ସାଲେପୁର ୦୫/୦୧: ଋଣ କରାଇ ଦେବାକୁ କହି ଚୁନ ଲଗାଇ ଲୁଟି ନେଲେ ଲକ୍ଷାଧିକ ଟଙ୍କା ଶଳା, ଭିଣୋଇ ଓ ମାମୁଁ । ଆକାଉଣ୍ଟ ଖୋଲି ମାଲ ରଖ ଲୋନ୍ ନିଅ । ଯିଏ ଯେତେ ପାରୁଛ ଲୋନ୍ ନିଅ । ଆମେ ଅଛୁ ନାଁ । ଏଭଳି ମିଠା ମିଠା ପ୍ରଲୋଭନ ଦେଖାଇ ସରଳ ଲୋକଙ୍କୁ ଲୋନ୍ ଦେବା ନାଁ ରେ ଲୁଟିଛନ୍ତି ଭଦ୍ରମୂଖା ପିନ୍ଧା ଲୁଟେରା ।
କଟକ ଜିଲ୍ଲା ସାଲେପୁର, ମାହାଙ୍ଗା ଓ ନିଶ୍ଚିନ୍ତକୋଇଲି ଅଂଚଳର ଗ୍ରାମୀଣ ଗରିବ ମହିଳା ଓ ଯୁବତୀ ମାନଙ୍କୁ ଠକୁଥିଲେ ଦୁର୍ବୃତ୍ତ । ବିଭିନ୍ନ କୈାଶଳ ଓ ବିଭିନ୍ନ ପ୍ରକାରର ଆକର୍ଷଣୀୟ ପ୍ରଲୋଭନ ଦେଖାଇ ନିରୀହ ମହିଳାଙ୍କୁ ନିର୍ବିଘ୍ନରେ ଠକୁଛନ୍ତି ଠକ । ଏବେ ଏଭଳି ଠକାମୀର ଶିକାର ହୋଇଛନ୍ତି ସାଲେପୁର ଥାନା ଶିଶୁଆ ପଂଚାୟତ ବାହାରପଡା ଗାଁ ମହିଳା ନନ୍ଦିତା ଖଟୋଇ ।
ମହିଳା ଜଣଙ୍କ ଆର୍ଥିକ ସଙ୍କଟରେ ଗତି କରୁଥିବା ବେଳେ, ଋଣ କରାଇ ଦେବାକୁ କହି, ଦେବଦୂତ ଭାବେ ପହଞ୍ଚିଥିଲେ ସାଲେପୁର ଅଂଚଳର ଜ୍ୟୋତି ରଞ୍ଜନ ଦାସ, ଭିଣୋଇ ସନ୍ତୋଷ ଦାସ ଓ ମାମୁଁ ପରିକ୍ଷିତ ଦାସ । ନନ୍ଦିତା ଙ୍କୁ କହିଥିଲେ ଆମେ ଚଟାପଟ ତୁମକୁ ଋଣ କରାଇ ଦେବୁ । ବ୍ୟାଙ୍କରୁ ଋଣ କରାଇଦେବା ଆମ ବାଁ ହାତର ଖେଳ । ବ୍ୟାଙ୍କରେ ସମସ୍ତେ ଆମ କଥାରେ । ଆମେ ଯାହା କହିବୁ ବ୍ୟାଙ୍କ୍ ବାଲା ସେୟା କରିବେ । ଖାଲି ତୁମେ କିଛି ଟଙ୍କା ଦିଅ, ଆଉ ତୁମ ନାଁରେ ଆମେ ଗୋଟିଏ ଆକାଉଣ୍ଟ ଖୋଲି ଦେବୁ, ଆଉ ତାପରେ ତୁମେ ତ ମାଲାମାଲ୍ । ଶଳା, ଭିଣୋଇ ଓ ମାମୁଁର ମିଠା ମିଠା କଥାରେ ଭାସିଯାଇ ନନ୍ଦିତା ଧାର ଉଧାର କରି ଏମାନଙ୍କୁ ଟଙ୍କା ଦେଇଥିଲେ । ହେଲେ ମାସ ପରେ ମାସ ବିତିଲା ପରେ ନାଁ କୈାଣସି ବ୍ୟାଙ୍କ୍ରେ ଆକାଉଣ୍ଟ ଖୋଲା ହେଲା ନା ଋଣ ମିଳିଲା ।
ନନ୍ଦିତା ଏମାନଙ୍କ ପାଖକୁ ଋଣ ପାଇଁ ଦୌଡ଼ି ଦୌଡ଼ି ଚପଲ୍ ସିନା ଘୋରି ହେଲା, ନାଁ ଏମାନଙ୍କ ଭେଟ ମିଳିଲା ନାଁ ମିଳିଲା ଋଣ ? ଏମାନେ ଏମିତି ଲୁଟିଛନ୍ତି ଲକ୍ଷ ଲକ୍ଷ ଟଙ୍କା ନିରୀହ ଲୋକଙ୍କର । କୌଣସି ସୂତ୍ରରୁ ଖବର ନନ୍ଦିତା ଜାଣିବାକୁ ପାଇଲେ ଯେ ଜ୍ୟୋତି ରଞ୍ଜନ ଏକ ସ୍ଥାନରେ ବସିଛନ୍ତି । ତେଣୁ କୈାଶଳକ୍ରମେ ତାକୁ ଆସି ଧରି ପକାଇଥିଲା ନନ୍ଦିତା । ଆଉ କହିଲେ ମୋର ଋଣ ଦରକାର ନାହିଁ ମୋର ନେଇଥିବା ଟଙ୍କା ଫେରାଅ । ଏକଥା ଶୁଣି ଜ୍ୟୋତି ରଞ୍ଜନ ତାହାର ସହଯୋଗୀ ଭିଣୋଇ ଓ ମାମୁଁ କୁ ଘଟଣା ସ୍ଥଳକୁ ଡାକିଥିଲେ । ସେମାନେ ମଧ୍ୟ ଆସିଲେ ଓ କହିଲେ ଆମ ଘରକୁ ଚାଲ ଆମେ ଟଙ୍କା ଫେରାଇଦେବୁ । ଏମାନଙ୍କ କଥାରେ ବିଶ୍ୱାସ କରି ନନ୍ଦିତା ଜ୍ୟୋତି ରଞ୍ଜନ ଙ୍କ ଘରକୁ ନିଜର ଟଙ୍କା ଫେରି ପାଇବା ଆଶାରେ ଆସି ସକାଳୁ ରାତି ୯ ଯାଇ ବସି ବସି ହତାଶ ହୋଇ ନିଜ ମୁଣ୍ଡରେ ହାତ ଦେଇ ଘରକୁ ଫେରିଲେ ।
ପରେ ଏ ସଂକ୍ରାନ୍ତରେ ସାଲେପୁର ଥାନାରେ ଏକ ଲିଖିତ ଏତଲା ଦେଲା ପରେ, ସାଲେପୁର ପୋଲିସ, ମାମଲା ରୁଜୁ କରି ଠକିବା ସହ ସଂଗୀନ ଦଫା ଲଗାଇ ଜ୍ୟୋତି ରଞ୍ଜନଙ୍କୁ ବାନ୍ଧି କୋର୍ଟ ଚାଲାଣ କରିଛି ପୋଲିସ । ଏ ଘଟଣା ପରେ ଜ୍ୟୋତି ରଞ୍ଜନଙ୍କ ଅନ୍ୟ ସହଯୋଗୀ ଫେରାର ହୋଇ ଯାଇଥିବା ବେଳେ ଖୁବଶିଘ୍ର ସଂପୃକ୍ତ ବ୍ୟକ୍ତିଙ୍କୁ ଗିରଫ କରାଯିବ ବୋଲି ସୂଚନା ଦେଇଛି ସାଲେପୁର ପୋଲିସ।
