ବଡବିଲ: କେନ୍ଦୁଝର ଜିଲାର ଯୋଡା ବ୍ଲକ ଅନ୍ତର୍ଗତ  କାରାଖେଣ୍ଡରା ଗ୍ରାମ ପଞ୍ଚାୟତର ସରପଞ୍ଚ ସୁବାଷ ସୀତାରୀ ଅଯୋଗ୍ୟ ଘୋଷିତ ହୋଇଛନ୍ତି। ସୁବାଷଙ୍କୁ ମାନ୍ୟବର ହାଇକୋର୍ଟ ଅଯୋଗ୍ୟ ଘୋଷଣା କରିଥିବାବେଳେ କେନ୍ଦୁଝର ଜିଲ୍ଲାପାଳ ଏ ନେଇ ଆଜି ନୋଟିସ ଜାରି କରିଛନ୍ତି । ନିର୍ବାଚନରେ ପ୍ରାର୍ଥୀପତ୍ର ଦାଖଲ ବେଳେ ମିଥ୍ୟା ଶପଥପାଠ ଦାଖଲ କରିଥିବାରୁ ଅଯୋଗ୍ୟ ଘୋଷଣା ଯାଇଥିବା ନେଇ ସୂଚନା ମିଳିଛି ।

ସୁଚନା ଅନୁଯାୟୀ, ୧୯୯୫ ନିର୍ବାଚନ ନିୟମ ଅନୁଯାୟୀ ୨ରୁ ଉର୍ଦ୍ଧ୍ୱ ସନ୍ତାନ ଥିବା ଜନକ କିମ୍ବା ଜନନୀ କୌଣସି ନିର୍ବାଚନରେ  ଅଂଶଗ୍ରହଣ କରିପାରିବେନାହିଁ । ତେବେ ସୁବାଷ ଗତ ପଂଚାୟତ ନିର୍ବାଚନରେ କରିଥିବା ଶପଥପାଠ ଅନୁଯାୟୀ, ତାଙ୍କର ଜଣେ କନ୍ୟାସନ୍ତାନ ଏବଂ ଜାଆଁଳା ଦୁଇ ପୁତ୍ରସନ୍ତାନ  ରହିଥିବା ଦର୍ଶାଇଥିଲେ । ତେବେ ଏ ନେଇ ପ୍ରତିଦ୍ୱନ୍ଦୀ ପ୍ରାର୍ଥୀ କାହ୍ନୁ ଚରଣ ମୁଣ୍ଡା ନିର୍ବାଚନ ଅଧିକାରୀଙ୍କ ସମ୍ମୁଖରେ ମୌଖିକ ଅଭିଯୋଗ କରିଥିଲେ ଯେ,  ୩ ନୁହେଁ, ସୁବାଷଙ୍କର ୪ଟି ସନ୍ତାନ ରହିଛନ୍ତି  ଓ ସେ ମିଥ୍ୟା ଶପଥପାଠ ଦାଖଲ କରିଛନ୍ତି । ହେଲେ କୌଣସି ତଥ୍ୟଭିତ୍ତିକ ଯୁକ୍ତି ନ ଥିବାରୁ କାହ୍ନୁଙ୍କ ଅଭିଯୋଗ ଅଗ୍ରାହ୍ୟ ହୋଇଯାଇଥିଲା ଏବଂ ନିର୍ବାଚନରେ କାହ୍ନୁ ମାତ୍ର ୧୨ ଖଣ୍ଡ ଭୋଟରେ ସୁବାଷଙ୍କ ଠାରୁ ପରାଜିତ ହୋଇଥିଲେ ।

ପରେ କାହ୍ନୁ ସୂଚନା ଅଧିକାର ଆଇନ ଯୋଗେ ସୁବାଷଙ୍କର ୪ଟି ସନ୍ତାନ ଥିବା ତଥ୍ୟ ହାସଲକରି ହାଇକୋର୍ଟର ଦ୍ୱାରସ୍ଥ ହୋଇଥିଲେ ।  ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଜିଲାପାଳ ଗତ ୩୦ ତାରିଖରେ ଅଯୋଗ୍ୟ ଘୋଷିତ ସଂରପଂଚଙ୍କୁ ନୋଟିସ ଜାରୀ କରିଥିଲେ । ମଙ୍ଗଳବାର ଦିନ କେନ୍ଦୁଝର ଜିଲା ପଂଚାୟତ ଅଧିକାରୀଙ୍କ ଚିଠି ସଂଖ୍ୟା ୧୧୧୦ ରେ ଯୋଡା ବିଡିଓଙ୍କୁ ଏ ନେଇ ପତ୍ରାଳାପ ହୋଇଥିବା ଜଣାପଡିଛି । ଏବେ ନାଏବ ସରପଞ୍ଚ, କାରାଖେଣ୍ଡରା ଗ୍ରାମ ପଂଚାୟତର ଦାୟିତ୍ୱ ତୁଲାଇବେ ।