ନୂଆଦିଲ୍ଲୀ ୨୧/୦୮ : କରୋନା ମହାମାରୀ କାରଣରୁ ଚାକିରି ହରାଇଥିବା ବ୍ୟକ୍ତିଙ୍କୁ ଆଶ୍ବସ୍ତିକର ଖବର । କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ, ଯେଉଁମାନେ ମହାମାରୀରେ ଚାକିରି ହରାଇଛନ୍ତି ସେ ସମସ୍ତଙ୍କ EPFO ଆକାଉଣ୍ଟକୁ କେନ୍ଦ୍ର ସରକାର ୨୦୨୨ ଯାଏଁ PF ଅଂଶଧନ ଜମା କରିବେ । ଅର୍ଥ ମନ୍ତ୍ରାଳୟ ପକ୍ଷରୁ ସ୍ପଷ୍ଟ କରିଛି ଯେ, ଯେଉଁମାନଙ୍କର ଇପିଏଫ୍ଓ ଆକାଉଣ୍ଟ ପଞ୍ଜିକରଣ ଥିବ କେବଳ ସେହିମାନଙ୍କୁ ଏହି ସୁବିଧାର ଲାଭ ମିଳିବ । ଅର୍ଥମନ୍ତ୍ରୀ କହିଛନ୍ତି ଯେ ଚାକିରି ହରାଇଥିବା ବ୍ୟକ୍ତିଙ୍କ ପାଇଁ କେନ୍ଦ୍ର ସରକାର ୨୦୨୨ ଯାଏଁ ନିଯୁକ୍ତିଦାତା ତଥା କର୍ମଚାରୀଙ୍କ PF ଅଂଶ ପ୍ରଦାନ କରିବେ କିନ୍ତୁ ଆନୁଷ୍ଠାନିକ କ୍ଷେତ୍ରରେ ଛୋଟ ଛୋଟ ଚାକିରିରେ କାମ କରିବାକୁ ସେମାନଙ୍କୁ ଡକାଯାଇଥିଲା। ଏହି ୟୁନିଟ୍ ଗୁଡିକ EPFO ରେ ପଞ୍ଜୀକୃତ ହେବା ପରେ ହିଁ ଦିଆଯିବ ।
ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି, କରୋନା ମହାମାରୀ ସମୟରେ ରୋଜଗାର ସମସ୍ୟାକୁ ଦୃଷ୍ଟିରେ ରଖି ଚଳିତ ବର୍ଷର ମନରେଗା ବଜେଟ୍ ୬୦ ହଜାର କୋଟି ଟଙ୍କାରୁ ବଢାଯାଇ ଏକ ଲକ୍ଷ କୋଟି ଟଙ୍କା କରିଦିଆଯାଇଛି । ଅର୍ଥ ବ୍ୟବସ୍ଥାର ଗୁରୁତ୍ବପୂର୍ଣ୍ଣ ଅଙ୍ଗ କୁହାଯାଉଥିବା କ୍ଷୁଦ୍ର, ଲଘୁ ଏବଂ ମଧ୍ୟମ ଉଦ୍ୟୋଗ ବା MSME କ୍ଷେତ୍ରକୁ ଯେଉଁଠି ବର୍ଷ ବର୍ଷ ଧରି ପ୍ରୋତ୍ସାହନ ମିଳୁନଥିଲା ତାହାକୁ କେନ୍ଦ୍ରର ନରେନ୍ଦ୍ର ମୋଦି ସରକାର ଦେଇଛନ୍ତି ।
MSME କ୍ଷେତ୍ରକୁ ବାଣିଜ୍ୟ କାରବାରର ପ୍ରମୁଖ ମାଧ୍ୟମ ଭାବେ ଗଢି ତୋଳିଛନ୍ତି କେନ୍ଦ୍ର ସରକାର । ଗତ ୨ ବର୍ଷ ହେଲା କେନ୍ଦ୍ର ସରକାରଙ୍କ ପକ୍ଷରୁ ବିଭିନ୍ନ ଉନ୍ନୟନମୂଳକ କାର୍ଯ୍ୟ ହାତକୁ ନିଆଯାଇଛି ବୋଲି କହିଛନ୍ତି ଅର୍ଥମନ୍ତ୍ରୀ । ସରକାର ଏମ୍ଏସ୍ଏମ୍ଇର ସଂଜ୍ଞାକୁ ବ୍ୟବସ୍ଥିତ ଢଙ୍ଗରେ ପରିବର୍ତ୍ତନ କରିଛନ୍ତି। ସଂସଦରେ ନିକଟରେ ଏକ ବିଲ୍ ଅଣାଯାଇଛି ଯାହା ସିଧାସଳଖ ଏମ୍ଏସ୍ଏମ୍ଇ କ୍ଷେତ୍ର ପାଇଁ ଲାଭଦାୟକ ହେବ।
