ଭୁବନେଶ୍ୱର 06/07: ଟେଲି ଅଭିନେତ୍ରୀ ରଶ୍ମିରେଖା ଆତ୍ମହତ୍ୟା କରିବାର 18 ଦିନପରେ ଜୀବନ ହାରିଲେ ପୁରୁଷ ବନ୍ଧୁ ସନ୍ତୋଷ ପାତ୍ର। ଗୋଟେପଟେ ରଶ୍ମିରେଖାଙ୍କ ଆତ୍ମହତ୍ୟା ଉପରୁ ପରଦା ଉଠିନି। ଅନ୍ୟପଟେ ପୁରୁଷ ବନ୍ଧୁଙ୍କ ଆତ୍ମହତ୍ୟା । ଘଟଣାଟି ନେଇଛି ନୂଆ ମୋଡ଼। ରାଉରକେଲା ବାସନ୍ତୀକଲୋନୀ ଘରେ ଫ୍ୟାନରେ ଝୁଲି ଜୀବନ ହାରିଛନ୍ତି ସନ୍ତୋଷ। ତାଙ୍କ ଅପମୃତ୍ୟୁର କାରଣ ସ୍ପଷ୍ଟ ହୋଇନି, ପୋଲିସ ତଦନ୍ତ ଜାରି ରହିଛି ।
ତେବେ ମତ୍ୟୁ ପୂର୍ବରୁ ସନ୍ତୋଷ ଛାଡ଼ି ଯାଇଛନ୍ତି ଏକ ସୁଇସାଇଡ୍ ନୋଟ୍ । ଯେଉଁଥିରେ ଲେଖା ଅଛି, ମୁଁ ମୋ ନିଜ ଇଚ୍ଛାରେ ସୁସ୍ଥ ମାନସିକତାରେ ଆତ୍ମହତ୍ୟା କରୁଛି। କାହା ଚାପରେ ଆତ୍ମହତ୍ୟା କରିନି। ମୋ ମୃତ୍ୟ ପରେ ମୋ ମାଆ ବାପାଙ୍କୁ ପୋଲିସ, ହଇରାଣ କରିବନି । LOVE U RASS ... Ever & for ever…।
ଭୁବନେଶ୍ୱର ନୟାପଲ୍ଲୀର ଏକ ଭଡ଼ା ଘରେ ରହୁଥିଲେ ରଶ୍ମିରେଖା ଓ ସନ୍ତୋଷ ପାତ୍ର। ଦୁହେଁ ସ୍ୱାମୀ- ସ୍ତ୍ରୀର ପରିଚୟ ଦେଇ ରହୁଥିଲେ। ନୟାପଲ୍ଲୀର ସେହି ଭଡ଼ା ଘରେ ରଶ୍ମିରେଖା କରିଥିଲେ ଆତ୍ମହତ୍ୟା। ରଶ୍ମିରେଖାଙ୍କ ପୋଷ୍ଟମର୍ଟମ ରିପୋର୍ଟରେ ସେ ତିନି ମାସର ଗର୍ଭବତୀ ଥିବା ଜଣାପଡିଥିଲା । ଏହି ଖବର ଶୁଣିବା ପରେ ପୋଲିସକୁ ସହଯୋଗ କରୁଥିବା ସନ୍ତୋଷ କୁଆଡେ ଫେରାର ହୋଇଯାଇଥିଲେ । ଆଉ ଏବେ ସେ ଜୀବନ ହାରିଛନ୍ତି।
ରଶ୍ମିରେଖା ବି ତାଙ୍କ ମୃତ୍ୟୁ ପୂର୍ବରୁ ଏକ ସୁଇସାଇଡ୍ ନୋଟ୍ ସେଆର କରିଥିଲେ। ଯେଉଁଥିରେ ରଶ୍ମି ତାଙ୍କ ମୃତ୍ୟୁ ପାଇଁ ସନ୍ତୋଷଙ୍କୁ ଦାୟୀ ନ କରିବାକୁ ଲେଖିଥିଲେ। ଆଉ ସନ୍ତୋଷ ବି ନିଜ ନୋଟରେ ରଶ୍ମିଙ୍କ ପାଇଁ ନିଜ ପ୍ରେମକୁ ଦର୍ଶାଇଛନ୍ତି। ତେବେ ଏଥିରୁ ଜଣା ପଡ଼ିଛି ଯେ, ଦୁହିଁଙ୍କ ମଧ୍ୟରେ ଥିଲା ଅଗାଢ଼ ପ୍ରେମ।