କୋଲକତା ୯।୧୨: ପଶ୍ଚିମବଙ୍ଗ ତୃଣମୂଳ କଂଗ୍ରେସର ଲୋକସଭା ସଦସ୍ୟ ମହୁଆ ମୋଇତ୍ରା ମଙ୍ଗଳବାର ଦୁଇଟି ପ୍ରମୁଖ ବେଙ୍ଗଲୀ ନ୍ୟୁଜ୍ ଚ୍ୟାନେଲକୁ ବୟକଟ୍ କରିଛନ୍ତି । ସେହି ଦୁଇଟି ଚ୍ୟାନେଲକୁ ଦୁଇ ପଇସାର ବୋଲି କହିଥନ୍ତି । ମୋଇତ୍ରାଙ୍କ ଏହି ବିବାଦୀୟ ବୟାନକୁ ନେଇ ପଶ୍ଚିମବଙ୍ଗର ଗଣମାଧ୍ୟମରେ ପ୍ରସଙ୍ଗ ଉଠାଇ କ୍ଷୋଭ ପ୍ରକାଶ କରିଛନ୍ତି ।
ସୂଚନାଯୋଗ୍ୟ ଯେ, ରବିବାର ରାଜ୍ୟର ନାଦିଆ ଜିଲ୍ଲାର ଗୟେଶପୁରରେ ଦଳର ଏକ ବୈଠକ ଚାଲିଥିବା ବେଳେ ମହୁଆ ମୋଇତ୍ରା କିଛି ସ୍ଥାନୀୟ ଗଣମାଧ୍ୟମ ପ୍ରତିନିଧିଙ୍କୁ ଦେଖି ନିଜ ନିୟନ୍ତ୍ରଣ ହରାଇଦେଇଥିଲେ । ଏହାପରେ ସେ ସେହି ପ୍ରତିନିଧିଙ୍କୁ ଯାହା କହିଥିଲେ ତାହାକୁ କେହି ଜଣେ ରେକର୍ଡ କରି ସୋସିଆଲ ମିଡିଆରେ ଭାଇରାଲ୍ କରିଦେଇଥିଲେ । ତେବେ ଭାଇରାଲ୍ ଭିଡିଓରେ ଟିଏମସି ସାଂସଦ କହୁଥିଲେ କିଏ ଏହି ଦୁଇ ପଇସାର ପ୍ରେସ୍ କୁ ଏଠାକୁ ଡକାଇଛି । ଏମାନଙ୍କୁ ବୈଠକ ସ୍ଥଳରୁ ବାହାର କରିଦିଆଯାଉ । ଆମ ଦଳର କିଛି ସଦସ୍ୟ ଏମିତି ଲୋକଙ୍କୁ ଟିଭିରେ ନିଜ ମୁହଁ ଦେଖାଇବା ପାଇଁ ବନ୍ଦକୋଠରୀ ବୈଠକରେ ମଧ୍ୟ ନିମନ୍ତ୍ରିତ କରୁଛନ୍ତି । ଏଭଳି କରିବା ଉଚିତ୍ ନୁହେଁ ।
କୋଲକତା ପ୍ରେସ୍ କ୍ଲବ୍ ଟିଏମସି ସାଂସଦଙ୍କ ଏହି ବୟାନର ନିନ୍ଦା କରିଛନ୍ତି । ଏହାସହ ସାଂସଦ କ୍ଷମା ମାଗନ୍ତୁ ବୋଲି ଦାବି କରିଛନ୍ତି । ସାରା ରାଜ୍ୟର ଗଣମାଧ୍ୟମ ପ୍ରତିନିଧି ସୋସିଆଲ ମିଡିଆରେ ପୁରୁଣା ଦୁଇ ପଇସାର କଏନ ଫଟୋ ନିଜ ପ୍ରୋଫାଇଲରେ ବ୍ୟବହାର କରିଛନ୍ତି । ସେମାନଙ୍କ ମଧ୍ୟରୁ କିଛି ଜଣ ଟିଏମସି ବିରୋଧରେ କଡା ପୋଷ୍ଟ ମଧ୍ୟ ଲେଖିଛନ୍ତି ।
