ନୟାଗଡ ୧୫।୧୦: ପୂର୍ବ ଶତ୍ରୁତାକୁ କେନ୍ଦ୍ରକରି ରାସ୍ତାରେ ଦୁଇ ଯୁବକଙ୍କ ମଧ୍ୟରେ ମାରପିଟ୍ ଏବଂ କାମୁଡା କାମୁଡି । ଜଣଙ୍କର କାନ ଛିଡିବା ସହ ମୁଣ୍ଡରେ ଗଭୀର ଆଘାତ ଲାଗିଥିବା ବେଳେ ଅନ୍ୟ ଜଣଙ୍କର ହାତ ଏବଂ ମୁହଁରେ ଗଭୀର ଆଘାତ ଲାଗିଛି । ଉଭୟଙ୍କୁ ଗୁରୁତର ଅବସ୍ଥାରେ ଭୁବନେଶ୍ବର ସ୍ଥାନାନ୍ତର କରାଯାଇଛି । ନୟାଗଡ ଟାଉନ୍ ଥାନା ମାଛିପଡା ଗାଁରେ ଘଟିଛି ଏଭଳି ଏକ ଅଭାବନୀୟ ଘଟଣା ।
ସୂଚନାଯୋଗ୍ୟ ଯେ, ମାଛିପଡା ଗାଁର ଦୟାନିଧି ବେହେରା ଏବଂ ସୁଶା ବେହେରାଙ୍କ ମଧ୍ୟରେ ରାଜନୈତିକ କାରଣରୁ ପୂର୍ବରୁ ଶତ୍ରୁତା ଲାଗି ରହିଥିଲା । ଏପରିକି ଏଥିପାଇଁ ଉଭୟଙ୍କ ମଧ୍ୟରେ ପୂର୍ବରୁ ମାରପିଟ୍ ହୋଇଥିଲା । ମଙ୍ଗଳବାର ମଧ୍ୟାହ୍ନରେ ସୁଶା ବଜାର ନିକଟରେ ଯାଉଥିବା ସମୟରେ ଦୟାନିଧି ଏବଂ ସୁଶାଙ୍କ ମଧ୍ୟରେ ପ୍ରଥମେ ବଚସା ଏବଂ ପରେ ମାରପିଟ୍ ହୋଇଥିଲା । ଦୟାନିଧି ସୁଶାଙ୍କ ଡାହାଣପଟ କାନକୁ କାମୁଡି ଛିଡାଇଦେବା ସହ ତାଙ୍କ ମୁଣ୍ଡକୁ ମଧ୍ୟ କାମୁଡି ଦେଇଛି । ସେହିପରି ସୁଶା ମଧ୍ୟ ଦୟାନିଧିଙ୍କ ହାତ ଏବଂ ମୁହଁକୁ କାମୁଡି ରକ୍ତାକ୍ତ କରିଦେଇଥିଲେ । ଉଭୟଙ୍କୁ ପ୍ରଥମେ ନୟାଗଡ ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ପରେ ଭୁବନେଶ୍ବର ସ୍ଥାନାନ୍ତର କରାଯାଇଛି । ସୁଶାଙ୍କ ଛିଡିଯାଇଥିବା କାନକୁ ବରଫରେ ରଖି ପଠାଯାଇଛି । ଟାଉନ୍ ଥାନା ପୋଲିସ ମେଡିକାଲକୁ ଆସି ତଦନ୍ତ ଆରମ୍ଭ କରିବା ସହ ଉଭୟଙ୍କ ପରିବାର ସଦସ୍ୟଙ୍କ ବୟାନ ରେକର୍ଡ କରିଛି ।
