଲ୍ଲା ରଣପୁର ଥାନା କୋଟଗଡ଼ ଗାଁର ଭାସ୍କର ଦୋରାଙ୍କ ଘରୁ ୧୫ ଦିନ ତଳେ ଚୋରି ହୋଇଥିଲା । ବହୁ ଖୋଜାଖୋଜି ପରେ ଚୋରି ଜିନିଷ ନମିଳିବାରୁ ଗାଁକୁ ଗୁଣିଆ ଡାକି ଖଟ ବୁଲାଇବାକୁ ହୋଇଥିଲା ନିଷ୍ପତ୍ତି । ପାଖ ମଳିପଟିଆ ଗାଁର ହରଷ ଗୁଣିଆ ଦୁଇ ଦିନ ତଳେ ତନ୍ତ୍ର ପାଠ କରି ଖଟ ବୁଲାଇଥିଲା । ଆଉ ଖଟ ଯାଇ ଅଟକିଥିଲା ଗାଁର ଅରକ୍ଷିତ ଦୋରାଙ୍କ ଘର ଆଗରେ । ଗାଁରେ ଏନେଇ ସଂଧ୍ୟାରେ ବୈଠକ ବସିଥିଲେ ମଧ୍ୟ କୌଣସି ନିଷ୍ପତ୍ତି ହୋଇପାରିନଥିଲା । ହେଲେ ଗତକାଲି ୧୦ରୁ ଅଧିକ ଲୋକ ଅପରାହ୍ନରେ ହଠାତ୍‌ ଅରକ୍ଷିତ ଦୋରାଙ୍କ ଘରେ ପଶି ମହିଳାମାନଙ୍କୁ ମରଣାନ୍ତକ ଆକ୍ରମଣ କରିଥିଲେ । ଯେଉଁଥିରେ ଅରକ୍ଷିତଙ୍କ ଶାଶୂ ସୁକାନ୍ତି ଏବଂ ପତ୍ନୀ ଗୀତାଞ୍ଜଳି ଗୁରୁତର ଭାବେ ଆହତ ହୋଇ ରାଜସୁନାଖଳା ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଘଟଣା ସମ୍ପର୍କରେ ଅରକ୍ଷିତ ରାଜସୁନାଖଳା ଫାଣ୍ଡିରେ ଅଭିଯୋଗ କରିଥିଲେ ମଧ୍ୟ ପୋଲିସ କୌଣସି ପଦକ୍ଷେପ ଗ୍ରହଣ କରିନଥିବା ଅଭିଯୋଗ ହୋଇଛି ।

{"id":122370}

ଫାଣ୍ଡି ପୋଲିସ ଶୁଣୁନି, ଏସପିଙ୍କୁ ଗୁହାରି କରିବାକୁ ଯାଇଥିଲେ ବି ତାଙ୍କର ଦେଖା ମିଳିନଥିଲା । ଏମିତିରେ ଶେଷରେ ଜିଲ୍ଲାପାଳଙ୍କ ଦ୍ବାରସ୍ଥ ହୋଇଥିଲେ ଅରକ୍ଷିତ । ଜିଲ୍ଲାପାଳ ଏ ସମ୍ପର୍କରେ ଏସପି ଏବଂ ଶରଣକୁଳ ଏସଡିପିଓଙ୍କ ସହ କଥା ହେବା ସହ ଆଇନକୁ ହାତକୁ ନେଇଥିବା ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଭରସା ଦେଇଛନ୍ତି ।

{"id":122371}

ଛୋଟ ଛୋଟ ସମସ୍ୟାର ସମାଧାନ ପାଇଁ ଜିଲ୍ଲା ପୋଲିସ ଗାଁ ଗାଁରେ ଆମ ପୋଲିସ କାର୍ଯ୍ୟକ୍ରମ କରୁଥିବା ବେଳେ ଲୋକମାନେ କିନ୍ତୁ ପୋଲିସ ଉପରେ ଭରସା ନକରି କଙ୍ଗାରୁ କୋର୍ଟ ନିଷ୍ପତ୍ତିରେ ଆଇନକୁ ହାତକୁ ନେଉଛନ୍ତି । ନୟାଗଡ଼ ଜିଲ୍ଲାରେ ଦିନକୁ ଦିନ ଏଭଳି ଘଟଣା ବଢ଼ୁଥିବା ବେଳେ ତୁରନ୍ତ ପୀଡ଼ିତ ପରିବାରକୁ ନ୍ୟାୟ ଦେବା ସହ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଏଭଳି ଘଟଣାକୁ ରୋକି ପାରିବ ।