ୱାଶିଂଟନ,୨୯/୨: ଆମେରିକାର ଟେକ୍ସାସ୍ ଜଙ୍ଗଲରେ ଭୟଙ୍କର ଅଗ୍ନିକାଣ୍ଡ । ନିଆଁର ଆଁ ଭିତରେ ପୂରା ଜଙ୍ଗଲ । ୮.୫ ଲକ୍ଷ ଏକର ଜଙ୍ଗଲରେ କାୟା ବିସ୍ତାର କରିଛି ନିଆଁ । ପୋଡ଼ି ପାଉଁଶ ହୋଇଗଲାଣି ୫ ଲକ୍ଷ ଏକର ଜଙ୍ଗଲ । ତଥାପି ଏହା ଶାନ୍ତ ପଡ଼ୁନାହିଁ । ଏହାକୁ ଲିଭାଇବା ପାଇଁ ପ୍ରାଣମୂର୍ଚ୍ଛା ଉଦ୍ୟମ ଜାରି ରହିଛି । ଭୟଙ୍କର ଜଙ୍ଗଲରେ ନିଆଁ ଜଣଙ୍କର ଜୀବନ ଯାଇଛି । ଏହି ଭୟାନକ ଜଙ୍ଗଲ ନିଆଁ ପାଇଁ ଆମେରିକାର ଅଣୁ ଅସ୍ତ୍ରାଗାର ମଧ୍ୟ ବିପଦରେ ପଡ଼ିଛି । ନ୍ୟୁକ୍ଲିଅର୍ ସାଇଟ୍ରେ ସମସ୍ତ କାର୍ଯ୍ୟ ବନ୍ଦ କରାଯାଇଛି ।
ନିଆଁର ବ୍ୟାପକତାକୁ ଦୃଷ୍ଟିରେ ରଖି ମଙ୍ଗଳବାର ଛୋଟ ସହରଗୁଡ଼ିକୁ ଖାଲି କରିବା ପାଇଁ ନିର୍ଦ୍ଦେଶ ଦିଆଯାଇଥିଲା । ପବନ ବହୁଥିବାରୁ ନିଆଁ ଦ୍ରୁତ ଗତିରେ ମାଡ଼ିବାରେ ଲାଗିଛି । ଗରମ ତାପମାତ୍ରା ନିଆଁକୁ ଆହୁରି ଉଗ୍ର କରିଛି । ଗ୍ରାମାଞ୍ଚଳରେ ନିଆଁ ବ୍ୟାପି ଘରଦ୍ୱାର ପୋଡ଼ି ପାଉଁଶ କରିଦେଇଛି । ଏଭଳି ପରିସ୍ଥିତିରେ ରିପବ୍ଲିକାନ୍ ଗଭର୍ଣ୍ଣର ଗ୍ରେଟ୍ ଏବଟ୍ ୬୦ କାଉଣ୍ଟିରେ ଜରୁରି ପରିସ୍ଥିତି ଘୋଷଣା କରିଦେଇଛନ୍ତି ।
wp:embed {"url":"https://www.prameyanews7.com/norway-helicopter-crash-lands-in-ocean/","type":"wp-embed","providerNameSlug":"prameya-news-7"}ସୋମବାର ଟେକ୍ସାସ୍ ଜଙ୍ଗଲରେ ନିଆଁ ଲାଗିଥିଲା ଏବଂ ବର୍ତ୍ତମାନ ଏହାର ଆକାର ଦୁଇଗୁଣା ହୋଇସାରିଲାଣି । ଏବଟ୍ କହିଛନ୍ତି, ଟେକ୍ସାସ୍ବାସୀ ନିଜକୁ ସୁରକ୍ଷିତ ରଖିବା ଜରୁରି । ସେମାନେ ନିଜ ପରିଜନଙ୍କୁ ବି ସୁରକ୍ଷା ଯୋଗାଇବା ଆବଶ୍ୟକ । ସୂଚନା ମୁତାବକ ଟେକ୍ସାସ୍ରେ ଲାଗିଥିବା ସବୁଠୁ ବଡ଼ ଜଙ୍ଗଲ ନିଆଁକୁ ‘ସ୍ମୋକ୍ହାଉସ୍ କ୍ରିକ୍ ଫାୟାର’ ବିବେଚନା କରାଯାଉଛି । ଏହାକୁ ଦୃଷ୍ଟିରେ ରଖି ମୁଖ୍ୟ ସଡ଼କଗୁଡ଼ିକୁ ବନ୍ଦ କରାଯାଇଛି । ପେଣ୍ଟେକ୍ସରେ ରାଷ୍ଟ୍ରୀୟ ପରମାଣୁ ସୁରକ୍ଷା ପ୍ରଶାସନର ଉତ୍ପାଦନ କାର୍ଯ୍ୟାଳୟ ମୁଖପାତ୍ର ଲାଫ୍ ପେଣ୍ଡ୍ରଗ୍ରାଫ୍ଟ ମଙ୍ଗଳବାର ବିଳମ୍ବିତ ରାତ୍ରିରେ ଏକ ସାମ୍ବାଦିକ ସମ୍ମିଳନୀରେ କହିଥିଲେ, ଆମକୁ ଅତ୍ୟଧିକ ସାବଧାନତାର ସହ କାର୍ଯ୍ୟ କରିବାକୁ ହେବ । ସେଥିପାଇଁ ସମସ୍ତ କର୍ମଚାରୀଙ୍କୁ ଖାଲି କରାଯାଇଛି । ଜଙ୍ଗଲ ନିଆଁର ମୁକାବିଲା ସକାଶେ ଏକ ସୁସଜ୍ଜିତ ଅଗ୍ନିଶମ ବିଭାଗ ରହିଛି । ବର୍ତ୍ତମାନ ଏହା ସାଇଟ୍ରେ ଅଛି ଏବଂ ଯେ କୌଣସି ପ୍ରକାର ପରିସ୍ଥିତିର ମୁକାବିଲା ଲାଗି ପ୍ରସ୍ତୁତ ଅଛି । ଟେକ୍ସାସ୍ରେ ଲାଗିଥିବା ‘ସ୍ମୋକ୍ହାଉସ୍ କ୍ରିକ୍ ଫାୟାର’କୁ ଦ୍ୱିତୀୟ ବୃହତ୍ ଅଗ୍ନିକାଣ୍ଡ ବୋଲି ଟେକ୍ସାସ୍ ଏଆଣ୍ଡ୍ଏମ୍ ଜଙ୍ଗଲ ସେବା ବିଭାଗ ପକ୍ଷରୁ କୁହାଯାଇଛି ।
ନିୟନ୍ତ୍ରଣ ବାହାରକୁ ଚାଲି ଯାଇଥିବା ଏହି ଜଙ୍ଗଲ ନିଆଁ ଆହୁରି ବ୍ୟାପିବା ଆଶଙ୍କା ରହିଛି । ଏହା ପୂର୍ବରୁ ୨୦୦୬ରେ ‘ଇଷ୍ଟ ଆମାରିଲୋ କମ୍ପେ୍ଲକ୍ସ’ରେ ଭୟାନକ ଅଗ୍ନିକାଣ୍ଡ ହୋଇଥିଲା । ଏହାଯୋଗୁ ୯ ଲକ୍ଷ ଏକର ଜଙ୍ଗଲ ପୋଡ଼ିଯାଇଥିଲା । ରିପୋର୍ଟ ଅନୁସାରେ ସୋମବାର ଅପରାହ୍ନଠାରୁ ଏକାଧିକ ସ୍ଥାନରେ ଜଙ୍ଗଲରେ ନିଆଁ ଲାଗିଛି । ତନ୍ମଧ୍ୟରୁ ସବୁଠୁ ବଡ଼ ହେଉଛି ‘ସ୍ମୋକ୍ହାଉସ୍ କ୍ରିକ୍ ଫାୟାର’ । ମାତ୍ର ଦୁଇଦିନ ମଧ୍ୟରେ ଏହା ୫ ଲକ୍ଷ ଏକର ଜମି ଜଙ୍ଗଲ ପୋଡ଼ି ପାଉଁଶ କରିଦେଲାଣି । ଅଗ୍ନିଶମ ବାହିନୀ କର୍ମଚାରୀମାନେ ନିଆଁ ଲିଭାଇବା ପାଇଁ ଉଦ୍ୟମ ଜାରି ରଖିଛନ୍ତି । ଲୋକମାନେ ସେମାନଙ୍କ ଘର ଛାଡ଼ି ପଳାଉଛନ୍ତି । ହଚିନ୍ସନ, ହେମ୍ଫିଲ୍, ରୋବର୍ଟସ, ଲିପ୍ସକମ୍ବ ଏବଂ ମୁର୍ କାଉଣ୍ଟିର ଅଧିକାରୀମାନଙ୍କୁ ଲୋକଙ୍କୁ ଉଦ୍ଧାର ପାଇଁ ନିର୍ଦ୍ଦେଶ ଦିଆଯାଇଛି । ସାଟେଲାଇଟ୍ ଚିତ୍ରରେ ପୂରା ଧୁଆଁ ଧୁଆଁ ହୋଇଥି ଆକାଶ ।