ଶ୍ରୀନଗର ୦୮।୦୩ : ସୁରକ୍ଷାକର୍ମୀ ଓ ପୋଲିସକୁ ସଫଳତା । ଜାମ୍ମୁ-କାଶ୍ମୀର ବାରାମୁଲାରୁ ୨ ଆତଙ୍କବାଦୀଙ୍କୁ ଗିରଫ । ସେମାନଙ୍କ ନିକଟରୁ ବିପୁଳ ପରିମାଣର ବିସ୍ଫୋରକ ସାମଗ୍ରୀ ଜବତ ମଧ୍ୟ ହୋଇଛି ।
ଖବର ଅନୁଯାୟୀ, ଜାମ୍ମ-କାଶ୍ମୀରର ବାରାମୁଲାରେ କିଛି ଆତଙ୍କବାଦୀ ଲୁଚି ରହିଥିବା ସୂଚନା ମିଳିଥିଲା । ଗୁଇନ୍ଦା ସୂଚନା ଆଧାରରେ ସୁରକ୍ଷାକର୍ମୀ ଓ ସ୍ଥାନୀୟ ପୋଲିସ ବାରାମୁଲାରେ ଚଢାଉ କରିଥିଲେ । ଏହି ଚଢାଉରେ ସୁରକ୍ଷାକର୍ମୀଙ୍କୁ ମିଳିଥିଲା ସଫଳତା । ଲସ୍କର-ଇ-ତୋଇବାର ଦୁଇ ଜଣ ଆତଙ୍କବାଦୀଙ୍କୁ କାବୁ କରିବାରେ ସଫଳ ହୋଇଥିଲେ ସୁରକ୍ଷାକର୍ମୀ । ପରେ ସେମାନଙ୍କ ନିକଟରୁ ବିପୁଳି ପରିମାଣର ବିସ୍ଫୋରକ ସାମଗ୍ରୀ ଜବତ ମଧ୍ୟ ହୋଇଛି ।
ତେବେ ଜବତ ହୋଇଥିବା ସାମଗ୍ରୀ ମଧ୍ୟରେ ଏକେ-୪୭ର ମାଗାଜିନ୍, ଏକ-୪୭ର ୧୫ ରାଉଣ୍ଡ ସାମିଲ ଅଛି । ଏହାସହିତ ଆତଙ୍କୀଙ୍କ ନିକଟରୁ ଲସ୍କର-ଇ-ତୋଇବାର ୨୦ଟି ପୋଷ୍ଟର ମଧ୍ୟ ଜବତ ହୋଇଛି । ସେପଟେ ସୁରକ୍ଷାକର୍ମୀଙ୍କ ତଦନ୍ତ ପରେ ଦୁଇ ଆତଙ୍କୀଙ୍କ ପରିଚୟ ମିଳିଛି । ଗିରଫ ଆତଙ୍କୀମାନେ ହେଲେ ଖୁର୍ସିଦ ଅମ୍ମମଦ ଖାନ୍ ଏବଂ ରିୟାଜ ଅହମ୍ମଦ ଖାନ୍ ବୋଲି ଜଣାପଡିଛି । କିଛି ଆତଙ୍କୀ ଆକ୍ରମଣରେ ଏମାନେ ସାମିଲ ଥିବା ଅନୁମାନ କରାଯାଉଛି ।
ସେହିପରି ପୂର୍ବରୁ ମଧ୍ୟ ଜାମ୍ମ-କାଶ୍ମୀରର କୁଲଗାମ୍ରୁ ତିନି ଜଣ ଆତଙ୍କବାଦୀଙ୍କୁ ଗିରଫ କରିବାରେ ସଫଳ ହୋଇଥିଲେ ସେନାବାହିନୀର ଯବାନ । ଗିରଫ ଆତଙ୍କବାଦୀମାନେ ହିଜ୍ବୁଲ୍ ମୁଜ୍ଜାହିଦ୍ଦିନ ସହିତ ଜଡିତ ଥିଲେ ବୋଲି ସୂଚନା ମିଳିଥିଲା ।
