ନୂଆଦିଲ୍ଲୀ ୦୮।୦୯: ଟେକ୍ନୋଲୋଜି ଆମ ଜୀବନକୁ ଖୁବ୍‌  ସହଜ କରିଛି । ଯେଉଁଥିପାଇଁ କୁଆଡେ  ଯା’ଆସ କରିବା ସମୟରେ ଆମକୁ ଘଣ୍ଟା  ଘଣ୍ଟା ଅପେକ୍ଷା କରିବାକୁ ପଡୁନି । ଆପ୍‌  ଜରିଆରେ କ୍ୟାବ୍‌ ବୁକ୍‌ କରି ଦେଲେ ତୁରନ୍ତ  ଲକ୍ଷ୍ୟ ସ୍ଥଳରେ ପହଞ୍ଚି ଯାଉଛେ । ଏପରିକି  ପାଖରେ ଟଙ୍କା ନଥିଲେ ମଧ୍ୟ ଚିନ୍ତା ନାହିଁ ।  ଠିକ୍‌ ସେହିପରି ଅନଲାଇନ୍‌ରେ ଫୁଡ୍‌ ଅର୍ଡର୍‌  ସହଜ କିନ୍ତୁ ଏଥିରେ ସମସ୍ୟା ଅନେକ ରହିଛି ।

ଅନ୍‌ଲାଇନ୍‌ ଫୁଡ୍‌ ଅର୍ଡର ବହୁତ ଭଲ ବ୍ୟବସ୍ଥା, ଯାହା  ସାହାଯ୍ୟରେ ଲୋକମାନେ ଘରେ ବସି ନିଜ ପସନ୍ଦର  ଖାଦ୍ୟ ଖାଇପାରୁଛନ୍ତି । ପୂର୍ବରୁ ଲୋକମାନେ ଖାଦ୍ୟର ଅର୍ଡର  କେବଳ ଅସୁବିଧା ସମୟରେ ହିଁ କରୁଥିଲେ । କିନ୍ତୁ ଏବେ  ଏହା ଧୀରେ ଧୀରେ ଲୋକମାନଙ୍କର ଅଭ୍ୟାସରେ ପରିଣତ  ହେବାକୁ ବସିଲାଣି । ଯେତେବେଳେ ମନ ହେଲା ମୋବାଇଲ୍‌ରେ  ଫଟାଫଟ୍‌ ଖାଦ୍ୟ ଅର୍ଡର କରି ଦେଉଛନ୍ତି । ଏହି ଅଭ୍ୟାସ କ୍ରମଶଃ  ଲୋକମାନଙ୍କର ନିଶା ହେବାରେ ଲାଗିଛି ।  ଏପରିକି ଲୋକମାନେ ନିଜର ବଢୁଥିବା  ଓଜନ ଓ ପାଚନତନ୍ତ୍ରଜନିତ ସମସ୍ୟାକୁ ମଧ୍ୟ  ନଜରଅନ୍ଦାଜ୍‌ କରିବାକୁ ପଛାଉ ନାହାନ୍ତି ।  ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁସାରେ ଲୋକଙ୍କର  ଏହି ଅଭ୍ୟାସ କେବଳ ଶାରିରୀକ ନୁହେଁ,  ବରଂ ମାନସିକ ସ୍ୱାସ୍ଥ୍ୟ ଉପରେ ମଧ୍ୟ କୁପ୍ରଭାବ ପକାଇଥାଏ ।  

ପୋଷଣ ଦୃଷ୍ଟିରୁ ଖରାପ- ଫୁଡ୍‌ ଡେଲିଭରୀରେ ମିଳୁଥିବା ଅଧିକାଂଶ ଖାଦ୍ୟ ଫାଷ୍ଟଫୁଡ୍‌, ପ୍ରୋସେସଡ୍‌ ସ୍ନାକ୍ସ ବ୍ୟତୀତ ଅଧିକ କ୍ୟାଲୋରୀ ଓ କମ୍‌  ପୋଷଣଯୁକ୍ତ ଖାଦ୍ୟ ହୋଇଥାଏ । ସମୟ ସହିତ ଲୋକଙ୍କର  ଏହି ନିର୍ଭରଶୀଳତା ଯୋଗୁ ଅସନ୍ତୁଳିତ ଡାଏଟ୍‌ର ମାତ୍ରା କ୍ରମଶଃ  ବଢିଚାଲିଛି । ଏହାଦ୍ୱାରା ଶରୀରରେ ଆବଶ୍ୟକ ଭିଟାମିନ୍‌,  ଖଣିଜ ପଦାର୍ଥ ଓ ପୋଷକ ତତ୍ତ୍ୱର ଅଭାବ ହେବାର ଆଶଙ୍କା  ବଢିପାରେ । 

ବଢୁଥିବା ଓଜନ ଓ ମୋଟାପଣ – ଅଧିକ କ୍ୟାଲୋରୀଯୁକ୍ତ ଏବଂ ସ୍ୱାସ୍ଥ୍ୟକୁ କ୍ଷତି ପହଞ୍ଚାଉଥିବା  ଖାଦ୍ୟ ଓଜନ ବଢାଇବା ସହିତ ମୋଟାପଣ ବଢାଇଥାଏ ।  ଏଥିରେ ଅସ୍ୱାସ୍ଥ୍ୟକର ଫ୍ୟାଟ୍ସ, ଶର୍କରା ଓ ସୋଡିୟମ୍‌ର ମାତ୍ରା  ଅଧିକ ରହିଥାଏ, ଯାହାଦ୍ୱାରା ମେଟାବଲିଜିମ୍‌ ବିଗିଡିପାରେ ।  ଏହାବ୍ୟତୀତ ଶରୀରରେ ଆବଶ୍ୟକତାଠାରୁ ଅଧିକ ଫ୍ୟାଟ୍‌  ଜମା ହୋଇପାରେ । 

ହୃଦ୍‌ଘାତଜନିତ ସମସ୍ୟା – ସ୍ୱାସ୍ଥ୍ୟକୁ କ୍ଷତି ପହଞ୍ଚାଉଥିବା ଖାଦ୍ୟ ଖାଇବା  ଦ୍ୱାରା କାର୍ଡିଓ ଭାସ୍କୁଲାର୍‌ ବା ହୃଦ୍‌ଘାତ ଜନିତ  ସମସ୍ୟା ହେବାର ଆଶଙ୍କା ବଢିପାରେ, ଯାହା  ମଧ୍ୟରେ ରହିଥାଏ ରକ୍ତଚାପ, ହୃଦ୍‌ରୋଗ  ଓ ଷ୍ଟ୍ରୋକ୍‌ ଆଦି । ଆବଶ୍ୟକଠାରୁ ଅଧିକ  ଫ୍ରାଏଡ୍‌ ଓ ପ୍ରୋସେସଡ୍‌ ଖାଦ୍ୟ ଖାଇବା ଦ୍ୱାରା  ଶରୀରରେ କୋଲେଷ୍ଟେରଲ୍‌ ସ୍ତର ବଢିବା ସହ ଧମନୀରେ ଫ୍ଲାକ୍‌  ଜମା ହେବାର ଆଶଙ୍କା ବଢିଥାଏ । 

ପାଚନ ତନ୍ତ୍ରରେ ସମସ୍ୟା –ଅନ୍‌ଲାଇନରେ ମିଳୁଥିବା ଖାଦ୍ୟରେ ଫାଇଭର ଓ ପୋଷକ ତତ୍ତ୍ୱ  ନଥାଏ । ଫଳରେ ପାଚନକ୍ରିୟାରେ ସମସ୍ୟା ସୃଷ୍ଟି ହୋଇଥାଏ ।  ଯେପରିକି କବ୍ଚ, ବାରମ୍ବାର ବାନ୍ତି ଲାଗିବା ଓ ଅନିୟମିତ ବାଉଲ୍‌  ମୁଭମେଣ୍ଟ୍‌ ଆଦି । 

ରକ୍ତରେ ଶର୍କରାର ଅସନ୍ତୁଳନ- ଅଧିକ ମିଠା ଓ ଅଧିକ କାର୍ବୋହାଇଡ୍ରେଟ୍‌ଯୁକ୍ତ ଖାଦ୍ୟ ସାଙ୍ଗକୁ  ଖାଇବାରେ ଅନିୟମିତତା ରକ୍ତରେ ଶର୍କରା ସ୍ତରକୁ କେବେ  ଅଧିକ ତ କେତେ କମ୍‌ କରି ଦେଇଥାଏ । ଏହାଦ୍ୱାରା ଧୀରେ  ଧୀରେ ଇନ୍‌ସୁଲିନ୍‌ ସୃଷ୍ଟିରେ ବ୍ୟତିକ୍ରମ ଦେଖା ଦେଇଥାଏ ।  ଫଳରେ ଟାଇପ୍‌-୨ ମଧୁମେହ ଓ ମେଟାବଲିଜିମ୍‌ଜନିତ  ସମସ୍ୟା ଦେଖା ଦେଇପାରେ । 

ମାନସିକ ସ୍ୱାସ୍ଥ୍ୟ ଉପରେ କୁପ୍ରଭାବ- ଖାଦ୍ୟ ଅର୍ଡର କରିବା ଅଭ୍ୟାସର ନକାରାତ୍ମକ ପ୍ରଭାବ ମାନସିକ  ସ୍ୱାସ୍ଥ୍ୟ ଉପରେ ପଡିପାରେ । କଥାରେ ଅଛି ଯେମିତି ଖାଦ୍ୟ,  ସେମିତି ମନ ଅର୍ଥାତ୍‌ ସାଦା ଖାଦ୍ୟ ଉଭୟ ଶରୀର ଓ ମସ୍ତିଷ୍କ  ପାଇଁ ଭଲ ହୋଇଥାଏ । ସେହିପରି ଅତ୍ୟଧିକ ଛଣା ଓ ତୈଳାକ୍ତ  ଖାଦ୍ୟ ଖାଇବା ମଧ୍ୟ ଶରୀର ଉପରେ କୁପ୍ରଭାବ ପକାଇଥାଏ ।  ଯାହାଦ୍ୱାରା ଚିନ୍ତା ଓ ଅବସାଦ ବଢିବାରେ ଆଶଙ୍କା  ରହିଥାଏ । 

ଆର୍ଥିକ ଅଭାବ- ସବୁବେଳେ ଖାଦ୍ୟ ଅର୍ଡର କରିବା ଦ୍ୱାରା ପରିବାରରେ ଆର୍ଥିକ  ଖର୍ଚ୍ଚ ବଢିଥାଏ । ଫଳରେ ଘରର ବଜେଟ୍‌ ବିଗିଡ଼ି ଯାଇପାରେ ।  ଖାଦ୍ୟ ଅର୍ଡର୍‌ କରି ଖାଇବା ଦ୍ୱାରା ରାସନ୍‌ ପାଇଁ ହେବାକୁ ଥିବା  ଖର୍ଚ୍ଚ ବହୁ ମାତ୍ରାରେ ବଢିଥାଏ । ଏହା ଆର୍ଥିକ ଚିନ୍ତା ବଢାଇବା  ସହ ମାନସିକ ସ୍ୱାସ୍ଥ୍ୟ ଉପରେ ନକାରାତ୍ମକ ପ୍ରଭାବ ପକାଇଥାଏ ।  

ପରିବେଶ ଉପରେ ପ୍ରଭାବ- ଫୁଡ୍‌ ଅର୍ଡର ସହ ପ୍ୟାକେଜିଂ ଓ ୱେଷ୍ଟ ଯୋଡ଼ି ହୋଇଥାଏ,  ଯାହା ପରିବେଶ ଉପରେ କୁପ୍ରଭାବ ପକାଇଥାଏ । ଅଧିକ  ଖାଦ୍ୟର ଅର୍ଡର ଯୋଗୁ ପରିବେଶରେ ପ୍ଲାଷ୍ଟିକ୍‌ ଓ ପ୍ରଦୂଷଣ  ଜନିତ ସମସ୍ୟା ମଧ୍ୟ ବଢିଥାଏ ।