ଭୁବନେଶ୍ବର୨୬/୩: କରୋନା ପାଇଁ ସ୍ଥାନାନ୍ତର ହେଲା ୟୁନିଟ- ୧ ହାଟ । ହାଟରେ ଲୋକଙ୍କ ପ୍ରବଳ ଗହଳି ଯୋଗୁ ସ୍ଥାନାନ୍ତର କରିବାକୁ ବାଧ୍ୟ ହୋଇଛି ବିଏମସି । ସେପଟେ ରାଜଧାନୀ ଲୋକଙ୍କ ସୁବିଧା ପାଇଁ ପନି ପରିବା, ଭଳି ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀରକୁ ଭ୍ୟାନ ମାଧ୍ୟମରେ ଡେଲିଭରି କରିବାକୁ ଯୋଜନା କରାଯାଇଛି ।
ବିଏମସିକୁ କରୋନା ମୁକାବିଲା ଚିନ୍ତା । କାରଣ ଭୁବନେଶ୍ବରର କିଛି ବାସିନ୍ଦା ସାମଜିକ ଦୂରତ୍ବ ନିୟମକୁ କଡାକଡି ପାଳନ ପାଳନ କରୁନାହାନ୍ତି । ଏଥିପାଇଁ ବିଏମସି ମୁଣ୍ଡବିନ୍ଦା ବଢିଯାଇଛି । ବିଶେଷ କରି ଭୁବନେଶ୍ବରରେ ଥିବା ହାଟ ଓ ରାସନ ଦୋକାନ ଗୁଡିକରେ ଭିଡ ଦେଖିବାକୁ ମଳିୁଛି । ସେଥିପାଇଁ ହାଟ ଗଡିକୁ ସାମୟିକ ଭାବେ ଖୋଲା ସ୍ଥାନକୁ ସ୍ଥାନାନ୍ତର କରିବାକୁ ନିଷ୍ପତ୍ତି ନେଇଛି ବିଏମସି ।
ପ୍ରଥମେ ୟୁନିଟ ୧ ହାଟକୁ ସ୍ଥାନନ୍ତର ଆରମ୍ଭ ହୋଇଛି । ଲକ ଡାଉନ୍ ସତ୍ବେ ବି ୟୁନିଟ ୧ ହାଟରେ ହଜାର ହଜାର ଲୋକ ରୁଣ୍ଡ ହେଉଥିବାରୁ ୟୁନିଟ ୧ ହାଟକୁ ୟୁନିଟ ୧ ହାଇସ୍କୁଲ ପଡିଆ ଓ ରାଜମହଲ ଛକକୁ ଉଠାଇ ନିଆଯାଇଛି । ସେପଟେ ୧୦ ମିଟର ଦୂରରେ ବ୍ୟବସାୟ କରିବାକୁ ନିର୍ଦ୍ଦେଶ ଦିଆଯାଇଛି । ଆବଶ୍ୟକ ପଡିଲେ ଡେଲିଭରି ଭ୍ୟାନରେ ପନି ପରିବା, ଅତ୍ୟାବଶ୍ୟକ ସାମଗ୍ରୀ ଲୋକଙ୍କୁ ଡେଲିଭରି କରାଯିବ ବୋଲି କହିଛନ୍ତି ବିଏମସି କମିଶନର । ଆବଶ୍ୟକ ହେଲେ ରାସନ ଦୋକାନ ଗୁଡିକ ପାଳି କରି କିମ୍ବା ଅଲଗା ଅଲଗା ସମୟରେ ଖୋଲିବା ଉପରେ ବିଚାର କରୁଛି ବିଏମସି । ୟୁନିଟ-୧ ହାଟ ପରେ ରାଜଧାନୀର ଅନ୍ୟ ଜନଗହଳିପୂର୍ଣ୍ଣ ହାଟ ଗୁଡିକୁ ଅନ୍ୟତ୍ର ଉଠାଇ ନେବାକୁ ଯୋଜନା କରୁଛି ବିଏମସି ।
ହାଟକୁ ଖୋଲା ସ୍ଥାନକୁ ସ୍ଥାନାନ୍ତର ପାଇଁ ବିଏମସି ନିଷ୍ପତ୍ତିକୁ ସ୍ବାଗତ କରିଛନ୍ତି ବ୍ୟବସାୟୀ। କରୋନା ମହାମାରୀ ରୋକିବା ଦିଗରେ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀ ନେଇଥିବା ନିଷ୍ପତ୍ତିକୁ ମାନିବୁ ବୋଲି କହିଛନ୍ତି ବ୍ୟବସାୟୀ। ସେପଟେ ବିଭିନ୍ନି ପ୍ରକାର ଡାଲି, ଖାଇବା ତେଲ, ଚିନି, ଆଳୁ ଭଳି ଅତ୍ୟାବଶ୍ୟକୀୟ ସାମଗ୍ରୀରେ ଦର କିଲୋ ପିଛା ୫ରୁ ୧୦ ଟଙ୍କା ଅଧିକରେ ବିକ୍ରି କରାଯାଉଥିବା ନଜରକୁ ଆସିଛି । ଗାଡି ମୋଟର ଓ ପରିବହନର ଆଳ ଦେଖାଇ କିଛି ଲାଭଖୋର ବ୍ୟବସାୟୀ ଦାମ ବଢାଇଦେଇଛନ୍ତି । ଏହା ଉପରେ ଅଙ୍କୁଶ ଲଗାଇବାକୁ ଦାବି କରିଛନ୍ତି ଖାଉଟୀ।
