ନୂଆଦିଲ୍ଲୀ: ଭିଲୱାଡା ଦୁଷ୍କର୍ମ ଏବଂ ହତ୍ୟାର ଜଘନ୍ୟ ଘଟଣାରେ ନିଜ ଝିଅକୁ ହରାଇଥିବା ବାପା ନିଜ ଧୈର୍ଯ୍ୟକୁ ହରାଇ ବସିଛି । ସୋମବାର ପୀଡିତାର ଅନ୍ତିମ ସତ୍କାର କରାଯାଉଥିଲା, ଏହି ସମୟରେ ମୃତକଙ୍କ ବାପା ଜଳୁଥିବା ଚିତାକୁ ଡେଇଁ ଜୀବନ ହାରିବାକୁ ଉଦ୍ୟମ କରିଥିଲେ । ତେବେ ଏଥିରେ ସେ ଆହତ ହୋଇଛନ୍ତି, ଚିକିତ୍ସା ପାଇଁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ସେ ଏବେ ବିପଦମୁକ୍ତ ଥିବା ହସ୍ପିଟାଲ ଡାକ୍ତର କହିଛନ୍ତି । ଏହି ଜଘନ୍ୟ ମାମଲାରେ ବର୍ତ୍ତମାନ ସୁଦ୍ଧା ପାଞ୍ଚ ଜଣଙ୍କୁ ଗିରଫ କରାଯାଇଛି ।
ଭିଲୱାଡା ଦୁଷ୍କର୍ମ ପରେ ହତ୍ୟା ମାମଲାରେ ଅବହେଳା ଯୋଗୁଁ ଥାନାର ଏଏସଆଇଙ୍କୁ ସସପେଣ୍ଡ କରାଯାଇଛି । ଭିଲୱାଡାର କୋଟରା ପୋଲିସ ଷ୍ଟେସନର ଏଏସଆଇକୁ ଏହି ମାମଲାରେ ଅବହେଳା ଯୋଗୁଁ ନିଲମ୍ୱିତ କରାଯାଇଛି । ଏହି ମାମଲାରେ ଜିଲ୍ଲା ଏସପି କହିଛନ୍ତି ଯେ ଏହା ଜଘନ୍ୟ ଅପରାଧ ଅଟେ । ଅପରାଧୀଙ୍କୁ ଯେପରି ମୃତ୍ୟୁ ଦଣ୍ଡ ମିଳିବ ସେଥିପାଇଁ ପୋଲିସ ଉଦ୍ୟମ କରିବ ।
ପଢନ୍ତୁ: ରାଜସ୍ଥାନରେ ଚାଞ୍ଚଲ୍ୟ, ନାବାଳିକାକୁ ଗଣଦୁଷ୍କର୍ମ ପରେ ଭାଟିରେ ପୋଡ଼ିଦେଲେ
ଅଗଷ୍ଟ ୪ରେ ଭିଲୱାଡାର ଏକ ଗାଁରେ ଯୁବତୀଙ୍କ ଅର୍ଦ୍ଧଧଗ୍ଧ ମୃତ ଶରୀର ମିଳିଥିଲା । ଅଧାପୋଡ଼ା ଶରୀର ମିଳିବା ପରେ ଅଞ୍ଚଳରେ ଚାଞ୍ଚଲ୍ୟ ଖେଳି ଯାଇଥିଲା । ପରେ ଜଣାପଡ଼ିଥିଲା ଯେ ଏଠାରେ ଜଣେ ନାବାଳିକାକୁ କଥିତ ରୂପେ ହତ୍ୟା କରାଯାଇଥିଲା ଏବଂ ପରେ ଭିଲୱାଡା ଜିଲ୍ଲାର ଏକ ଗାଁରେ କୋଇଲା ଭାଟ୍ଟିରେ ଜାଳି ଦିଆଯାଇଥିଲା । ସ୍ଥାନୀୟ ଲୋକେ ଦାବି କରିଥିଲେ ଯେ ନାବାଳିକା ସହ ଗଣଦୁଷ୍କର୍ମ କରାଯାଇଥିଲା । ମିଳିଥିବା ସୂଚନା ଅନୁସାରେ ମଇଁଷି ଚରାଇବାକୁ ଯାଇଥିବା ବେଳେ ନାବାଳିକା ଜଣକ ନିଖୋଜ ହୋଇଥିଲା । ଅଭିଯୁକ୍ତମାନେ କଥିତ ରୂପେ ନାବାଳିକା ସହ ଗଣଦୁଷ୍କର୍ମ କରିଥିଲେ ଏବଂ ପରେ ସେହି ରାତିରେ ତାର ଶରୀରରୁ ଜାଳି ଦେଇଥିଲେ ।
ଏହି ଜଘନ୍ୟ ଘଟଣା ଉପରେ ଜିଲ୍ଲା ଏପସି କହିଛନ୍ତି ଯେ ଅଭିଯୁକ୍ତଙ୍କୁ ଯେପରି ମୃତ୍ୟୁ ଦଣ୍ଡ ମିଳିବ, ତାହା ସୁନିଶ୍ଚିତ କରିବା ପାଇଁ ସବୁ ଉଦ୍ୟମ କରାଯିବ । ଏସପି କହିଛନ୍ତି, 'ଆମେ ଫାଷ୍ଟ-ଟ୍ରାକ୍ କୋର୍ଟ ମାଧ୍ୟମରେ ସବୁ ଅଭିଯୁକ୍ତଙ୍କୁ ଯେପରି ମୃତ୍ୟୁ ଦଣ୍ଡ ମିଳିବ ତାହା ସୁନିଶ୍ଚିତ କରିବୁ । ଏହା ଜଘନ୍ୟରୁ ଅତି ଜଘନ୍ୟ ମାମଲା ଅଟେ'। ସେ କହିଛନ୍ତି ଏହି ଅପରାଧରେ ୧୦ ଜଣ ଅଭିଯୁକ୍ତ ସାମିଲ ଥିଲେ, ଯେଉଁଥିରେ ଛଅ ପୁରୁଷ ଏବଂ ଚାରି ମହିଳା ସାମିଲ ଥିଲେ ।
Also read: ନାରୀ ସୁରକ୍ଷା ନେଇ ନିଜ ସରକାରର ବିଫଳତା ଉପରେ ପ୍ରଶ୍ନ ଉଠାଇବାରୁ ସରକାରରୁ ବିଦା ହେଲେ ରାଜସ୍ଥାନ ମନ୍ତ୍ରୀ