ଚାନ୍ଦବାଲି ୦୬/୦୨: ବାବା ଆଖଣ୍ଡଳମଣିଙ୍କ ପୀଠକୁ ଏକ ନୂଆରୂପରେ ଗଢିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ପ୍ରୟାସ ଜାରି ରହିଛି । ସରକାରଙ୍କ ପକ୍ଷରୁ ପ୍ରଥମ ପର୍ଯ୍ୟାୟରେ ମନ୍ଦିର ବେଢାର ସମ୍ପ୍ରସାରଣ ସହ ନାଟମଣ୍ଡପ ମରାମତି ସହ ଅନ୍ୟାନ୍ୟ ଉନ୍ନତି ପାଇଁ ୬କୋଟି ଟଙ୍କା ଯୋଗାଇ ଦିଆଯାଇଥିଲା ।

ଏହି କାର୍ଯ୍ୟ ଏବେ ଅନ୍ତିମ ପର୍ଯ୍ୟାୟରେ ପହଁଚିଥିବା ବେଳେ ଅବଶିଷ୍ଟ କାର୍ଯ୍ୟକୁ ତ୍ୱାରାନ୍ୱିତ କରି ଖୁବଶୀଘ୍ର ଶେଷ କରିବାକୁ ବିଭାଗୀୟ ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି ଜିଲାପାଳ । ୨ୟ ପର୍ଯ୍ୟାୟରେ ହେବାକୁ ଥିବା ପୀଠର ଓ ମନ୍ଦିର ପରିଧିର ସମ୍ପ୍ରସାରଣ ପାଇଁ ଭଦ୍ରକ ଜିଲାପାଳ ସିଦ୍ଧେଶ୍ବର ବଳିରାମ ବନ୍ଦୋର ନିଜେ କ୍ଷେତ୍ର ପରିଦର୍ଶନ କରିଛନ୍ତି ।

ତାହାସହ ତାଙ୍କ ପରାମର୍ଶ କ୍ରମେ ଚାନ୍ଦବାଲି ତହସିଲଦାର, ଆରଡି ରାଜସ୍ୱ ନୀରିକ୍ଷକଙ୍କ ସହ ବହୁ ଅଧିକାରୀ ଜମି ଅଧିଗ୍ରହଣ ନିମନ୍ତେ ବିସ୍ଥାପିତ ହେବାକୁ ଥିବା ୧୩୨ ପରିବାରଙ୍କର ବାସଗୃହ ଓ ଜାଗାର ଖସଡା ପ୍ରସ୍ତୁତ କରିଛନ୍ତି । ରାଜ୍ୟ ସରକାରଙ୍କର ଏହି ଐତିହ୍ୟ ପଦକ୍ଷେପକୁ ପୀଠର ଜନସାଧାରଣ, ଆଗନ୍ତୁକ ଭକ୍ତ ଓ ପର୍ଯ୍ୟଟକ ସାଧୁବାଦ ଜଣାଇଛନ୍ତି ।