ପାଟଣା ୦୬।୦୯: ୟୁରିଆ ସାରର କଳା ବଜାରୀ ହେଉଥିବା ନେଇ ଖବର କିଛି ଦିନ ତଳେ ନ୍ୟୁଜ ୭ରେ ପ୍ରସାରଣ ହୋଇଥିଲା । ଯାହାପରେ କେନ୍ଦୁଝର ଜିଲ୍ଲା ପାଟଣା ବ୍ଲକର ଦୁଇ ସାର ଦୋକାନର ଲାଇସେନ୍ସ ରଦ୍ଧ ହେବା ନେଇ ଘଟଗାଁ କୃଷି କାର୍ଯ୍ୟାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।
ପାଟଣା ବଜାର ଉପରେ ଥିବା ଭବାନୀ ଏଣ୍ଟରପ୍ରାଇଜର୍ସ ଓ ବଡ଼ ଧନୁର୍ଯ୍ୟୟପୁରରେ ଥିବା ବାବୁ ଫାର୍ଟିଲାଇଜର ପକ୍ଷରୁ ଦୁଇ ଜଣ ଚାଷୀଙ୍କୁ ଅଧିକ ମାତ୍ରାରେ ସାର ବିକ୍ରି କରିଥିବା ଅଭିଯୋଗ ଆସିଥିଲା । ଯାହାପରେ ଦୁଇ ସାର ଦୋକାନର ଲାଇସେନ୍ସ ରଦ୍ଧ କରାଯାଇଛି। ଏଥି ସହିତ ଦୁଇ ସାର ଦୋକାନର ମାଲିକଙ୍କ ସମେତ ୮ ଜଣଙ୍କୁ କାରଣ ଦର୍ଶାଅ ନୋଟିସ ଜାରି କରିଛି କୃଷି ବିଭାଗ ।
ସୂଚନା ଅନୁଯାୟୀ ଚଳିତ ବର୍ଷ ୟୁରିଆ ସାର ପାଇଁ ଚାଷୀ ହଇରାଣ ହରକତ ହେଉଛନ୍ତି । ଚାଷୀଙ୍କ ପାଇଁ ଆସିଥିବା ସାରକୁ ଚଞ୍ଚକତା କରି ଦୁଇ ଜଣ ଚାଷୀଙ୍କୁ ମାତ୍ରାଧିକ ସାର ବିକ୍ରି କରିଛନ୍ତି । ଏନେଇ ପୂର୍ବରୁ ଅଭିଯୋଗ ହୋଇ ଆସୁଥିବାରୁ ଏବେ ଆକ୍ସନ ମୁଡକୁ ଆସିଛି କୃଷି ବିଭାଗ। ବଡ଼ଧନୁର୍ଯ୍ୟୟପୁର ସ୍ଥିତ ବାବୁ ଏଣ୍ଟର ପ୍ରାଇଜର୍ସ ଜଣେ ଚାଷୀଙ୍କୁ ୧୧୯ ବସ୍ତା ଓ ପାଟଣା ବଜାର ଉପରେ ଥିବା ଭବାନୀ ଏଣ୍ଟରପ୍ରାଇଜର୍ସ ଜଣେ ଚାଷୀଙ୍କୁ ୨୨୨ ବସ୍ତା ବିକ୍ରି କରାଯାଇଥିଲା । ଏନେଇ ଅଭିଯୋଗ ପରେ ଦୁଇ ସାର ଦୋକାନର ଲାଇସେନ୍ସକୁ ଘଟଗାଁ ଜିଲ୍ଲା କୃଷି କାର୍ଯ୍ୟାଳୟ ପକ୍ଷରୁ ରଦ୍ଧ କରାଯାଇଛି।