ସମ୍ବଲପୁର ୬।୮: ସମ୍ବଲପୁର ଶେରଷୁଆଁତଲରେ ଭାଗଚାଷୀ ଆତ୍ମହତ୍ୟା ମାମଲାରେ ପୋଲିସର ଆକ୍ସନ । ଗିରଫ ହେଲେ ଦୁଇ ଜମି ମାଲିକଙ୍କ ପତ୍ନୀ । ଗିରଫ ଦୁଇ ଯାଆ ହେଲେ ପ୍ରଶାନ୍ତ ପ୍ରଧାନଙ୍କ ପତ୍ନୀ ଯାମିନୀ ପ୍ରଧାନ ଓ ପଦ୍ମନାଭ ପ୍ରଧାନଙ୍କ ପତ୍ନୀ ରେଣୁପମା ପ୍ରଧାନ । ଉଭୟଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି । ତେବେ ପ୍ରଶାନ୍ତ ଓ ପଦ୍ମନାଭ ଫେରାର ଥିବାବେଳେ ଶାସନ ଥାନା ପୋଲିସ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି ।
ସୂଚନାଯୋଗ୍ୟ ଯେ, ଭି. ଗୋପାଳକୃଷ୍ଣ, ପ୍ରଶାନ୍ତ ଓ ପଦ୍ମନାଭଙ୍କ ଜମିରେ ଭାଗ ଚାଷୀ ଭାବେ ଚାଷ କରୁଥିଲେ । ଧାନ ବିକ୍ରି ପଇସା ମଧ୍ୟ ଜମି ମାଲିକ ପାଖକୁ ଯାଉଥିଲା । ହେଲେ ପ୍ରଶାନ୍ତ ଅଳ୍ପ ପଇସା ଦେଇ ବାକି ପରେ ନେବା ପାଇଁ କହି ଫେରାଇ ଦେଉଥିଲା । ଦୀର୍ଘ ବର୍ଷ ପରେ ଏହି ପଇସା ୬ ଲକ୍ଷ ପର୍ଯ୍ୟନ୍ତ ପହଞ୍ଚିଥିଲା । ଭାଗଚାଷୀ ଭି. ଗୋପାଳକୃଷ୍ଣ ପଇସା ମାଗିବାକୁ ଯାଇଥିବା ବେଳେ ଗିରଫ ଦୁଇ ଯାଆ ଗାଳିଗୁଲଜ କରି ଫେରାଇ ଦେଇଥିଲେ । ତେବେ ବାରମ୍ବାର ମାଗିବା ପରେ ମଧ୍ୟ ପଇସା ନଦେବାରୁ ଭି. ଗୋପାଳକୃଷ୍ଣ ଅଗଷ୍ଟ ୨ ତାରିଖରେ କୀଟନାଶକ ପିଇ ଆତ୍ମହତ୍ୟା କରିଥିଲେ ।
