ଦୋହା: ଫିଫା ଫୁଟବଲ ଫାଇଟରେ ସ୍ପେନ୍ । ପର୍ଫର୍ମାନ୍ସ ପାଇଁ ପରଫେକ୍ଟ ଫାଇଭ୍ । ମୁହାକୁମ୍ଭରେ ମହାନାୟକ ସାଜିବେ ମହାନ ୫ ଖେଳାଳି । ସିଲେକ୍ସନ ସରିଛି, କେବଳ ମ୍ୟାଚ ଡେ’କୁ ଅପେକ୍ଷା । ଫିଫା ଫୁଟବଲ ମହାକୁମ୍ଭରେ ବିଜୟ ପାଇଁ ସ୍ପେନ୍ ନିଜର ପଞ୍ଚସୂତ୍ର ଆରମ୍ଭ କରିଦେଇଛି । ମ୍ୟାଚ୍ ପୂର୍ବରୁ ପାଞ୍ଚ ମହାରଥୀ ଜୋରଦାର ଅଭ୍ୟାସ ଆରମ୍ଭ କରିଦେଇଛନ୍ତି । ୨୦୧୦ରେ ସଂସ୍କରଣରେ ସ୍ପେନ୍ ପ୍ରଥମ ବିଶ୍ବ ଟାଇଟଲ ଜିତିବାର ସୌଭାଗ୍ୟ ଅର୍ଜନ କରିଥିଲା । ଏହା ପରେ ଦଳ ଆଉ ପଛକୁ ଫେରି ଚାହିଁନାହିଁ । ଏହାରି ମଧ୍ୟରେ ୧୨ ବର୍ଷ ବିତିଯାଇଥିଲେ ମଧ୍ୟ ଖେଳାଳିଙ୍କ ମଧ୍ୟରେ ସେହି ଜୋସ୍ ରହିଛି । ଲକ୍ଷ୍ୟ କେବଳ ଫିଫା ଟାଇଟାଲ୍ ବିଜୟ ଟିକା ପିନ୍ଧିବା ।
ଚଳିତ ଫିଫା ଫୁଟବଲ୍ ମହାକୁମ୍ଭରେ ଗ୍ରୁପ-ଇରେ ରହିଛି ସ୍ପେନ । ଏହି ଗ୍ରୁପରେ ରହିଛନ୍ତି ଶକ୍ତିଶାଳୀ ଜର୍ମାନୀ, କୋଷ୍ଟାରିକା ଓ ଜାପାନ । ତଥାପି ସ୍ପେନ୍ ପଞ୍ଚ ମହାରଥୀଙ୍କୁ ନେଇ ଶକ୍ତିଶାଳୀ ଟିମଙ୍କୁ ମାତ୍ ଦେବାକୁ ଯୋଜନା କରିଛି । ଆସନ୍ତା ୨୩ ତାରିଖରେ ସ୍ପେନ୍ ନିଜର ପ୍ରଥମ ମ୍ୟାଚ୍ ଖେଳିବ । ଏହି ମ୍ୟାଚରେ କୋଷ୍ଟାରିକାକୁ ପରାଜିତ କରି ନିଜର ବିଜୟ ଅଭିଯାନ ଆରମ୍ଭ କରିବାକୁ ଲକ୍ଷ୍ୟ ରଖିଛି । ଏହା ପରେ ୨୭ ଜର୍ମାନୀ ଓ ଡିସେମ୍ବର ୧ରେ ଜାପାନକୁ ଦଳ ଭେଟିବ । ଏହି ମ୍ୟାଚ୍ ଦଳ ପାଇଁ ବେଶ ଗୁରୁତ୍ବପୂର୍ଣ୍ଣ ହେବ । ସ୍ପେନର ପାଞ୍ଚ ତାରକା ଖେଳାଳି ବିପକ୍ଷ ଦଳକୁ ମାତ୍ ଦେଇ ଆଗକୁ ବଢିବାର ରାସ୍ତା ଦେଖାଇବେ । ତେବେ କିଏ ଏହି ପାଞ୍ଚ ମହାରଥୀ ଆସନ୍ତୁ ଜାଣିବା ।
ଗୋଲକିପର ଉନାଇ ସିମୋନ, ଡିଫେଣ୍ଡର ଆୟମେରିକ୍ ଲାପୋର୍ଟ, ମିଡ୍ଫିଲ୍ଡର ପେଡ୍ରି, ମିଡ୍ଫିଲ୍ଡର ସର୍ଜିଓ ବୁସ୍କେଟ୍ସ ଓ ଫରୱାର୍ଡ ଫେରାନ ଟୋରେସ। ୨୫ ବର୍ଷୀୟ ଯୁବ ଗୋଲକିପର ଉନାଇ ସିମୋନ ଆଥଲେଟିକ୍ ବିଲବାଓ ପକ୍ଷରୁ ଖେଳନ୍ତି । ଗତ ୟୁରୋ କପ୍ରେ ତାଙ୍କର ଗେମ୍ ଚେଞ୍ଜର ପରଫର୍ମାନ୍ସ ଦଳକୁ ସେମି ଫାଇନାଲରେ ପହଞ୍ଚାଇବାରେ ସହଯୋଗ କରିଥିଲା । ସ୍ୱିଜରଲାଣ୍ଡ ବିପକ୍ଷରେ ମ୍ୟାଚ୍ ୧-୧ ଗୋଲରେ ବରାବାର ରହିବା ପରେ ପେନାଲ୍ଟି ସୁଟ୍ଆଉଟ୍ରେ ଦଳକୁ ଜିତାଇ ଦର୍ଶକଙ୍କ ହୃଦୟ କିଣି ନେଇଥିଲେ ।
ଦ୍ୱିତୀୟ ମହାରଥୀ ଆୟମେରିକ୍ ଲାପୋର୍ଟ, ମଞ୍ଚେଷ୍ଟର ପାଇଁ ଖେଳୁଥିବା ଏହି ଡିଫେଣ୍ଡର ଦଳର କମର ବୋଲି କୁହାଯାଉଛି । ଜାତୀୟ ଦଳ ପାଇଁ ସିଲେକସନ୍ ହୋଇଥିଲେ ମଧ୍ୟ ଲା ରୋଜା ଆହତ ହେବା ପରେ ତାଙ୍କ ଉପରେ ଭରସା କରିଛନ୍ତି କୋଚ୍ । ୟୁରୋ କପ୍ରେ ଶ୍ରେଷ୍ଠ ପ୍ରଦର୍ଶନ ପାଇଁ ତାଙ୍କୁ ମ୍ୟାଚ୍ ଏକାଦଶରେ ସ୍ଥାନ ମିଳିପାରେ ।
ତୃତୀୟ ମହାରଥୀ ପେଡ୍ରି । ୧୯ ବର୍ଷୀୟ ଏହି ଯୁବ ତାରକାଙ୍କ ପ୍ରଦର୍ଶନ କୋଚ୍ ଲୁଇସଙ୍କୁ ବେଶ ପ୍ରଭାବିତ କରିଛି । ମିଡଫିଲ୍ଡର ପେଡ୍ରି ଜାପାନ ଓ ଜର୍ମାନୀ ପାଇଁ ଘାତକ ସାଜି ପାରନ୍ତି । ପେଡ୍ରିଙ୍କୁ ଦଳରେ ସାମିଲ ପରେ ବେଶ୍ ଉତ୍ସାହିତ ଅଛନ୍ତି ଫୁଟବଲ ପ୍ରେମୀ ।
ଚତୁର୍ଥ ମହାରଥୀ ଫେରାନ ଟୋରେସ । ଆହତ ଯୋଗୁ ବିଶ୍ବକପ ଯୋଗ୍ୟତା ପର୍ଯ୍ୟାୟରେ ସ୍ୱିଡେନ ଓ ଗ୍ରୀସ ବିପକ୍ଷ ଖେଳି ନଥିଲେ ମଧ୍ୟ ତାଙ୍କୁ ଦଳରେ ସାମିଲ କରାଯାଇଛି । ସ୍ପେନ୍ ଆକ୍ରମଣର ସେ ମୁଖ୍ୟ ଖେଳାଳି । ଚଳିତ ବର୍ଷ ସେ ମାଞ୍ଚେଷ୍ଟର ସିଟି ଛାଡ଼ି ବାର୍ସେଲୋନାରେ ଖେଳୁଛନ୍ତି । ୩୧ଟି ଅନ୍ତର୍ଜାତୀୟ ମ୍ୟାଚରେ ୩୧ ଗୋଲ୍ କରିବାର ସଫଳତା ପାଇଛନ୍ତି ଟୋରେସ
ପଞ୍ଚମ ମହାରଥୀ ସର୍ଜିଓ ବୁସ୍କେଟ୍ସ । ୨୦୧୦ ବିଶ୍ୱ ଚାମ୍ପିଅନ ଦଳର ଏକ ମାତ୍ର ଖେଳାଳି ହୋଇଥିବାବେଳେ କତାର ବିଶ୍ୱକପ୍ ଦଳରେ ସେ ସ୍ଥାନ ପାଇଛନ୍ତି । ୩୪ ବର୍ଷୀୟ ଭେଟେରାନ ମିଡ୍ଫିଲ୍ଡର ବେଶ ଅଭିଜ୍ଞ ଓ ପରିପକ୍ୱ । ୧୩୯ଟି ଅନ୍ତର୍ଜାତୀୟ ଓ ୪୬୩ଟି କ୍ଲବ୍ ମ୍ୟାଚ୍ ଖେଳିବାର ଅଭିଜ୍ଞତା ତାଙ୍କ ପାଖରେ ରହିଛି। ତେବେ ଏହି ପାଞ୍ଚ ମହାରଥୀଙ୍କୁ ନେଇ ସ୍ପେନ ଫିପା ବିଶ୍ବକପ ଟାଇଟଲ ହାତେଇବା ଲକ୍ଷ୍ୟରେ ରହିଛି
