ପଦ୍ମପୁର ୧୮।୦୬ : ଶୋଇଥିବା ବେଳେ ଦଳିଦେଲା ହାତୀ । ଯାହାଫଳରେ ତିନି ଜଣଙ୍କର ମୃତ୍ୟୁ ହୋଇଥିବା ବେଳେ ୩ ଜଣ ଗୁରୁତର ହୋଇଛନ୍ତି । ସମସ୍ତ ଗୁରୁତରଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡ ପାଇକମାଲ ରେଞ୍ଜ ଝାରବନ୍ଧ ଥାନା ସାଲଡିହି ଗାଁରେ ଘଟିଛି ଘଟଣା ।
ଖବର ଅନୁଯାୟୀ, ସୋମବାର ବିଳମ୍ବିତ ରାତିରେ ସଲଡିହି ଗାଁରେ ହାତୀ ଉପଦ୍ରବ ଦେଖିବାକୁ ମିଳିଥିଲା । ଗାଁର ବିପିନ ବରିହା ଓ ତାଙ୍କ ପରିବାର ଘର ପଛ ପଟେ ଶୋଇଥିବା ବେଳେ ତିନୋଟି ହାତୀ ଖାଦ୍ୟ ଅନ୍ୱେଷଣରେ ଆସିଥିଲେ । ଏହି ସମୟରେ ତିନି ଜଣଙ୍କୁ ଜୀବନରୁ ମାରି ଦେଇଥିବା ବେଳେ ଅନ୍ୟ ତିନି ଜଣ ଗୁରୁତର ହୋଇଛନ୍ତି । ତେବେ ହାତୀ ଆକ୍ରମଣରେ ବିପିନଙ୍କ ସ୍ତ୍ରୀ ପାନ ବରିହା, ଦଶ ବର୍ଷୀୟ ଝିଅ ସୁନନ୍ଦ ବରିହା ଓ ତିନି ବର୍ଷର ପୁଅ ଆଦିତ୍ୟ ବରିହାଙ୍କ ମୃତ୍ୟୁ ହୋଇଛି । ବାକି ବିପିନ ବରିହା , ତାଙ୍କର ସାତ ବର୍ଷୀୟ ପୁଅ ମଣ୍ଡୁ ବରିହା ଏବଂ ୬୫ ବର୍ଷୀୟ ଜଟିଆ ବରିହା ଗୁରୁତର ଅଛନ୍ତି । ସମସ୍ତ ଗୁରୁତରଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ସେପଟେ ଅଘଟଣ ସଂପର୍କରେ ବନବିଭାଗଙ୍କୁ ଅବଗତ କରାଯାଇଛି । ସ୍ଥାନୀୟ ପୋଲିସ ଏବଂ ବନବିଭାଗ ଘଟଣାସ୍ଥଳରେ ପହଞ୍ଚି ଯାଞ୍ଚ କରୁଛନ୍ତି ।
